اقش پرەزيدەنتى دونالد ترامپ سولتۇستىك كورەيانى تەرروريزمدى قولدايتىن ەلدەر تىزىمىنە قوستى. ساراپشىلار اقش پحەنيانعا بۇعان دەيىن-اق قاتاڭ سانكسيالار سالعاندىقتان بۇل شەشىمدى سيمۆولدىق شارا دەپ اتادى، دەپ Qamshy.kz اقپارات اگەنتتىگى ازاتتىققا سىلتەمە بەرىپ جازادى.
"سولتۇستىك كورەيا رەجيمى زاڭعا ساي ارەكەت ەتۋى ءتيىس. ول زاڭعا قايشى يادرولىق جانە زىمىران باعدارلامالارىن توقتاتۋى ءتيىس. ول حالىقارالىق تەرروريزمدى قولداۋىن دوعارسىن" دەدى ترامپ. اقش پرەزيدەنتى سولتۇستىك كورەيا باسشىسى كيم چەن ىننىڭ باۋىرىنىڭ مالايزيادا قازا تابۋىن جانە سولتۇستىك كورەيا تۇرمەسىندە 17 اي وتىرعان امەريكالىق ستۋدەنت وتتو ءۋورمبيردىڭ قازاسىن پحەنياننىڭ زاڭسىز ارەكەتتەرىنە مىسال قىلدى.
سولتۇستىك كورەيانى 2008 جىلى سول كەزدەگى اقش پرەزيدەنتى كىشى دجوردج بۋش پحەنيان ءوزىنىڭ يادرولىق نىساندارىنا حالىقارالىق ينسپەكتورلاردى كىرگىزۋگە كەلىسكەن سوڭ تەرروريزمدى قولدايتىن ەلدەر تىزىمىنەن شىعارعان. ترامپ ءبۋشتىڭ ول شەشىمىن "اڭعىرتتتىق جانە قاتەلىك" دەپ اتادى.
سولتۇستىك كورەيا سوڭعى ايلاردا بىرنەشە رەت بالليستيكالىق زىمىران ۇشىرىپ، يادرولىق سىناق جاساعان. بۇۇ قاۋىپسىزدىك كەڭەسى بۇعان جاۋاپ رەتىندە اقش-تىڭ ۇسىنىسىمەن سولتۇستىك كورەياعا قارسى قوسىمشا سانكسيالار سالعان.
اقش مەملەكەتتىك حاتشىسى رەكس تيللەرسوننىڭ سوزىنشە، پرەزيدەنت ترامپتىڭ شەشىمى باسقا ەلدەرگە اقش-تىڭ سولتۇستىك كورەيا ماسەلەسىنە ەرەكشە نازار اۋدارىپ وتىرعانىن ۇقتىرۋى ءتيىس.
بۇعان دەيىن تەرروريزمدى قولدايتىن ەلدەر تىزىمىنە سيريا، يران جانە سۋدان ەنگىزىلگەن.
