سوچيدە ءوتىپ جاتقان سامبودان الەم چەمپيوناتىندا قازاقستاننىڭ ەسكى ءانۇرانىنىڭ فونوگرامماسى قوسىلعان دەپ حابارلايدى Qamshy.kz اقپارات اگەنتتىگى. بۇل تۋرالى ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ باسپا ءسوز حاتشىسى راۋحان توعىمبايەۆا حابارلادى.
قازاقستاندىق سپورتشى ەسەت قۋانوۆتى التىن مەدالمەن ماراپاتتاۋ كەزىندە ۇيىمداستىرۋشىلار وسىنداي قاتەلىككە بوي الدىرىپتى.
ەسكى ءانۇران وينالعاندا، قۋانوۆ باسىن شايقاپ، قاتەلىك كەتكەنىن كورسەتكەن. سول كەزدە تريبۋنادا وتىرعان وتانداستارىمىز ورىندارىنان تۇرىپ، ءانۇراندى فونوگرامماسىز ايتىپ بەردى. كوممەنتاتور مەن كورەرمەندەر قازاقستاندىقتارعا رازى بولىپ، ديكتور جىبەرىلگەن اعاتتىق ءۇشىن كەشىرىم سۇرادى.
راۋحان توعىمبايەۆانىڭ ايتۋىنشا، رف سامبو فەدەراسياسى ولقىلىققا تەحنيكالىق اقاۋ مەن ادامي فاكتور سەبەپ بولىپ وتىرعانىن تۇسىندىرگەن.
«وزدەرىڭىز بىلەتىندەي، بۇل ءبىرىنشى رەت ورىن العان جاعداي ەمەس. ءانۇران 11 جىل بۇرىن جاڭارتىلعانىمەن، قانشاما رەت شاتاستىرۋ جاعدايى تىركەلدى. وسىنى الداعى ۋاقىتتا بولدىرماۋ ءۇشىن جۇمىس جۇرگىزىلەتىن بولادى. بۇل جۇمىس قالاي جۇزەگە اسىرىلادى؟ بالكىم، ەگەر ۇيىمداستىرۋ كوميتەتى وزدەرىنىڭ جۇمىسىن جوعارى دەڭگەيدە جاساي المايتىن بولسا، وندا كوميتەتتەن ارنايى ءبىر وكىل بولەمىز بە؟.. ول سۇراقتاردى الداعى ۋاقىتتا شەشەتىن بولامىز»، - دەيدى راۋحان توعىمبايەۆا.
