ماڭعىستاۋ وبلىسىندا رەسپۋبليكالىق رەفەرەندۋم وتكەن كۇنى كوپبالالى وتباسىلاردىڭ بىرىندە ۇل بالا دۇنيەگە كەلىپ، وعان اتازان ەسىمى بەرىلدى.
نارەستە – وتباسىنداعى توعىزىنشى پەرزەنت. ۇل بالا 4130 گرامم سالماقپەن، 57 سانتيمەتر بويمەن ومىرگە كەلدى. دارىگەرلەردىڭ ايتۋىنشا، اناسى مەن ءسابيدىڭ جاعدايى جاقسى، وزدەرىن قالىپتى سەزىنەدى جانە مامانداردىڭ باقىلاۋىندا.
بالانىڭ ءدال وسى كۇنى دۇنيەگە كەلۋى وتباسى ءۇشىن ەرەكشە ءارى سيمۆوليكالىق وقيعا بولدى.
«ۇلىمىز ەل ءۇشىن ماڭىزدى كۇنى دۇنيەگە كەلدى. سول سەبەپتى بۇل كۇن وتباسىمىزدىڭ تاريحىندا ماڭگى ساقتالسىن دەپ وعان اتازان دەپ ات قويدىق. بولاشاقتا ەلىن سۇيەتىن، وتانعا پايداسىن تيگىزەتىن ازامات بولىپ وسسە دەيمىز»، – دەدى نارەستەنىڭ اناسى.
اتا-اناسىنىڭ ايتۋىنشا، ۇلدارىنىڭ ەل ءۇشىن ماڭىزدى كۇنى دۇنيەگە كەلۋى ولار ءۇشىن ۇلكەن قۋانىش ءارى ءومىر بويى ەستە قالاتىن ءسات بولعان.
پەرزەنتحانا دارىگەرلەرى اتا-انانى قۋانىشتى جاڭالىقپەن قۇتتىقتاپ، سابيگە مىقتى دەنساۋلىق، اماندىق جانە باقىتتى بالالىق شاق تىلەدى. مەديسينا قىزمەتكەرلەرى دەنى ساۋ بالانىڭ دۇنيەگە كەلۋى – ءاردايىم وتباسى ءۇشىن دە، دارىگەرلەر ءۇشىن دە ۇلكەن قۋانىش ەكەنىن اتاپ ءوتتى.
ايتا كەتەيىك، ماڭعىستاۋ وبلىسىندا انا مەن بالانى قولداۋعا ەرەكشە كوڭىل بولىنەدى. وڭىردە كوپبالالى وتباسىلارعا ءومىر ساپاسىن ارتتىرۋعا جانە بالالاردىڭ ءال-اۋقاتىن جاقسارتۋعا باعىتتالعان ءتۇرلى الەۋمەتتىك قولداۋ شارالارى قاراستىرىلعان.
كىشكەنتاي اتازاننىڭ دۇنيەگە كەلۋى وتباسى ءۇشىن تاعى ءبىر قۋانىشتى وقيعا بولىپ، ەل ومىرىندەگى ماڭىزدى قوعامدىق-ساياسي كۇندە باستالعان جاڭا ءومىردىڭ سيمۆولىنا اينالدى. تۋىستارى مەن جاقىندارى اتا-انانى قۋانىشىمەن قۇتتىقتاپ، سابيگە باقىتتى ءارى جارقىن بولاشاق تىلەدى.
