قازاقستان مەن قىرعىز رەسپۋبليكاسى شەكاراسىنداعى قىرعىز تاراپىنىڭ كەدەندەگى كەمشىلىكتەردى رەتكە كەلتىرۋ بويىنشا ۇسىنىسقا ءالى دە رەسمي تۇردە جاۋاپ كەلىپ تۇسكەن جوق.
بۇل تۋرالى ق ر قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى عوسمان ءامرين ءمالىم ەتتى، دەپ حابارلايدى «قازاقپارات» حاا.
«بۇل ماسەلە بۇگىن عانا پايدا بولعان جوق. وتكەن جىلدارى دا قىرعىز تاراپىمەن بىرنەشە رەت تالقىلانعان. ەۋرازيالىق ەكونوميكالىق كوميسسياعا ەرەكشە تاپسىرما بەرىلىپ، ولاردىڭ بايانداۋى بويىنشا قىرعىز تاراپىنىڭ كەدەن سالاسىنا قاتىستى كەمشىلىكتەرى مەن بۇزۋشىلىقتارى دالەلدەنگەن. ول انىق. دەمەك،بۇل قازاقستاننىڭ وزدىگىنەن شىعارىپ العان شەشىمى ەمەس. ەندىگى كەزەكتە مۇنى شەشۋدىڭ قانداي جولى بار؟ ول - قىرعىز رەسپۋبليكاسىنىڭ كەدەن قىزمەتىمەن بىرلەسەجۇمىس اتقارۋ»، - دەيدى كوميتەت ءتوراعاسىنىڭ ورىنباسارى.
عوسمان ءامريننىڭ ايتۋىنا قاراعاندا قازاقستان تاراپىنان قىرعىز رەسپۋبليكاسىنا بىرنەشە ۇسىنىس جولدانعان.
«وتكەن جىلى ءوز باسىم ۇكىمەتتىڭ تاپسىرماسىمەن قىرعىزستانعا بارىپ، باۋىرلاس حالىق بولعاسىن ناقتى قانداي ماسەلە بارىن ايتقان ەدىك.ەكىنشىدەن، وسى جىلى قايتادان بۇل ماسەلەنى كوتەرىپ وتىرمىز. جاعداي وزگەرگەن جوق. ءبارىن دە كەدەندىك ەرەجەلەر مەن تالاپتاردى جىپكە تىزگەندەي ايتىپ، كورىپ وتىرمىز دەسەك تە، ناتيجە وڭ بولعان جوق. جالپى ولار (قىرعىز تاراپى - اۆت.) «ءيا، قارايىق، جۇمىستى كۇشەيتەيىك. كونترابانداعا جول بەرمەيىك» دەپ ايتقان. وعان ءبارى كەلىسەدى. ەندىگى كەزەكتە دە جۇمىس بويىنشا كەلىسىپ، بىرگە ءبارىن رەتتەيىك دەپ وتىرمىز. ياعني جاۋاپ كۇتىپ وتىرمىز»، - دەيدى ول.
ونىڭ ايتۋىنشا، اتالعان ماسەلەنى شەشۋدىڭ ءۇش جولى بار.
«بىرىنشىدەن، ەكى جاققا دا تاۋاردىڭ قۇنى بىردەي بولۋى كەرەك. سالىقتارىمىز بىردەي بولۋى ءتيىس. كەدەندە ولار تاۋاردى 1، ءبىز 10 دوللارمەن الساق، ولاي بولمايدى. ەكىنشىدەن، ەرتەڭ ءسوز بولماسىن، باسقاشا كوزقاراسپەن قاراپ وتىر دەگەن تۇسىنىكتى تاراتپاۋىن، ياعني كەدەن بويىنشا بارلىق تاراپقا بىردەي قاراپ وتىرعانىمىزدى بىلدىردىك. بۇگىنگە دەيىن ۇسىنىسىمىز جالعىز - كەدەندە بىرلەسە جۇمىس اتقارۋ. ۇشىنشىدەن، بىر-بىرىمىزگە قانداي تاۋارلار، قاشان كەلدى، سالىستىرۋ ءۇشىن قانداي باعامەن كەلدى دەگەن سىڭايدا اقپارات الماسىپ وتىرايىق دەگەن ۇسىنىستى جولدادىق. تاعى دا ايتارىم، باۋىرلاس ەل بولعاندىقتان، بۇل ماسەلەنى بىرلەسە شەشۋگە تىرىسۋىمىز كەرەك. كەلىسپەيتىن بولسا، ءبىز باقىلاۋ جۇمىسىن كۇشەيتە بەرەمىز»، - دەيدى عوسمان ءامرين.
مەملەكەتتىك كىرىستەر كوميتەتى ءتوراعاسىنىڭ ورىنباسارىنىڭ سوزىنە سۇيەنسەك، كونتراباندا ماسەلەسى بارىنە بەلگىلى بولىپ وتىر.
«قىرعىز دەپۋتاتتارى ءوز ەلدەرىندە بۇل ماسەلەنى كوتەرگەن. بۇگىن پايدا بولعان دۇنيە ەمەس. ءبارىمىز دە قانداي جاعداي بولعانىن بىلەمىز. قىرعىز تاراپى كەلىسەمىز دەپ وتىر. ءبىراق، رەسمي تۇردە جاۋاپ ءالى كەلىپ تۇسكەن جوق»، - دەپ ءتۇيدى عوسمان ءامرين.
