الماتى وبلىسىنىڭ اكىمى مارات سۇلتانعازييەۆ ناۋرىز مەرەكەسى قارساڭىندا قونايەۆ قالاسىنداعى بالالاردى قولداۋ ورتالىعىنا ارنايى بارىپ، تاربيەلەنۋشىلەرمەن جۇزدەستى. ايماق باسشىسى بالالارمەن بىرگە اعاش كوشەتتەرىن وتىرعىزىپ، تابيعاتتى ايالاۋعا شاقىردى. ۇلىستىڭ ۇلى كۇنىمەن قۇتتىقتاپ، بالالار مەن تاربيەشىلەرگە ىزگى تىلەگىن ارنادى.
«قىمباتتى بالالار! بۇگىنگى ءبىلىمدى، زەرەك، ىزدەنىمپاز بالالار – ەرتەڭگى ەلدىڭ تىرەگى. ءقازىر بىلەككە ەمەس، بىلىمگە سەنەتىن زامان. سوندىقتان ۋاقىتتى ءتيىمدى پايدالانىپ، جاقسى وقىپ، زاماناۋي تەحنولوگيالاردى مەڭگەرۋگە تالپىنعان ءجون. مەملەكەت تاراپىنان، سونىڭ ىشىندە الماتى وبلىسىنىڭ اكىمدىگى تاراپىنان سەندەردىڭ ساپالى ءبىلىم الۋلارىڭا، سپورتپەن اينالىسىپ، ونەر مەن شىعارماشىلىققا بەيىمدەلۋگە بارلىق جاعداي جاسالۋدا. ءبىزدىڭ باستى تىلەگىمىز - سەندەردىڭ قاناتتارىڭ قاتايىپ، ۇلكەن ازامات بولىپ وسكەندەرىڭدى كورۋ. ارالارىڭنان ەل نامىسىن قورعايتىن چەمپيوندار، وزىق ويلى عالىمدار مەن حالقىنا ادال قىزمەت ەتەتىن تۇلعالار شىعاتىنىنا مەن كامىل سەنەمىن. ەلىمىزدىڭ ەرتەڭى - سەندەردىڭ قولدارىڭدا.
قادىرمەندى تاربيەشىلەر! سىزدەردىڭ كاسىبي بىلىكتىلىكتەرىڭىز بەن ازاماتتىق ۇستانىمدارىڭىز ءۇشىن العىس ايتامىن. جاستاردىڭ بويىنا ۇلتتىق قۇندىلىقتاردى ءسىڭىرىپ، ولاردى وتانشىلدىققا تاربيەلەۋ جولىنداعى ەڭبەكتەرىڭىز – ەلىمىزدىڭ باياندى بولاشاعىن قالىپتاستىرۋعا قوسىلعان ۇلكەن ۇلەس»، – دەدى مارات ەلەۋسىز ۇلى.
مەرەكەگە وراي ۇلتتىق ناقىشتا بەزەندىرىلگەن ورتالىق الدىندا تاربيەلەنۋشىلەر ءوز ونەرلەرىن ورتاعا سالىپ، تەاترلاندىرىلعان قويىلىم كورسەتتى.
شارا بارىسىندا تانىمال بالمۇزداق ءوندىرۋشى – «شين-لاين» كومپانياسىنىڭ تاتتىلەرى تاراتىلدى. كومپانيا باسشىسى اندرەي شين بالالاردى ءتاتتى بالمۇزداقتار قالاي دايىندالاتىنىن كورىپ، ءوندىرىس جۇمىسىمەن تانىسۋعا شاقىردى. سونداي-اق اي سايىن ورتالىققا بالمۇزداق اكەلىپ تۇرامىن دەگەن ۋادەسىن بەردى. اكىمدىك تاراپىنان جاس ەرەكشەلىگىنە قاراي كىتاپتار سىيعا تارتىلىپ، ورتالىققا مۋزىكالىق قۇرال-جابدىقتار بەرىلدى.
مارات ەلەۋسىز ۇلى بالالارمەن پودكاست فورماتىندا اڭگىمە ءوربىتىپ، ولاردىڭ قويعان سۇراقتارىنا جاۋاپ بەردى.
ورتالىق تاربيەلەنۋشىسى ۆيتاليي كورشيەۆ: «بۇگىن ءبىزدىڭ ۇيدە ناۋرىز مەرەكەسى تويلاندى. ءان شىرقاپ، بي بيلەپ، ءتاتتى بالمۇزداقتان دا ءدام تاتتىق. وسىنداي مۇمكىندىك بەرگەن جاندارعا راقمەت»، – دەگەن لەبىزىن ءبىلدىردى.
الماتى وبلىسىنىڭ بالا قۇقىقتارى جونىندەگى ۋاكىلى ايگۇل ەسىمبەكوۆا وڭىردەگى ءاربىر بالانىڭ قۇقىعى مەن قاۋىپسىزدىگى باقىلاۋدا ەكەنىن ايتتى.
«قانداي دا ءبىر كۇردەلى ماسەلەلەر، ومىرلىك قيىن ساتتەر تۋىنداعان جاعدايدا جەدەل كومەك كورسەتەمىز. اسىرەسە وسى قونايەۆ قالاسىنداعى بالالاردى قولداۋ ورتالىعى ەرەكشە نازارىمىزدا. مۇندا ءجيى كەلىپ تۇرامىن. تاربيەلەنۋشىلەردىڭ ءارقايسىسىن جەكە تانيمىن. مۇندا وتە جاقسى جاعداي جاسالعان. ولارمەن بىلىكتى ماماندار جۇمىس ىستەيدى. باستاپقىدا مىنەزى تۇيىق، كوپشىلىك اراسىندا قىسىلاتىن بالالار ءقازىر اشىلىپ، ءوزىن ەركىن سەزىنەتىن بولعان. ءتۇرلى باعىتتاعى ءىس-شارالار جوعارى دەڭگەيدە ۇيىمداستىرىلىپ، وعان بالالار ۇلكەن ىقىلاسپەن قاتىسادى. وسى ورايدا وبلىس اكىمدىگىنە ەرەكشە العىسىمدى بىلدىرەمىن. مارات ەلەۋسىز ۇلى ۇنەمى كەزدەسۋ وتكىزىپ، بالالاردىڭ ساپالى ءبىلىم الىپ، جان-جاقتى دامۋىنا ەرەكشە كوڭىل بولەدى»، – دەدى ايگۇل قانات قىزى.
وسىلايشا شۋاقتى كوكتەمنىڭ جىلۋىن الا كەلگەن ءاز-ناۋرىزدا بالالاردىڭ جۇرەگىنە دە مەيىرىم شۋاعى قۇيىلىپ، شاتتىققا كەنەلدى.
