الماتىدا ادام قۇقىقتارى جونىندەگى قازاقستاندىق بيۋرو كەڭسەسىندە وپپوزيسيالىق ساياساتكەر سەرىكبولسىن ءابدىلديننىڭ «ۇستاز» اتتى كىتابىنىڭ تۇساۋكەسەرى ءوتتى. كىتاپ ساياساتكەردىڭ 80 جاسقا تولۋىنا وراي شىعارىلعان. كىتاپتا سەرىكبولسىن ءابدىلديننىڭ كاسىبي مامان بولىپ قالىپتاسۋى، ب ا ق بەتتەرىنە جاريالانعان جەر، اۋىل شارۋاشىلىعى ماسەلەلەرىنە قاتىستى ويلارى مەن سۇحباتتارى بەرىلگەن،-دەپ جازادى Qamshy.kz اقپارات اگەنتتىگى. 

كىتاپتى تانىستىرۋ شاراسىنا اۆتوردىڭ ءوزى، وپپوزيسيالىق ساياساتكەر ۆلاديمير كوزلوۆ، قۇقىق قورعاۋشى ءارى جۋرناليست اندرەي سۆيريدوۆ، كىتاپتى قۇراستىرعان جۋرناليستەر ەرمۇرات ءباپي، باقىتگۇل ماكىمباي قاتىستى.

بۇدان بۇرىن دا ساياساتكەر جانە ۇستاز سەرىكبولسىن ءابدىلديننىڭ 40-تان اسا ەڭبەگى جارىق كورگەن. ۇستازدىڭ ايتۋىنشا، كىتاپ شىعارۋعا كەتكەن قارجىنىڭ بارلىعىن شەتەلدىك سايىستارعا قاتىسا وتىرىپ، ءوزى ۇتىپ الىپ وتىرعان. ۇسىنعان بيزنەس جوبالاردىڭ بارلىعى دەرلىك ءساتتى شىققانىنا قۋاناتىنىن ايتتى. ونىڭ ىشىندە، ستۋدەنتتەرگە ارنالعان وقۋلىقتار مەن باسقا دا وزەكتى ساياسي وقيعالارعا بايلانىستى كىتاپتارى شىققان.

بيىل سەكسەننىڭ سەڭگىرىنە شىققان اقساقال ءالى دە وتە شىمىر، بوس ۋاقىتىندا جۇزۋمەن اينالىسادى. 

تانىستىرۋدا ءابدىلدين ءوزىنىڭ 30 جىلدان استام ۋاقىت ۇستازدىقپەن اينالىسقانىن، بۇل كىتاپ سونىڭ سول قىزمەتىنىڭ قورىتىندىسى ىسپەتتەس ەكەنىن ايتتى.

سەرىكبولسىن ءابدىلدين 1937 جىلى دۇنيەگە كەلگەن. ول قوعام قايراتكەرى، ەكونوميكا عىلىمدارىنىڭ دوكتورى جانە پروفەسسور.

سەرىكبولسىن ءابدىلدين ءوزى جايىندا... pic.twitter.com/Qb1ZR8It7D

— Pulatova Zamyra (@PZamyra) November 13، 2017

1982-1985 جىلدار ارالىعىندا قازاق كسر اۋىل شارۋاشىلىعى ءمينيسترىنىڭ ءبىرىنشى ورىنباسارى بولعان. ال 1985 جىلى اوك-نى باسقارۋ جونىندەگى رەسپۋبليكالىق جوعارى مەكتەپتىڭ رەكتورى، 1986-1987 جىلدارى قازاقستان اۋىل شارۋاشىلىعى ءمينيسترى، 1990-1995 ج. ارالىعىندا قازاق كسر جوعارى كەڭەسىنىڭ ءتوراعاسى لاۋازىمىن اتقارعان. قازىرگى كەزدە قازاق ۇلتتىق اگرارلىق ۋنيۆەرسيتەتىندە ۇستاز بولىپ قىزمەت ەتىپ ءجۇر.