قىرعىزستان پرەزيدەنتى المازبەك اتامبايەۆ 2017 جىلى قاراشانىڭ 15ء-ى «الا-ارچا» مەملەكەتتىك رەزيدەنسياسىندا تۇراقتى دامۋ جونىندەگى ۇلتتىق كەڭەس وتىرىسىندا قازاق-قىرعىز شەكاراسىنداعى احۋال جونىندە سويلەپ، ەشكىمنەن كەشىرىم سۇرامايتىنىن مالىمدەدى. بۇل تۋرالى Qamshy.kz اقپارات اگەنتتىگى ازاتتىققا سىلتەمە جاساپ حابارلايدى.

 - مەن نە ءۇشىن كەشىرىم سۇراۋىم كەرەك؟ قىرعىزستاننىڭ ىشكى ىسىنە ارالاسپاۋدى تالاپ ەتكەنىم ءۇشىن بە؟ قىرعىزستان زاڭدارىن قۇرمەتتەۋدى تالاپ ەتكەنىم ءۇشىن بە؟ ەشكىم بۇدان ارى بىزگە ءوزىنىڭ تارتىپتەرىن ورناتا المايدى، - دەپ مالىمدەدى اتامبايەۆ.

ءسوز سوڭىندا المازبەك اتامبايەۆ قىرعىزستاندىقتارعا قاراتا «2010 جىلعى بلوكادانى دا كورگەنبىز، 2014 جىلعى ەنەرگەتيكالىق بلوكادانى دا كوردىك، بۇل بلوكادان دا وتەرمىز. پرەزيدەنتتەر ەرتە مە، كەش پە - كەتەدى. كەيدە ولار ءوز ەرىكتەرىمەن كەتەدى، كەيدە حالىقتىڭ ەركىمەن كەتەدى، كەيدە قۇدايدىڭ ەركىمەن كەتەدى. ال حالىق قالادى. كورشىنى سىيلاۋ كەرەك، كورشىمەن دوس بولۋ كەرەك» دەدى. ول مۇنان سوڭ شەكاراداعى جاعدايدىڭ قىرعىزستان ينفراقۇرىلىمىن دامىتۋ قاجەت ەكەنىن كورسەتكەنىن ايتتى.

قازان ايىنىڭ 10-ىنان كەيىن قازاقستان قازاق-قىرعىز شەكاراسىندا تەكسەرىس كۇرت كۇشەيتىپ، وسىنىڭ كەسىرىنەن وتكىزۋ پۋنكتتەرىندە جۇك كولىكتەرىنىڭ ۇزاق-سونار كەزەگى پايدا بولعان. تاۋارلارىن قازاقستان شەكاراسىنان وتكىزە الماعان كاسىپكەرلەر شىعىنعا باتقاندارىن مالىمدەگەن.

قازاننىڭ 25-ندە قازاقستان ۇكىمەتى قىرعىزستاننىڭ قىتايدان جاسىرىن تاۋار وتكىزەتىنىن مالىمدەپ، شەكاراداعى ارەكەتىن كونترابانداعا قارسى كۇرەس رەتىندە كورسەتكەن. قىرعىزستان ۇكىمەتى قىتايدان راسىمدەلمەگەن تاۋارلار تاسيتىنىن تەرىسكە شىعارىپ وتىر.

قازاق-قىرعىز شەكاراسىنداعى داۋ ءالى تۇبەگەيلى شەشىلگەن جوق. اتامبايەۆتىڭ "كەشىرىم سۇرامايتىنى" تۋرالى كەيىنگى مالىمدەمەسىنە ازىرگە قازاقستان تاراپىنان قانداي دا ءبىر رەسمي رەاكسيا بىلىنبەيدى.