ادام ولىمنەن كەيىن ءوزىنىڭ قايتىس بولعانىن سەزەدى جانە اينالاسىندا نە بولىپ جاتقانىن تۇسىنەدى ەكەن، - دەپ حابارلايدى نيۋ-يورك ۋنيۆەرسيتەتىنىڭ جانىنداعى Langone مەديسينا مەكتەبىنىڭ (NYU Langone School of Medicine) عالىمدارى. بۇل تۋرالى Qamshy.kz اقپارات  اگەنتتىگى ريا نوۆوستيگە سۇيەنە وتىرىپ جازادى.

دارىگەرلەردىڭ انىقتاماسى بويىنشا، ءولىم ميعا قان بارماي، ونىڭ جۇمىسى بىردەن توقتاعان ساتتە بولادى. وسىدان كەيىن ءميدىڭ جاسۋشالارى ولە باستايدى. زەرتتەۋ جۇرگىزۋشى سەم پارينانىڭ سوزىنشە، بۇل كلينيكالىق ولىمنەن كەيىن بىرنەشە ساعات وتە بولاتىن پروسەسس ەكەن. 

وعان قوسا، جۇرەك توقتاعانىمەن ادامنىڭ ساناسى بىردەن وشپەيدى. ادامدار «ءولىمنىڭ العاشقى فازاسىندا» تىرشىلىك بەلگىلەرىن كورسەتە الادى. جۇرەگى توقتاپ قالىپ، كلينيكالىق ءولىمدى كورگەن ادامدار وزدەرىمەن نە بولعانىن تولىق ايتا الۋى وسىعان دالەل. 

«ولار دارىگەرلەر مەن مەدبيكەلەردىڭ قالاي جۇمىس ىستەپ جاتقانىن سەزىپ، ولاردىڭ سوزدەرىن ەستىپ جاتادى ەكەن. باسقاشا ولار اينالاسىندا نە بولعانىن ەش جەردەن بىلە المايتىن ەدى»، - دەپ اتاپ ءوتتى پارينا.

زەرتتەۋشىنىڭ ايتۋىنشا، بۇل ەسكە الۋلاردى دارىگەرلەردىڭ وزدەرى راستاپ، ءىس جۇزىندە ءولدى دەگەن ادامداردىڭ اينالاسىنداعى جاعدايدىڭ بۇگە-شۇگەسىنە دەيىن ايتىپ بەرگەنىنە تاڭدانادى ەكەن.