2017 جىلدىڭ 29 قاراشاسى كۇنى ساعات 16. 00-دە شىعىس قازاقستان ونەر مۋزەيىندە نيكولاي پاۆلوۆيچ اشتەمانىڭ «مەنىڭ وتانىم - قازاقستان» اتتى مەرەيتويلىق جەكە كورمەسىنىڭ اشىلۋ سالتاناتى وتەدى، — دەپ حابارلايدى Qamshy.kz اقپارات اگەنتتىگى شىعىس قازاقستان ونەر مۋزەيىنىڭ باسپا ءسوز قىزمەتىنە سىلتەمە جاساي وتىرىپ. كورمە قازاقستان رەسپۋبليكاسىنىڭ تۇڭعىش پرەزيدەنتى كۇنىنە ارنالادى.    

وسكەمەن سۋرەتشىلەرىنىڭ اراسىندا نيكولاي پاۆلوۆيچ اشتەمانىڭ ەسىمى ەرەكشە جانە لايىقتى قۇرمەتكە يە. ول – مەتر، كاسىپقوي، قازاقستان سۋرەتشىلەر وداعىنىڭ مۇشەسى، شىعارماشىلىق توقىراۋ دەگەننىڭ نە ەكەندىگىن بىلمەيتىن كەسكىندەمەشى جانە گرافيك. 1986 جىلى ن.پ.اشتەما باكۋدە وتكەن «كاسپيي ماڭى رەسپۋبليكالارىنىڭ بيەننالەسى» حالىقارالىق بايقاۋىنىڭ لاۋرەاتى اتانادى، ال 1986 جانە 1987 جىلدارى ونىڭ جۇمىستارى ماسكەۋدە وتكەن كورمەگە قويىلادى. 1991 جىلى ونىڭ كارتينالارى حاركوۆتە وتكەن حالىقارالىق گرافيكا جانە پلاكاتتار كورمەسىندە، 1993 جىلى تورونتوداعى مينياتيۋرالار كورمەسىندە اتاپ وتىلەدى. 1987 جىلى نيكولاي ءپاۆلوۆيچتى كسرو سۋرەتشىلەر وداعىنىڭ مۇشەلىگىنە قابىلدايدى. سودان بەرى ونىڭ ءومىر جولىندا قانشاما كورمەلەر بولدى دەسەڭىزشى! تەك الماتىدا عانا جيىرمادان استام كورمەدە ەكسپوزيسيالارى كورسەتىلدى. 2003 جىلى ول شىعىسقازاقستاندىقتار اراسىندا ءبىرىنشى بولىپ پرەزيدەنتتىك مادەني ورتالىعىندا (استانا) ءوزىنىڭ جەكە كورمەسىن اشتى. جالپى، قىلقالام شەبەرى ءوزىنىڭ ءاربىر مەرەيتويىن جەكە سۋرەت كورمەسىن وتكىزۋمەن اتاپ ءوتىپ كەلەدى. بيىلعى كورمەسى سۋرەتشىنىڭ جەتپىس بەس جاسقا تولۋىنا ارنالىپ وتىر. ءوزىنىڭ دۇنيەتانىمى مەن شىعارماشىلىق ولشەمىن كورسەتەتىن بۇل كورمەسىن سۋرەتشى «مەنىڭ وتانىم – قازاقستان» دەپ اتادى. وسى ورايدا، بۇل كورمەنىڭ تۇڭعىش پرەزيدەنت كۇنىنە ارنالىپ وتىرۋىنىڭ ءوزى كەزدەيسوقتىق ەمەس ەكەندىگىن، ەكسپوزيسيانىڭ  كورمە مازمۇنىنا سايكەس كەلەتىنىن ايتا كەتۋ كەرەك.  ەلىمىزدىڭ بۇكىل قوعامدىق جانە ساياسي ءومىرىنىڭ رەفورماتورى رەتىندەگى مەملەكەت باسشىسىنىڭ وبرازى كوپتەگەن جىلداردان بەرى سۋرەتشىنى تولعاندىرىپ كەلەدى، ال ن.ءا.نازاربايەۆتىڭ پورترەتىن ول بىرنەشە رەت سالىپ، وقتىن-وقتىن تۇزەتۋلەر ەنگىزىپ وتىردى.

 نيكولاي پاۆلوۆيچ اشتەما – ۋكراينانىڭ تۋماسى. ول 1942 جىلى 5-جەلتوقساندا كيروۆوگراد وبلىسىنىڭ چەرۆوننايا دولينا سەلوسىندا تۋعانىمەن، سۋرەتشىنىڭ بۇكىل شىعارماشىلىق عۇمىرى قازاقستانمەن بايلانىستى. 1979 جىلى ول الماتىداعى ن.ۆ.گوگول اتىنداعى كوركەمسۋرەت ۋچيليششەسىن ءبىتىرىپ، وسكەمەن قالاسىنا كەلەدى. وسىنداعى كوركەمسۋرەت-ونەركاسىپتىك شەبەرحانالارىندا ل. اگەيكين، پ. شيشوۆ، ۆ. راپوپورت، ب. فرانسۋزوۆ، گ. مەرقاسيموۆ سىندى قىلقالام شەبەرلەرىمەن بىرگە جۇمىس ىستەگەن. 1980 جىلدان قازىرگە دەيىن ول ەرەسەكتەرگە ارنالعان بەينەلەۋ ونەرى ستۋدياسىنا جەتەكشىلىك ەتەدى. نيكولاي پاۆلوۆيچ د.سەرىكبايەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ، شىعىس گۋمانيتارلىق ينستيتۋتىنىڭ، شىعىس قازاقستان ايماقتىق ۋنيۆەرسيتەتىنىڭ ستۋدەنتتەرىنە سۋرەت جانە كەسكىندەمەدەن ساباق بەرگەن.

  بۇل كورمە – سۋرەتشىنىڭ كوپجىلدىق شىعارماشىلىق جانە پەداگوگيكالىق قىزمەتىنىڭ قورىتىندىسى. ءۇش زالدا ءار جانرداعى كەسكىندەمە جانە گرافيكالىق جۇمىستارى ورنالاسقان. سىزدەر پورترەتتەر، پەيزاجدار، ناتيۋرمورتتار، سيۋجەتتىك سۋرەتتەردى تاماشالاي الاسىزدار. ولاردىڭ كوپشىلىگى العاش رەت قويىلىپ وتىر. سۋرەتشى ءالى كۇنگە دەيىن باسپا ستانوگى مەن ليتوگرافيا، وفورت، مەسسوتينتو سياقتى باسپا گرافيكاسىنىڭ كونە تاسىلدەرى مەن قۇپيالارىن ساقتاپ كەلەدى. گۋاش – ونىڭ پلەنەردەگى جۇمىس كەزىندە قولداناتىن سۇيىكتى تەحنيكاسى. سۋرەتشىنىڭ اكۆارەلى مەن پاستەلىنىڭ ايقىندىعى مەن كوركەمدىگى ونىڭ مايلى بوياۋىنىڭ ساپاسىنان ەشبىر كەم ەمەس. ن.پ.اشتەمانىڭ كەزكەلگەن جانرداعى شىعارمالارى وتە جوعارى، مۋزەيلىك دەڭگەيدە سالىنعان. الايدا، وعان ناعىز تانىمالدىلىقتى ونىڭ پاتريوتتىق تاقىرىپتاعى جانرلىق كارتينالارى اكەلدى. قازاق حاندىعىنىڭ 550 جىلدىعىنا ارنالعان  رەسپۋبليكالىق گرافيكتەر بايقاۋىندا ءبىرىنشى ورىن العان سول كارتينالارى ءۇشىن سۋرەتشى ۇكىمەتتىك ناگرادالارمەن - «ق ر سۋرەتشىلەر وداعىنىڭ 80-جىلدىعى» مەدالى مەن ءابىلحان قاستەيەۆ اتىنداعى مەدالمەن ماراپاتتالدى. كورمەدە سىزدەر، اتى اڭىزعا اينالعان توميريس زامانىنان بۇگىنگە دەيىنگى تاۋەلسىز قازاقستاننىڭ تاريحىن كورە الاسىزدار!

ءبىزدىڭ سۋرەتشىگە كلاسسيكالىق تۇرعىدان جەتپىس بەس جاس دەگەنىڭىز ءتىپتى ۇيلەسپەيتىن سياقتى. ونىڭ ومىرگە دەگەن قىزىعۋشىلىعى مەن ەڭبەكسۇيگىشتىگى، شىندىعىندا، جاسوسپىرىمدىكىندەي. پلەنەردە تاۋ-تاستا جۇگىرىپ ءجۇرۋ، شابىتى كەلگەندە ءتۇنى بويى جۇمىس ىستەۋ – نيكولاي پاۆلوۆيچتىڭ ۇيرەنشىكتى ءومىر سالتى. بارلىق ەكونوميكالىق، ساياسي جانە ىشكى داعدارىستارىن ءوز شەبەرحاناسىندا، كەنەپ-بوياۋلارىنىڭ جانىندا وتكىزەدى. ول ۇنەمى شاكىرتتەرىنىڭ ورتاسىندا. ونىڭ زەينەتكەر زامانداستارىمەن بىرگە اڭگىمە سوعىپ، ساكىدە وتىرعانىن ەلەستەتۋ ءتىپتى مۇمكىن ەمەس، مەيلى، ءاردايىم سولاي بولعاي! ناعىز سۋرەتشىنىڭ  ومىرىندە «قۇرمەتتى دەمالىس» دەگەن ۇعىم بولمايدى.