تارازدا وتكەن سەنبى كۇنى كەشكە ۇيىنەن شىعىپ كەتكەن 10 جاستاعى بالا سول كۇيى قايتا ورالماعان. تۋىستارى مەن مەكتەپ ۇجىمى ونى جاتپاي-تۇرماي ىزدەگەنىمەن ناتيجە بولماعان، دەپ حابارلايدى Qamshy.kz اقپارات اگەنتتىگى  "كتك" ارناسىنا سىلتەمە جاساپ.

وقۋشىنىڭ ءولى دەنەسىن بالاباقشا ماڭىنداعى توپ اعاشتىڭ اراسىنان ءتارتىپ ساقشىلارى ءبىر كۇننەن كەيىن تاۋىپ العان. سول كۇنى تارازدا قار جاۋعان بولاتىن. سوندىقتان بالانىڭ ءمايىتى تالدىڭ جاپىراقتارى مەن قارعا كومىلىپ قالىپتى. ال قازا تاپقان 4 سىنىپ وقۋشىسى مۇندا ءوز اياعىمەن كەلدى مە نەمەسە الگى كۇدىككە ءىلىنىپ جاتقان 7 سىنىپ وقۋشىسى كۇشتەپ اكەلدى مە، ول جاعى ازىرگە بەلگىسىز.

نيكيتانىڭ اتا-اناسى كامەراعا بەت-جۇزدەرىن كورسەتكىسى كەلمەي، تەك اقپارات بەرۋمەن شەكتەلدى. ايتۋلارىنشا، ولگەن بالانىڭ دەنەسىندە سوققىنىڭ ىزدەرى بار. ءارى زورلانعان بولۋى مۇمكىن. ول ءبىر ءۇيدىڭ كەنجەسى. ال مەكتەپ ديرەكتورى "نيكيتا قاق-سوعى جوق، ءتارتىبى ءتۇزۋ وقۋشى"،- دەيدى.   

"قايعىلى جاعداي ءبارىمىزدى ەسەڭگىرەتىپ تاستادى. اسىرەسە، نيكيتانىڭ سىنىپتاستارىنا وتە اۋىر ءتيدى. بۇلاي بولادى دەپ كىم ويلاعان. ءقازىر قايتىس بولعان وقۋشىنىڭ اتا-اناسىنا قولدان كەلگەن كومەگىمىزىدى بەرىپ جاتىرمىز. ال ونى ءولتىرۋى مۇمكىن دەپ ايىپتالىپ جاتقان وقۋشىمىز دا بۇزاقىلار تىزىمىندە ەمەس"، - دەدى مەكتەپ ديرەكتورى ءلاززات سمانوۆا.

وسى قىلمىسقا 7 سىنىپ وقۋشىسىنىڭ كۇدىكتى دەپ تانىلۋى بەكەر ەمەس. ويتكەنى سول قايعىلى وقيعا بولعان كۇنى ونىڭ نيكيتامەن بىرگە جۇرگەنىن كورگەندەر بار. 14 جاستاعى جەتكىنشەكتىڭ جۇيكە جۇيەسىندە اۋىتقۋ بار بولىپ شىقتى. سوندىقتان ول ارنايى كوررەكسيالىق سىنىپتا وقىعان. ءقازىر كۇدىكتى وقۋدان بوساتىلىپ، ۇيىندە جاتىر. ال ءتارتىپ ساقشىلارى 10 جاستاعى بالا "جەلىمنىڭ يىسىنەن باقيلىق بولعان" دەيدى. 

"تەرگەۋ جۇمىستارى ناتيجەسىندە جابىرلەنۋشىنىڭ سول كۇنى 14 جاستاعى جاسوسپىرىممەن بىرگە جەلىم يىسكەگەندىگى انىقتالدى. ءولىم سەبەپتەرىن انىقتاۋ ماقساتىندا سوت-مەديسينالىق ساراپتاماسى تاعايىندالىپ، تەرگەۋ امالدارى جالعاستىرىلۋدا. ءقازىر كۇدىكتى اتا-اناسىنىڭ قاراۋىنا بەرۋ تۋرالى بۇلتتارتپاۋ شاراسى قولدانىلدى، - دەدى جامبىل وبلىستىق ءىىد-نىڭ باسپا ءسوز حاتشىسى گۇلسارا مۇحتارقۇلوۆا.

ەگەر بۇل ءجاسوسپىرىمنىڭ قىلمىسى دالەلدەنسە، 10 جىلدان 15 جىلعا دەيىن تۇرمەگە جابىلۋى مۇمكىن. ال قايعىلى وقيعادان كەيىن قالا مەكتەپتەرىندە ءتارتىپ كۇشەيتىلدى. بۇدان بىلاي اتا-انالار ۇل-قىزدارىن وزدەرى اكەلىپ، وزدەرى اكەتۋلەرى ءتيىس.