الماتىدا بۇۇ دامۋ باعدارلاماسىنداعى «تۇراقتى كولىك» جوباسىنىڭ 6 جىلدا كورسەتكەن ناتيجەلەرى جاريالاندى.

جيىن بارىسىندا الماتى اكىمى باۋىرجان بايبەك تۇراقتى كولىك جوباسى اياسىندا اتقارىلعان جۇمىستار تۋرالى ايتىپ بەردى.

«ماعان وكپەلەيتىندەر كوپ. نەگە ۆەلوسيپەدشىلەردىڭ از ەكەنىن بىلە تۇرا، سونشا ۆەلوجول سالدىڭىزدار دەيدى. مەن ايتار ەدىم. الدىمەن جاعداي جاساۋ كەرەك. ەگەر ۆەلوسيپەدپەن ءجۇرۋ ءقاۋىپسىز بولماسا ەشكىم وتىرمايدى. الماتى اكىمدىگى العان باعىتىنان قايتپايدى. ويتكەنى بۇل ناتيجەسىن كورسەتىپ جاتقان جوبا»-  دەدى اكىم.

قالا باسشىسى اقىلى تۇراقتارعا قاتىستى نارازىلىقتان دا حاباردار ەكەنىن ايتتى.

«ادامدار اقىلى تۇراقتار نە ءۇشىن دەپ ايتادى. ەرتەڭگى كۇنى تۋرا وسى ادامدار ەكولوگيا تۋرالى دابىل قاعا باستايدى. جاياۋ جۇرگىنشى  جولدارى، ۆەلوجولدار اقىلى تۇراقتار بارلىعى قالانىڭ ەكولوگيالىق احۋالىن جەڭىلدەتۋگە باعىتتالعان»، - دەدى ب.بايبەك.

ونىڭ ايتۋىنشا قالا اكىمدىگى تۇراقتى كولىك جوباسىن ارى قاراي جالعاستىراتىن بولادى.

اكىم 6 جىلدا جەتكەن ءتيىمدى جەتىستىكتەر تۋرالى دا تىلگە تيەك ەتتى.

«الماتىدا بىرنەشە جىلدا 10 اسا جول ايىرىعى سالىندى. وعان 3 ملرد تەڭگە جۇمسالدى. باكاد جولى 40-60 مىڭ كولىكتى ازايتادى. 1-جەس گازعا كوشتى. كەلەسى جىلى «سامۇرىق ەنەرگو» اق 7 ملرد تەڭگە سالادى. وسىنىڭ ارقاسىندا اۋاعا تارايتىن زياندى زاتتاردى 9 پايىزعا ازايتۋعا بولادى. بۇۇ دامۋ باعدارلاماسىنىڭ ۇسىنىسىمەن جولاۋشىلار تاسىمالى نارىعىن كولەڭكەلى ەكونوميكادان شىعاردىق. 20 تاسىمالداۋشى مۇلدە تابىس جوق دەپ شاعىم ايتاتىن. «وڭاي» ارقىلى نارىق كولەمى 21 ملرد تەڭگە ەكەنىن انىقتادىق. بيۋدجەتكە اشىق بيزنەستەن تازا سالىق تۇسە باستادى. ال كاسىپورىنداردىڭ وزدەرى اۆتوبۋس ساتىپ الۋدا»،- دەدى اكىم.

بۇۇ دامۋ باعدارلاماسىنىڭ قازاقستانداعى تۇراقتى وكىلىنىڭ ورىنباسارى مۋنحتۋيا التانگەرەل الماتىنىڭ كولىك سالاسىنداعى وزگەرىستەردىڭ ەكولوگياعا ىقپالى قانداي بولاتىنىن ايتتى.

«ەگەر الماتىدا تۇراقتى كولىك جوباسى وسىلاي جالعاسا بەرەتىن بولسا اتموسفەراعا تىكەلەي  زياندى زاتتار 500 ملن تونناعا، جاناما  زياندى زاتتار 1 ملن تونناعا قىسقارادى»،- دەدى مۋنحتۋيا التانگەرەل.

ونىڭ ايتۋىنشا، ءقازىر تۇراقتى كولىك جوباسى جايلى شىمكەنت پەن تەمىرتاۋ قالالارى قىزىعۋشىلىق ءبىلدىرىپ وتىر.

ايتا كەتۋ كەرەك،  تۇراقتى كولىك جوباسىن الماتى اكىمدىگى 2011 جىلدان بەرى جۇزەگە اسىرىپ كەلەدى.

نەگىزگى ماقسات قالاداعى كولىكتەردىڭ اۋاعا زياندى زات ءبولۋىن شەكتەۋ ارقىلى ەكولوگيالىق احۋالىن جاقسارتۋ بولىپ تابىلادى.

الماتى تۇراقتى كولىك جوباسى اياسىندا قوعامدىق كولىك سالاسىنا قاتىستى زاڭ جوباسى وزگەرىپ برت جانە لرت جوبالارى جاسالدى، 10 شاقىرىمداي ۆەلوجول جاسالدى. اۆتوبۋستاردىڭ 44 پايىزى گازعا كوشتى.