بىرنەشە لومباردتقا شابۋىل جاسادى دەگەن كۇدىكپەن ۇستالعان 20 جاستاعى ەكى جىگىتتىڭ ءبىرى الماتىلىق تۇرعىن بولسا، ءبىرى الماتى وبلىسىنىڭ قاراساي ايماعىنان، - دەپ جازادى Qamshy.kz اقپارات اگەنتتىگى.
ۇرلىقتىڭ انىق-قانىعى تۋرالى الماتى ءىىم كريمينالدى پوليسيا باسشىلىعىندا پودپولكوۆنيك قىزمەتىن اتقارۋشى جانبولات زيادين ايتىپ بەردى:
«جۇرگىزىلگەن شۇعىل جۇمىستار بارىسىندا كورسەتىلگەندەي، اتالمىش كۇدىكتىلەر اباي مەن التىنسارين كوشەلەرى قيىلىسىندا ورنالاسقان لومباردتاردى توناۋعا قاتىسى بار. ولار پىشاق جانە پنيەۆماتيكالىق قارۋمەن كاسسيردىڭ زارەسىن الىپ، 8 ۇيالى تەلەفون، ايپاد، 71 مىڭ تەڭگەنى جىمقىرعان. ولار ۇرلانعان زاتتاردى قولدانىپ ۇلگەرە المادى، سەبەبى تەز ارادا پوليسيا قىزمەتكەرلەرى ولاردىڭ ءىزىن سۋىتپاي، تاۋىپ الدى. زاتتاي ايعاقتار تۇركسىب ايماعىنداعى ۇيلەردىڭ بىرىنەن تابىلدى. ولار قولايلى ۋاقىت تۋعانشا، زاتتاردى جەرگە كومە تۇرۋدى شەشكەن»،- دەدى.
ءدال قازىرگى ۋاقىتتا، ۇستالعاندار كۇزەتكە الىندى. بۇدان بىرنەشە ساعات بۇرىن ولار الماتىداعى اۋەزوۆ ايماعىندا ءدال وسىنداي قىلمىس جاساعان.
