ورتالىق كوممۋنيكاسيالار قىزمەتىندە قازاقستاندىق شاحماتشى، ءتورت دۇركىن الەم چەمپيونى، حالىقارالىق گروسسمەيستەر دينارا ءسادۋاقاسوۆانىڭ يۋنيسەف-تىڭ قازاقستانداعى ۇلتتىق ىزگى نيەت ەلشىسى رەتىندە تاعايىندالۋىنا وراي بۇۇ بالالار قورىنىڭ (يۋنيسەف) باسپا ءسوز كونفەرەنسياسى ءوتتى، دەپ حابارلايدى Qamshy.kz اقپارات اگەنتتىگى.
يۋنيسەف وسى اتاقتى 1954 جىلدان بەرى تاعايىنداپ كەلەدى، وسىلايشا تانىمال ادامداردىڭ، مادەنيەت، سپورت، ادەبيەت قايراتكەرلەرىنىڭ ءوز ەلدەرىندە جانە بۇكىل الەمدە بالالاردىڭ قۇقىقتارىن ىلگەرىلەتۋگە جانە قورعاۋعا قوسقان ۇلەسىنە قۇرمەت بىلدىرەدى. ۇلتتىق ىزگى نيەت ەلشىسى ەتىپ تاعايىنداۋ بالالاردىڭ ماسەلەلەرىنە بەيجاي قارامايتىن جەرگىلىكتى اتاقتى تۇلعالارعا ەڭ ۇرىمتال، مۇقتاج بالالاردىڭ جانە ولاردىڭ وتباسىلارىنىڭ قاجەتتىلىكتەرىنە كوڭىل اۋدارتۋعا مۇمكىندىك بەرەدى.
قازاقستانداعى يۋنيسەف وكىلى يۋريي وكساميتنىي اتاپ وتكەندەي: «بۇل اتاقتى جەڭىپ الۋ ءۇشىن تانىمال بولۋ جەتكىلىكسىز. يۋنيسەف-تىڭ ىزگى نيەت ەلشىلەرى بالالاردىڭ قۇقىقتارىن ىلگەرىلەتۋگە، يۋنيسەف-تىڭ باستى قۇندىلىقتارىنا جانە ميسسياسىنا رياسىز ادالدىعىن كورسەتەدى. دينارا – ءدال وسىنداي ادام، ءبىز كوزقاراستارىمىز جانە ماقسات-نيەتتەرىمىز تولىعىمەن ءبىر جەردەن شىققانىنا قۋانىشتىمىز».
دينارا ءۇشىن وسى اتاققا يە بولۋ تاعى ءبىر تاريحي ساتپەن تۇسپا-تۇس كەلدى – از عانا ۋاقىت بۇرىن، قاراشا ايىندا، دينارا الەمنىڭ ەڭ مىقتى شاحماتشىلارىنىڭ تىزىمىندە 23ء-شى ورىنعا كوتەرىلىپ، قازاقستان جانە ورتالىق ازيا شاحماتشىلارى اراسىندا ەڭ جوعارى رەيتينگ يەسى اتاندى.
ءوز سوزىندە دينارا ۇلتتىق ىزگى نيەت ەلشىسى بولىپ تاعايىندالۋدىڭ بار جاۋاپكەرشىلىگىن تۇسىنەتىنىن ەرەكشە اتاپ ءوتتى. «يۋنيسەف-كە ماعان سەنىم ارتقانى ءۇشىن ريزامىن جانە وسى سەنىم ۇدەسىنەن شىعۋ ءۇشىن قولىمنان كەلگەننىڭ بارلىعىن جاسايتىنىما سەنىدىرگىم كەلەدى. بالالار قامقورلىق پەن مەيىرىمگە بولەنۋى ءۇشىن، ءوز پىكىرىن ەرەسەكتەرگە جەتكىزە الۋى ءۇشىن جانە ءوز ومىرلەرىنە قاتىستى شەشىمدەرگە ىقپال ەتە الۋى ءۇشىن مەن بارلىعىمىز بىرىگىپ، ناتيجە شىعارۋدى قالايمىن».
بيىل يۋنيسەف پەن دينارا بىرنەشە بىرلەسكەن شارا وتكىزدى، سونىڭ ىشىندە، ماڭعىستاۋ وبلىسىنا ساپار دا بار، سول ساپار بارىسىندا دينارا بالالارعا ارنالعان ءبىرقاتار مەكەمەلەرگە – كامەلەتكە تولماعاناداردى بەيىمدەۋ ورتالىعىنا، ديەۆيانتتى مىنەز-قۇلىقتى بالالارعا ارنالعان مەكتەپ-ينتەرناتقا، وتباسىلىق ءتيپتى بالالار اۋىلىنا – بارىپ، بالالارمەن جانە جاستارمەن اڭگىمەلەستى.
«يۋنيسەف-تىڭ ارقاسىندا مەن مۇلدەم قورعالماعان بالالاردىڭ قۇقىقتارى تۋرالى كوپ تىڭ مالىمەت الامىن، ولاردىڭ اراسىندا ەرەكشە قاجەتتىلىكتەرى بار بالالار، قىلمىس قۇربانىنا نەمەسە كۋاگەرىنە اينالعان بالالار، قۇقىق بۇزۋشىلىق جاساعان بالالار، ءتىپتى ءوز وتباسىندا قاتىگەزدىككە دۋشار بولاتىن بالالار بار. مەن سول بالالاردىڭ قۇقىقتارىن ىلگەرىلەتۋگە جانە قورعاۋعا ءوز ۇلەسىمدى قوسامىن دەپ ۇمىتتەنەمىن»، - دەدى دينارا.
تاعايىنداۋ جىل سايىن 20 قاراشادا اتاپ وتىلەتىن دۇنيەجۇزىلىك بالالار كۇنى قارساڭىندا ورىن الدى. 1989 جىلى وسى كۇنى تۇڭعىش رەت بالالاردىڭ قۇقىقتارىن بەتكىتكەن حالىقارالىق قۇجات بولىپ تابىلاتىن بالا قۇقىقتارى تۋرالى كونۆەنسيا قابىلداندى. كونۆەنسيا تاۋەلسىز قازاقستان قابىلداعان العاشقى حالىقارالىق قۇجاتتاردىڭ ءبىرى اتاندى.
