بۇگىن  ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى «ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ» ۇيىمداستىرۋىمەن سلاۆيان جازبالارى مەن مادەنيەتى كۇنىنە ارنالعان دوڭگەلەك ۇستەل وتىرىسى ءوز جۇمىسىن باستادى.

قالىپتاسقان ءداستۇر بويىنشا قازاقستان حالقى سلاۆيان جازبالارى مەن مادەنيەتى كۇندەرىن جىل سايىن 24 مامىر كۇنى اتاپ وتەدى.  شاراعا بايلانىستى رەسپۋبليكانىڭ كوپتەگەن ايماقتارىندا دوڭگەلەك ۇستەل، كونفەرەنسيا، كونسەرت، كىتاپ كورمەسى، ءارتۇرلى بايقاۋلار مەن ۆيكتورينالار ۇيىمداستىرىلادى.

وسىعان وراي، قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى استاناداعى رەسەي عىلىم جانە مادەنيەت ورتالىعىندا بۇگىن  ساعات 10:00-دە «عاسىرلار توعىسىنداعى سلاۆيان جانە تۇركى حالىقتارى: ءتىلى، مادەنيەتى، جازبالارى» تاقىرىبىندا حالىقارالىق «دوڭگەلەك ۇستەل» وتكىزۋدە.

دوڭگەلەك ۇستەلدىڭ ماقساتى – عاسىرلار توعىسىنداعى سلاۆيان جانە تۇركى حالىقتارىنىڭ تىعىز قارىم-قاتىناسى، ورىس جانە باسقا دا سلاۆيان تىلدەرىن ۇيرەتۋ سالاسىندا قالىپتاسقان تاجىريبە الماسۋلار مەن قازاقستاننىڭ ەتنومادەني كەڭىستىگىندە سلاۆيان تىلدەرىن ساقتاۋ مەن دامىتۋدىڭ ءتۇرلى اسپەكتىلەرى توڭىرەگىندەگى پىكىر الماسۋلار بولىپ وتىر.

دوڭگەلەك ۇستەل وتىرىسىندا قازاقستاندىق جانە شەتەلدىك جەتەكشى عالىمداردىڭ سلاۆيان جازبالارى جايىنداعى زەرتتەۋلەرى، الەۋمەتتانۋ، لينگۆومادەنيەت، اۋدارما سالاسىنداعى باياندامالارى ورتاعا سالىنباقشى.

دوڭگەلەك ۇستەل جۇمىسىنا ق ر مادەنيەت جانە سپورت ۆيسە-مينيسترى م.ا.ءازىلحانوۆ، رەسەيدىڭ قازاقستانداعى توتەنشە جانە وكىلەتتى ەلشىسى م.ن.بوچارنيكوۆ، بەلارۋسيانىڭ قازاقستانداعى توتەنشە جانە وكىلەتتى ەلشىسى ا.نيچكاسوۆ، قازاقستان حالقى اسسامبلەياسىنىڭ ءتوراعاسىنىڭ ورىنباسارى و.گ.دىموۆ، «ۋكراїنسكى نوۆيني» گازەتىنىڭ باس رەداكتورى ت.ا.چەرنەگي جانە ت.ب. قاتىسۋدا.

دوڭگەلەك ۇستەل اياسىندا سلاۆيان فيلولوگياسىنىڭ وقۋ-ادىستەمەلىك وقۋلىقتارى بويىنشا كورمە وتۋدە.