قازاقستاننىڭ باس پروكۋراتۋراسى ۆەدومستۆودا تەكسەرىستەردىڭ جۇرگىزىلگەنىن ايتتى، — دەپ حابارلايدى Qamshy.kz اقپارات اگەنتتىگى پروكۋراتۋرانىڭ باسپا ءسوز قىزمەتىنە سىلتەمە جاساپ. 2017 جىلدىڭ ماۋسىم ايىندا باس پروكۋراتۋرانىڭ ىشكى قاۋىپسىزدىك باسقارماسىنىڭ دەپارتامەنتكە اينالعانى ايتىلادى. شتات 6 قىزمەتكەردەن 13 قىزمەتكەرگە دەيىن كوبەيگەن.

بولىمشەلەرگە تەك تاجىريبەسى بار قىزمەتكەرلەر الىنىپ وتىرعان. سونداي-اق، دەپارتامەنتتە قىلمىستىق ىستەردى تەرگەيتىن ارنايى پروكۋرورلار توبى قۇرىلعان. ۆەدومستۆو مالىمەتىنشە، بۇل جولى 12 پروكۋرور جاعىمسىز سەبەپتەرمەن جۇمىستان قۋىلعان.

«دەپارتامەنت بيىل 191 تەكسەرىس جۇرگىزدى. 93 پروكۋرور ءتۇرلى قىلمىستىق جاۋاپكەرشىلىككە تارتىلدى. ولاردىڭ 12ء-سى جاعىمسىز سەبەپتەرمەن جۇمىستان بوساتىلدى، تاعى التى قىزمەتكەر جۇمىستان شىعارىلدى، 15 قىزمەتكەر قىزمەتىنە سايكەس بولماۋىنا بايلانىستى جۇمىستان قۋىلدى. 40 پروكۋرور ار-نامىس كودەكسىن بۇزعانى ءۇشىن جاۋاپكەرشىلىككە تارتىلدى»، — دەپ حابارلادى ۆەدومستۆوداعىلار.

سونىمەن قاتار، بيىل 10 قىزمەتكەرگە قاتىستى قىلمىستىق ءىستىڭ قوزعالعانى ايتىلادى. ولاردىڭ جەتەۋى باcشى قىزمەتىندە بولعان. «ەكەۋى سوتتالدى، ءۇش ءىس سوتتا جاتىر، بەسەۋىن ارنايى پروكۋرورلار تەرگەپ جاتىر. پروكۋرورلارعا قاتىستى جالپى سانى جەتى قىلمىستىق ءىس قوزعالدى»، — دەپ حابارلادى باس پروكۋراتۋرا وكىلدەرى.