الماتىدا 2017 جىلعا كەلىسىمشارت بويىنشا اسكەري قىزمەتكە قابىلداۋ جۇمىستارى اياقتالدى. الماتى قالاسى بويىنشا كەلىسىمشارت قىزمەتىنە 300-دەن اسا ۇمىتكەرلەر جىبەرىلدى. قازاقستان رەسپۋبليكاسى قارۋلى كۇشتەرىندە كەلىسىمشارت بويىنشا قىزمەتكە ورنالاسۋ ءۇشىن جاسى 19 بەن 30 ارالىعى بولۋى كەرەك. كوميسسيانىڭ وڭ شەشىمىن العان بارلىق ۇمىتكەرلەردىڭ اسكەري-ەۆەپ ماماندىعى، اسكەري لاۋازىمى بار.

سونداي-اق مەرزىمدى اسكەري قىزمەتىن وتكەرگەن نەمەسە قورعانىس مينيسترلىگىنىڭ ارنايى مامانداندىرىلعان دايىندىق كۋرسىن، اسكەري كافەدراسىن ءتامامداعان ۇمىتكەرلەر كەلىسىمشارت بويىنشا اسكەري قىزمەتكە ورنالاسادى. كەلىسىمشارت قىزمەتىندەگى اسكەري قىزمەتشى اسكەري لاۋازىمعا يە بولۋمەن ەڭبەك سىڭىرگەن جىلدارىنا سايكەس كاسىبي لاۋازىمىنىڭ وۋسىنە مۇمكىندىك الادى. كەلىسىمشارت بويىنشا اسكەري قىزمەت مەملەكەت تاراپىنان الەۋمەتتىك قولداۋمەن قامتاماسىز ەتىلەدى. قازاقستان رەسپۋبليكاسى قارۋلى كۇشتەرىندە قىزمەت تولىق كولەمدە الەۋمەتتىك قورعاۋدا بولادى. مىسالى اسكەري قىزمەتشى جانە ولاردىڭ وتباسى مۇشەلەرىنە ارنالعان اقشالاي ۇلەسپەن، زاتتاي جانە مۇلىكتىڭ باسقا دا تۇرلەرىمەن قامتاماسىز ەتىلەدى.

تۇرعىن ۇيگە مۇقتاجدار اسكەري قىزمەتتى وتكەرۋ كەزىندە مەملەكەت ەسەبىنەن ءتۇرعىنۇيدى جالعا الۋ ءۇشىن ماقساتتى وتەماقى تولەۋ كوزدەلگەن. اسكەري قىزمەتشىلەردىڭ جانە ولاردىڭ مۇشەلەرىن اسكەري-مەديسينالىق مەكەمەلەردە مەديسينالىق قامتاماسىز ەتۋ مەملەكەت ەسەبىنەن جۇزەگە اسىرىلادى. سونىمەن بىرگە، كەلىسىمشارت بويىنشا اسكەري قىزمەتشىلەرگە 2 لاۋازىمدىق جالاقى مولشەرىندە ساۋىقتىرۋ جاردەماقى تولەۋمەن جىل ساسىنعى ەڭبەك دەمالىسى ۇسىنىلاتىنىن ايتا كەتكەن ءجون. ارميانىڭ ايبىندى بولۋى اسكەري قىزمەتشىلەردىڭ مارتەبەسى مەن جاعدايىنىڭ جاقسى بولۋىمەن ولشەنەدى.

«اسكەري قىزمەت پەن اسكەري قىزمەتشىلەردىڭ مارتەبەسى تۋرالى» 2012 جىلعى 16 اقپانداعى ق ر زاڭىنا سايكەس، كەلىسىمشارت بويىنشا اسكەري قىزمەتكە كىرەتىن ادامداردا ق ر ازاماتتىعى بولۋى، كۋرسانتتار مەن وزگە دە ساناتتاعى اسكەري قىزمەتشىلەردى ەسەپتەمەگەندە، 19 جاستان كىشى بولماۋى، اسكەري-ەسەپكە الۋ ماماندىعىنىڭ بولۋى، ايەلدەردى قوسپاعاندا، مەرزىمدى اسكەري قىزمەتتى وتكەرۋى نە جوو-نىڭ اسكەري كافەدراسىندا وقۋدان ءوتۋى نەمەسە اسكەري-وقىتىلعان رەزەرۆتى دايارلاۋ بويىنشا قورعانىس مينيسترلىگىنىڭ مامانداندىرىلعان ۇيىمدارىندا اسكەري دايىندىقتان ءوتۋى ءتيىس.

جەرگىلىكتى اسكەري باسقارۋ ورگاندارى جانىنداعى اسكەري قىزمەتكە قابىلداۋ پۋنكتتەرىنە قازاقستاندىق ارميانىڭ قاتارىن تولىقتىرۋعا نيەت بىلدىرگەندەردىڭ سانى تولاستار ەمەس. ولاردىڭ دەنى ق ر قك ءقا دەسانتتىق-شابۋىلداۋ اسكەرلەرىنىڭ اسكەري بولىمدەرىندە قىزمەت ەتۋگە نيەت بىلدىرەدى.

كەلىسىمشارت نەگىزىندە قىزمەت ەتۋ - اسكەري قىزمەتشىلەردىڭ تۇراقتى لايىقتى جالاقى الۋى، سونداي-اق ءبىرقاتار ارتىقشىلىقتارعا يە بولۋى.