قازاق ءتىلىن لاتىن الىپبيىنە كوشىرۋ رەفورماسى ەلىمىزدە ءالى دە تالقىلانىپ جاتىر. ەلىمىزدىڭ ءار وڭىرىندە قوعام بەلسەندىلەرى، ۇلت زيالىلارى، ءتىل ماماندارى، جاستار ۇيىمدارى جانە قاراپايىم تۇرعىندارعا دەيىن ءوز ويلارىن ايتىپ، ۇسىنىستارىن جەتكىزۋدە. ءدال وسىلاي ۇسىنىس ايتقان الماتىداعى ازاماتتىق اۆياسيا اكادەمياسىنىڭ جاستارى باس قوسىپ، عىلىمي كونفەرەنسيا وتكىزدى.
«لاتىن ءالىپبيى – مەملەكەتتىك ءتىل تىرەگى» دەپ اتالعان جيىن «مەملەكەتتىك ءتىل – مەنىڭ بولاشاعىم» اتتى اقپاراتتىق ناسيحاتتاۋ شاراسى اياسىندا وتكىزىلىپ وتىر. سونداي-اق، ەل پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان قازاق ءتىلىن لاتىن الىپبيىنە بىرتىندەپ كوشىرۋ جوباسىن تالقىلاۋ ماقساتىندا ستۋدەنت پەن ۇستاز پىكىرىنىڭ باسىن قوستى.
كونفەرەنسيا بارىسىندا اكادەميانىڭ بەلسەندى ستۋدەنتتەرى لاتىن الىپبيىنە كوشۋدىڭ تيىمدىلىگى مەن قاجەتتىلىگىن ايتىپ، ءوز ويلارىن عىلىمي تۇرعىدا دالەلدەۋگە تىرىسىپ جاتتى.
- ەستەرىڭىزدە بولسا، وسىدان بىرنەشە جىل بۇرىن كەز-كەلگەن جاستىڭ سمارتفونىندا «اگەنت» دەگەن الەۋمەتتىك مەسسەندجەر بولدى. سول جەلىنىڭ كەڭ قولدانىستا بولعان ۋاقىتىندا بارلىعى دەرلىك لاتىن قارپىمەن حات الماساتىن. ياعني، بۇگىنگىدەي تەحنولوگيا ونىمدەرىنىڭ قارىشتاپ دامىعان ۋاقىتىنان بۇرىن دا لاتىن ءارپىن قولدانۋ بار بولاتىن. سوندىقتان، لاتىن ءالىپبيىن قولدانىستا ەركىن بولۋى اسا ۇلكەن قيىندىق تۋدىرمايدى دەپ ويلايمىن. «زامانىنا قاراپ بوركىڭدى كي» - دەگەندەي، بۇل جاڭاشىلدىقتى قولداپ، تەزىرەك قولدانىسقا ەنگىزۋدى ۇسىنعان دۇرىس سەكىلدى، - دەيدى ازاماتتىق اۆياسيا اكادەمياسىنىڭ ستۋدەنتى جانبولات زاكىروۆ.
جيىن بارىسىندا جاستار تىلگە قاتىستى اندەر مەن جىر جولدارىن دا ايتۋدى ءجون كوردى. كاكىمبەك سالىقوۆتىڭ «ءتىلىڭدى قورعا قازاعىم» اتتى ولەڭ شۋماعىن وقىعان ستۋدەنتتىڭ ورىنداۋى دا ءتىپتى تاقىرىپتى اشا ءتۇسىپ، قاتىسۋشىلاردىڭ رۋحىن وياتقانداي بولدى.
- ەلىمىز ءۇشىن لاتىن قارپىنە كوشۋ قاي جاعىنان الىپ قاراساق تا قولايلى. ءبىز نەگىزىنەن احمەت بايتۇرسىنوۆ ايتقان نۇسقانى الىپ وتىرمىز. ءالى دە وزگەرىستەر بولادى. قاتاڭ، ۇياڭ دىبىستاردى ءتۇسىنىپ وقۋ، حالىققا ىڭعايلى بولۋ ءۇشىن ارنايى كوميسسيا قۇرىلدى. وعان قوسا حالىق اراسىندا ورىستاردىڭ جانە باسقا وزگە ۇلتتار وكىلدەرىنىڭ ءتىل سىندىرىپ قازاقشا ۇيرەنۋىنە جول اشادى – دەيدى قازاقستان تاريحى جانە الەۋمەتتىك-گۋمانيتارلىق پاندەر كافەدراسىنىڭ مەڭگەرۋشىسى بولاتبەك شوكەنوۆ.
شارا كەزىندە ازاماتتىق اۆياسيا جاستارىنىڭ لاتىن ارپىنە كوشۋدى تولىعىمەن قولدايتىندىعى تۋرالى شاعىن بەينەروليك كورسەتىلدى.
- لاتىن الىپبيىنە كوشۋ، انا ءتىلىمىزدىڭ بولاشاعىن ويلاپ، قولدانىس اياسىن ودان ءارى كەڭەيتە تۇسۋگە مۇمكىندىك جاساپ قانا قويماي، ونى وسى زامانعى اقپاراتتىڭ تىلىنە اينالدىرادى. ءارى لاتىن ءقارپى قازاق ەلىن الەم مەملەكەتتەرىمەن جاقىنداستىرىپ، جارقىن بولاشاققا باستايدى دەپ ۇمىتتەنەمىز. سوندىقتان، قازاق ءالفاۆيتىن 2025 جىلعا قاراي لاتىن گرافيكاسىنا كوشىرۋگە دايىندىق جۇمىسىن وسى باستان باستايىق دەپ ازاماتتىق اۆياسيا اكادەميا ستۋدەنتتەرى مەن ۇجىمى وسى شارانى وتكىزىپ وتىر – دەيدى وقىتۋشى اشىرگۇل سەيدىلدايەۆا.
جيىن سوڭى ستۋدەنت جاستاردىڭ «كوك تۋدىڭ جەلبىرەگەنى» ءانىن بىرگە شىرقاۋىمەن اياقتالدى.
