قازاقستانداعى كونستيتۋسيالىق رەفورما تەك ساياسي جۇيەنى جاڭعىرتۋعا عانا ەمەس، سونىمەن قاتار ەلدىڭ ۇزاق مەرزىمدى دامۋىنىڭ نەگىزگى رەسۋرسى رەتىندە ادامي كاپيتالدىڭ ءرولىن كۇشەيتۋگە باعىتتالعان. بۇل تۋرالى Diplomatic World Institute جوبالار ديرەكتورى البەرتو تۋركسترا قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى (قسزي) مەن Maqsut Narikbayev University (MNU) بىرلەسىپ ۇيىمداستىرعان «قازاقستاننىڭ جاڭا كونستيتۋسيالىق مودەلى: ورنىقتى ءارى زاماناۋي مەملەكەت جولىندا» اتتى حالىقارالىق ساراپشىلار دوڭگەلەك ۇستەلىندە مالىمدەدى.

ساراپشىنىڭ ايتۋىنشا، ۇسىنىلىپ وتىرعان كونستيتۋسيالىق رەفورما مەملەكەتتەگى ساياسي جانە قۇقىقتىق ارحيتەكتۋرانى جاڭعىرتۋعا باعىتتالعان كەشەندى باستاما بولىپ تابىلادى جانە ول وزگەرىپ جاتقان ەكونوميكالىق، الەۋمەتتىك جانە ساياسي جاعدايلاردى ەسكەرەدى.

تۋركسترا رەفورمانىڭ جەكەلەگەن ينستيتۋسيونالدىق وزگەرىستەرمەن عانا شەكتەلمەيتىنىن اتاپ ءوتتى. ول مەملەكەتتىك ينستيتۋتتاردىڭ تيىمدىلىگىن ارتتىرۋعا جانە ءبىر مەزگىلدە ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋگە باعىتتالعان كەڭ اۋقىمدى نەگىز قالىپتاستىرادى.

«رەفورما ەكى ماقساتتى كوزدەيدى: مەملەكەتتىڭ ءتيىمدى جۇمىس ىستەۋىن ارتتىرۋ جانە كونستيتۋسيالىق جۇيەدە ازاماتتاردىڭ ورتالىق ءرولىن نىعايتۋ»، – دەپ اتاپ ءوتتى ول.

ساراپشى جاڭا كونستيتۋسيالىق مودەلدە الەۋمەتتىك مەملەكەت تۇجىرىمداماسىنىڭ بەكىتىلۋىنە ەرەكشە نازار اۋداردى، ونىڭ اياسىندا ادام دامۋى مەملەكەتتىك ساياساتتىڭ نەگىزگى ماقساتى رەتىندە قاراستىرىلادى.

ونىڭ ايتۋىنشا، كونستيتۋسيالىق نەگىز قازاقستاننىڭ دامۋىنداعى كەڭ اۋقىمدى ستراتەگيالىق وزگەرىستى كورسەتەدى - نەگىزىنەن ەكونوميكالىق وسىمگە باعىتتالعان مودەلدەن ازاماتتاردىڭ ءال-اۋقاتى، مۇمكىندىكتەرى مەن قابىلەتتەرى باستى باسىمدىققا اينالاتىن مودەلگە كوشۋ.

وسى تۇرعىدا، تۋركسترا اتاپ وتكەندەي، جاڭا كونستيتۋسيا ادام ءومىرى، ونىڭ قادىر-قاسيەتى، قۇقىقتارى مەن بوستاندىقتارى مەملەكەتتىڭ ەڭ جوعارى قۇندىلىقتارى بولىپ تابىلاتىن قاعيداتتى راستايدى جانە مەملەكەتتىك ساياساتتىڭ ادامعا باعىتتالعان سيپاتىن قالىپتاستىرادى.