ءال-فارابي اتىنداعى قازاق ۇلتتىق ۋنيۆەرسيتەتىندە «نازاربايەۆ مودەلى» عىلىمي كونفەرەنسياسى ءوتتى. كونفەرەنسيا ق ر تۇڭعىش پرەزيدەنتى - ەلباسى كىتاپحاناسىنىڭ «ن.نازاربايەۆ: ءداۋىر، تۇلعا، قوعام» كوشپەلى ءبىلىم بەرۋ جانە مادەني-اعارتۋشىلىق كورمە جوباسى اياسىندا ۇيىمداستىرىلدى.

اتالمىش كوفەرەنسيا بارىسىندا «نازاربايەۆ مودەلى» كىتابىنىڭ قازاق تىلىندەگى نۇسقاسىنىڭ تۇساۋى كەسىلدى. اۆتورلاردىڭ ايتۋىنشا، كىتاپتا وقيعالاردى تالداۋ بارىسىندا زاماناۋي باسقارۋ مەكتەبىندە كوپشىلىككە تانىمال «كەيس ادىستەمەسى» ءبىرىنشى رەت كەڭىنەن قولدانىلعان. 1921 جىلى گارۆارد ۋنيۆەرسيتەتىنىڭ بيزنەس-مەكتەبىندە ازىرلەنگەن كەيس - ساياسي، ەكونوميكالىق، الەۋمەتتىك ومىردەگى ناقتى پروبلەمالاردى تالداۋ جانە تاجىريبەلىك باسقارۋ شەشىمدەرىن دايىنداۋعا باعىتتالعان ينتەراكتيۆتىك وقىتۋ تەحنيكاسى. ياعني، كىتاپتا قازاقستاندىق كۇرە جولدىڭ نەگىزىن قالاعان ەلىمىزدىڭ تۇڭعىش پرەزيدەنتىنىڭ باسقارۋ شەشىمدەرى ياكي الگوريتمدەرى ناقتى وقيعالارمەن جانە مىسالدارمەن اشىلادى. كىتاپ عالىمدار، ساياساتتانۋشىلاردان باستاپ مەكتەپ وقۋشىسىنا دەيىن تۇسىنىكتى ءارى قىزىقتى بولماق دەيدى ماماندار.

كوفەرەنسيانىڭ اشىلۋىندا ءسوز سويلەگەن الماتى اكىمىنىڭ ورىنباسارى «نازاربايەۆ مودەلىنىڭ» ەرەكشەلىگىنە توقتالدى.

«نازاربايەۆ مودەلى» دەگەندە ەڭ الدىمەن، كونفەسسياارالىق، ىشكى ساياساتى، تۇراقتىلىقتى ايتامىز. ەكىنشىدەن، وسى ىشكى ساياسي تۇراقتىلىق ەلىمىزگە، ەلباسىنا وتە قارقىندى تۇردە ساياسي، ەكونوميكالىق رەفورمالار جۇرگىزۋگە مۇمكىندىك بەردى. ۇشىنشىدەن، مەنىڭ ويىمشا «نازاربايەۆ مودەلىنىڭ» ەرەكشەلىگى وتە جاۋاپتى سىرتقى ساياساتتى جۇرگىزۋىندە. 25 جىل ىشىندە بىردە ءبىر مەملەكەتپەن كيكىلجىڭگە كەلگەن ەمەسپىز. استانا ەلباسىنىڭ باستى مەگاجوباسى»، - دەپ اتاپ ءوتتى قىرىقبايەۆ.

ونىڭ ايتۋىنشا، ءبىز استانامىزدى اۋىستىرعان جەر بەتىندەگى ساۋساقپەن سانارلىق مەملەكەتتەردىڭ قاتارىندامىز. ول، استانا – ەلباسىنىڭ باستى جانە بىرەگەي جوباسى ەكەندىگىن اتاپ ءوتتى.

«مەنىڭ ويىمشا، 25 جىلدا قازاقستاننىڭ دامۋىن ايقىنداعان مەگا جوبا وسى - استانا قالاسىنىڭ سالىنۋى. سونىمەن قاتار، ءبىز مادەنيەتىمىزدى دە تۇگەندەدىك. «مادەني مۇرا» سىندى ۇلكەن جوبالار جۇزەگە استى. «رۋحاني جاڭعىرۋ» باعدارلاماسىنا ءبارىمىز ات سالىسىپ جاتىرمىز»، - دەدى الماتى قالاسى اكىمىنىڭ ورىنباسارى ارمان قىرىقبايەۆ.

اتالمىش شارا بارىسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ اتالمىش كىتاپپەن ءاربىر ستۋدەنتتىڭ تانىسۋى ماڭىزدى ەكەندىگىن اتاپ ءوتتى.

«كىتاپتى ءار قازاقستاندىق اسىرەسە ءبىزدىڭ ستۋدەنتتەر جەتە تانىسسا دەگەن ويىمىز بار. ءوزىنىڭ تاريحىڭدى ءبىل، ءوزىنىڭ مەملەكەتتىك قۇرىلىسىن بىلە وتىرىپ، تەك جاستار ەمەس ءار قازاقستاندىق ءارى قاراي دا ءوزىنىڭ مىنا ساناسىندا مەملەكەتىمىز قانداي، مەمەلەكەتىمىزدىڭ بولاشاعى قانداي، مەملەكەتىمىز قانداي قۇرىلىمداردان تۇرادى، مەملەكەتىمىزدىڭ دامۋ پرينسيپتەرى قانداي دەگەن سۇراقتارعا جاۋاپ الا الادى»،-دەدى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى، عالىمقايىر مۇتانوۆ.

ايتا كەتەر بولساق، كىتاپ اۆتورلارى ماحمۇت قاسىمبەكوۆ، باقىتجان تەمىربولات، تيمۋر شايمەرگەنوۆ بولىپ تابىلادى.

 ەسكە سالا كەتەيىك، ەلباسى كىتاپحاناسىنىڭ «نۇرسۇلتان نازاربايەۆ: ءداۋىر، تۇلعا، قوعام» كوشپەلى جوباسى ق ر تۇڭعىش پرەزيدەنتى كۇنى جانە تاۋەلسىزدىك كۇنى مەرەكەسى قارساڭىندا الماتىدا كوشپەلى قور كورمەسىمەن اشىلعان بولاتىن. وندا ەل پرەزيدەنتىنىڭ جەكە ءارحيۆى، جەكە كىتاپحاناسى جانە مۋزەي قورىنىڭ جادىگەرلەرى قويىلعان. كورمە ق ر ورتالىق مەملەكەتتىك مۇراجايىندا 2018 جىلدىڭ 14 قاڭتارىنا دەيىن اشىق بولادى.