پاۆلودار تۇرعىنى قوقىس جاشىگىنەن مەملەكەتتىك رامىزدەردىڭ ءبىرىن تاۋىپ العان. ەلتاڭبا ورتالىق ستاديون ماڭىنداعى قوقىس جاشىكتەرىنىڭ بىرىنەن سەنبىلىك بارىسىندا تابىلدى. تابىلعان ەلتاڭبانى فۋتبول جانكۇيەرلەرى ۇيالى تەلەفوندارىنا ءتۇسىرىپ العان. بۇل تۋرالى 31 ارنانىڭ جاڭالىقتار قىزمەتى حابارلادى، دەپ جازادى Qamshy.kz اقپارات اگەنتتىگى.

ءدال سول ۋاقىتتا جەرگىلىكتى «يرتىش» جانە قاراعاندىلىق «شاحتەر» كلۋبتارىنىڭ اراسىندا ماچ ءجۇرىپ جاتقان.

مەملەكەتتىك ءرامىز قۇرىلىس قالدىقتارىنىڭ اراسىندا جاتتى. سپورت نىسانى اكىمشىلىگىنىڭ ايتۋىنشا، قىزمەتكەرلەر ەلتاڭبانى سەنبىلىك بارىسىندا تاۋىپ العان. ال ونى كىمنىڭ تاستاعانى ءالى بەلگىسىز. ستاديون ماڭىندا ەكى بىردەي مەملەكەتتىك مەكەمە ورنالاسقانىن ايتا كەتۋ كەرەك: ءبىرى قالالىق سوت بولسا، ەندى ءبىرى وبلىستىق سپورت باسقارماسى. ەگەر ءىس قوزعالىپ، كىنالى تابىلعان ۋاقىتتا ولارعا مەملەكەتتىك ءرامىزدى قورلادى دەگەن ايىپپەن قىلمىستىق جاۋاپكەرشىلىك جۇكتەلۋى مۇمكىن. 4 جارىم ملن. تەڭگە كولەمىندە ايىپپۇل تولەيدى نەمەسە 2 جىلعا سوتتالادى.