استاناداعى ورتالىق كوممۋنيكاسيالار قىزمەتىنىڭ بريفينگىندە الماتى وبلىسىنىڭ اكىمى وسى جاعىمدى جاڭالىقتى جەتكىزدى. اماندىق باتالوۆ جەتىسۋ جەرىندە حالىق سانى 2 ميلليوننان اسقانىن ايتىپ، بيىل اتقارىلعان جۇمىستار تۋرالى باياندادى، دەپ جازادى Qamshy.kz.
وبلىس اكىمى بريفينگتە ءوزى باسقارىپ وتىرعان ءوڭىردىڭ ساياسي-الەۋمەتتىك، مادەني، ينفراقۇرىلىمدىق دامۋى تۋرالى باياندادى. قازىرگى ۋاقىتتا وبلىستا 16 اۋدان مەن 3 قالا اكىمدىگى بار. ءوڭىر باسشىسى ءوز بايانداماسىندا وبلىستىڭ الەۋمەتتىك-ەكونوميكالىق دامۋى، مەملەكەتتىك باعدارلامالاردىڭ ورىندالۋى جانە «ەكسپو-2017» حالىقارالىق مامانداندىرىلعان كورمەسىنىڭ قورىتىندىسىندا قولعا الىنعان جوبالار تۋرالى كەڭىنەن اڭگىمەلەدى.
بيىل 9 ايدا الماتى وبلىسىندا 540 ملرد تەڭگەنىڭ ءونىمى ءوندىرىلدى. بارلىق سالا بويىنشا دامۋ قارقىنى جامان ەمەس. جىل سوڭىنا دەيىن يندۋستريالاندىرۋ كارتاسى اياسىندا 7 ينۆەستيسيالىق جوبانى ىسكە قوسۋ جوسپارلانىپ وتىر. باستىسى، بۇل كاسىپورىندار 1،5 مىڭ جۇمىس ورنىن قۇرۋعا سەپتىگىن تيگىزبەك. بۇدان بولەك بيىل 611 مىڭ شارشى مەتر تۇرعىن ءۇي پايدالانۋعا بەرىلەدى. اماندىق باتالوۆتىڭ سوزىنە قاراعاندا، ايماقتا شەشىمىن تاپپاعان ماسەلە جوق.
ءوز سوزىندە وبلىسى اكىمى "ءبىز 2-3 جىل ىشىندە 2،9 ملرد تەڭگە قوستىق. اۋەجاي سالدىق. جولدار مىنا كوشەدەن كەم ەمەس. ۇكىمەتكە، قتج-عا شىعىپ، ءقازىر تەمىرجول ۆوكزالىن سالىپ جاتىرمىز، سۋ قۇبىرىن سالىپ بەردىك. وتكەن جىلى اۋرۋحانا سالىپ بەردىك. ءقازىر بارساڭىز، تاڭ قالاسىز"، - دەدى وبلىستىڭ دامۋى جايىندا.
اۋىل شارۋاشىلىعىنىڭ ءونىم كورسەتكىشى بويىنشا دا الماتى وبلىسى كوش باستاپ تۇر. ازىق-تۇلىك باعاسىن رەتتەۋ كەرەك ەكەنىن العا تارتقان وبلىس باسشىسى وڭىردە بولشەك ساۋدا ورتالىعى اشىلاتىنىن ايتتى. سوندا ونىمدەر دەلدالسىز بىردەن دۇكەن سورەلەرىنە جەتكىزىلەدى. جوبانى يراندىق كومپانيا ىسكە اسىرماق. ينۆەستيسيانى دا سولار قۇيادى. تەك جەر تەلىمىن بەرسەك بولعانى. ەگەر جوسپار جۇزەگە اسسا، ورتالىق كەلەر جىلى ىسكە قوسىلادى. سونداي-اق ءوڭىر باسشىسى قانت قىزىلشاسىن دا ءسوز ەتتى. بيىل 35 مىڭ توننا قانت الۋ جوسپارلانىپ وتىر. ءبىراق ەلىمىزدىڭ بۇل ونىمگە دەگەن جىلدىق سۇرانىسى 500 مىڭ تونناعا دەيىن جەتەدى. الايدا ايماق ونىڭ تەك 20%-ىن عانا قامتاماسىز ەتە الادى. ءسوز سوڭىندا اماندىق باتالوۆ ۇزدىك اكىمدەردىڭ رەيتينگىندە ۇنەمى الدىڭعى قاتاردان كورىنسە دە، وعان قىزىقپايتىنىن ايتتى.
وعان قوسا، الماتى وبلىسىنداعى يندۋستريالدى ايماقتاردا 17 كاسىپورىن جۇمىس ىستەسە، الداعى ۋاقىتتا ونىڭ سانىن 400-گە جەتكىزۋگە مۇمكىندىك بار.
– سەرىكتەس قالا «GateCity»اۋماعىندا «بەرەك» جاڭا يندۋستريالدى ايماعى قۇرىلىپ، وندا ءىرى كومپانيالاردىڭ قاتىسۋىمەن جالپى سوماسى 90 ملرد. تەڭگەلىك، 2 مىڭ جۇمىس ورنى قۇرىلاتىن 5 ءىرى ينۆەستيسيالىق جوبا جۇزەگە اسىرىلا باستادى. ولاردىڭ قاتارىندا ەت پولۋفابريكاتتارىن شىعاراتىن «باۋمانن» (گەرمانيا)، كارتوپ وڭدەيتىن «فارمفريتس» (گوللانديا)، جىلىجاي شارۋاشىلىعى بويىنشا «ەكوكۋلتۋر» (رەسەي) كومپانيالارى بار، – دەدى اماندىق باتالوۆ.
سونداي-اق وبلىستا «تالدىقورعان»، «بەرەكە»، «ارنا»، «بورالداي»، «قازىبەك بەك»، «قايرات» – 6 يندۋستريالدى ايماق بار ەكەنى جانە ولاردىڭ بارلىق قاجەتتى ينفراقۇرىلىممەن قامتاماسىز ەتىلگەنى ايتىلدى.
بريفينگ بارىسىندا جۋرناليستەر جالپى سانى 20-عا جۋىق ساۋال قويدى. سۇراقتار نەگىزىنەن ءتۋريزمدى، ونىڭ ىشىندە الاكول جاعالاۋىن دامىتۋ، ەت ەكسپورتىن ارتتىرۋ، قانت پەن كوكونىس باعاسىن تۇراقتاندىرۋ شارالارى، گازداندىرۋ بارىسىندا الەۋمەتتىك ءالجۋاز توپتارعا جەڭىلدىكتەر قاراستىرۋ، بالاباقشا قۇرىلىسى، ءۇش اۋىسىمدى مەكتەپتەردىڭ ماسەلەسىن شەشۋ جانە تاعى باسقا دا ماسەلەلەر تۋرالى بولدى. سۇراقتاردىڭ بارلىعىنا تولىققاندى جاۋاپ بەرىلدى.
