ەۋروپا مەن جۇڭگو اراسىنداعى قارىم-قاتىناس تاعى دا كۇردەلەنە ءتۇستى. جۇڭگو بيلىگى ءبىرقاتار ەۋروپالىق ەلدەرگە تايۆاننىڭ جوعارى لاۋازىمدى ساياساتكەرلەرىنە ۆيزا بەرمەۋ جونىندە ەسكەرتۋ جاساعان. بۇل تۋرالى ديپلوماتيالىق دەرەككوزدەر حابارلادى.
اقپاراتقا سايكەس، 2025 جىلدىڭ قاراشا–جەلتوقسان ايلارىندا قىتايدىڭ رەسمي وكىلدەرى ەۋروپانىڭ بەيجىڭدەگى ەلشىلىكتەرىنە جانە تىكەلەي ەۋروپا استانالارىنداعى ۇكىمەتتەرگە ديپلوماتيالىق نوتالار جولداعان. وندا تايۆان وكىلدەرىن قابىلداۋ قىتايدىڭ «قىزىل سىزىعىن» بۇزۋ دەپ باعالاناتىنى ايتىلعان.
جۇڭگو تاراپى ەۋرووداقتىڭ شەكارالىق زاڭدارىنا سۇيەنە وتىرىپ، تايۆان ساياساتكەرلەرىنىڭ ەۋروپاعا كەلۋى ەو ەلدەرىنىڭ قىتايمەن حالىقارالىق قاتىناستارىنا ءقاۋىپ ءتوندىرۋى مۇمكىن دەگەن ءۋاج كەلتىرگەن. اتاپ ايتقاندا، شەنگەن ايماعىنا كىرۋ ەرەجەلەرى مىسالعا الىنعان.
بەيجىڭ بۇل ارەكەتتەرىن تايۆاننىڭ ۆيسە-پرەزيدەنتى، سىرتقى ىستەر ءمينيسترى جانە بۇرىنعى پرەزيدەنتىنىڭ ەۋروپاعا جاساعان ساپارلارىمەن بايلانىستىرعان. جۇڭگو بۇل ساپارلار جۇڭگو–ەۋرووداق قاتىناستارىنا زيان كەلتىرەدى دەپ سانايدى.
الايدا تايۆان بيلىگى قىتايدىڭ بۇل تالاپتارىن زاڭسىز جانە نەگىزسىز دەپ اتادى. تايبەيدىڭ مالىمدەۋىنشە، تايۆان وكىلدەرىنىڭ ەۋروپاعا ساپارلارى قىتايعا قاتىسى جوق جانە بەيجىڭنىڭ ارالاسۋعا ەشقانداي قۇقىعى جوق.
ەۋروپانىڭ كەيبىر ەلدەرى قىتايدىڭ ەسكەرتۋلەرىن العانىن راستاعانىمەن، ۆيزالىق ساياسات ءار مەملەكەتتىڭ ىشكى زاڭدارى مەن شەنگەن ايماعىنىڭ ورتاق ەرەجەلەرى ارقىلى شەشىلەتىنىن اتاپ ءوتتى.
ساراپشىلار بۇل جاعدايدى قىتايدىڭ تايۆاندى حالىقارالىق دەڭگەيدە وقشاۋلاۋ ستراتەگياسىنىڭ ءبىر بولىگى دەپ باعالاپ وتىر. بەيجىڭ تايۆانمەن كەز كەلگەن رەسمي بايلانىستى السىرەتۋگە تىرىسىپ، ەۋروپا ەلدەرىنە ساياسي قىسىمدى كۇشەيتىپ كەلەدى.
ەۋرووداق رەسمي تۇردە تايۆاننىڭ مارتەبەسىنە قاتىستى بەيتاراپ ۇستانىمدا بولعانىمەن، سوڭعى جىلدارى تايۆانمەن ساۋدا جانە پارلامەنتتىك بايلانىستاردى دامىتىپ كەلەدى. بۇل ءوز كەزەگىندە قىتايدىڭ نارازىلىعىن كۇشەيتكەن.
