وقيعانى سالتاناتتى تۇردە تىركەۋ ءراسىمى تۇڭعىش پرەزيدەنت ساياباعىنداعى مەرەكەلىك كونسەرت باستالار الدىندا ءوتتى.
ساياباقتىڭ قاق ورتاسىنا ورناتىلعان بيىكتىگى 11 مەتردەن اساتىن، ديامەترى 20 مەتردەن اساتىن شاڭىراق Global Best of Records الەمدىك رەكوردتار كىتابىنا ەنگىزىلدى. وسى وقيعاعا ارنايى ۇزىندىعى 100 مەتردەن اساتىن سىرلى سىرماق دايىندالدى.

ازيا جانە افريكا ەلدەرى بويىنشا رەكوردتتى تىركەۋ ءبولىمىنىڭ باس وفيسەرى قۋاندىق قۇدايبەرگەنوۆ تىركەۋ ءراسىمىن جۇرگىزىپ، سەرتيفيكاتتى الماتى قالاسى بوستاندىق اۋدانىنىڭ اكىمى ازامات قالدىبەكوۆكە سالتاناتتى تۇردە تابىستادى.

كوپتەگەن الماتىلىقتار مەن مەگاپوليس قوناقتارى كۋا بولعان ءىس-شارا بارىسىندا ۇلتتىق كيىم كيگەن ايەلدەر الىپ شاڭىراقتىڭ استىنا توقىلعان سىرلى سىرماقتى جايىپ شىقتى.

بۇل كورىنىس كورەرمەندەردىڭ ەرەكشە قىزىعۋشىلىعىن تۋدىردى — كوپتەگەن قوناقتار اۋقىمدى كومپوزيسيا اياسىندا سۋرەتكە ءتۇسىپ، بەينەجازبا جاسادى.

وقيعانىڭ ماڭىزى تۋرالى قۋاندىق قۇدايبەرگەنوۆ ايتىپ ءوتتى.
«Global Best of Records رەكوردتار كىتابى — گيننەستىڭ رەكوردتار كىتابىمەن قاتار الەمگە تانىمال حالىقارالىق رەەسترلەردىڭ ءبىرى. ءبىزدىڭ كىتاپ الەمدەگى ەڭ ءىرى جيناقتاردىڭ قاتارىنا كىرەدى جانە 89 ەلدى بىرىكتىرەدى»، – دەدى ول.

كونسەرتتىك باعدارلاما اياسىندا ازيا جانە افريكا ەلدەرى بويىنشا رەكوردتتى تىركەۋ ءبولىمىنىڭ باس وفيسەرى رەكوردتىق كولەمدەگى سىرلى سىرماقتى ازىرلەگەن شەبەرلەر توبىنا دا ماراپات تابىستادى.

بۇل وقيعا ۇلتتىق ونەر مەن قازاقستاندىق شەبەرلەردىڭ ءتول قولتاڭباسىن ايقىن تانىتقان جارقىن بەلەسكە اينالدى.