قىرعىزستاننىڭ نيۋ-يوركتەگى بۇۇ جانىنداعى تۇراقتى وكىلدىگى ۇيىمعا مۇشە ەلدەردى قازاق-قىرعىز شەكاراسىندا قالىپتاسقان جاعدايدان حاباردار ەتتى، دەپ Qamshy.kz اقپارات اگەنتتىگى ازاتتىققا سۇيەنە وتىرىپ جازادى.
قىرعىزستان سىرتقى ىستەر مينيسترلىگىنىڭ باسپا ءسوز قىزمەتى 17 قاراشادا بۇۇ شتاب-پاتەرىندە باس اسسامبلەيانىڭ ەكىنشى كوميتەتىنىڭ وتىرىسىندا ەكونوميكالىق، ەكولوگيالىق جانە قارجىلىق ماسەلەلەرگە قاتىستى ءبىرسىپىرا قارار قارالعانىن حابارلادى.
«ءبىر جاقتى ەكونوميكالىق شارالار - دامۋشى ەلدەردى ساياسي جانە ەكونوميكالىق تۇرعىدان ماجبۇرلەۋ شارالارى رەتىندە» دەپ اتالاتىن قاراردى تالقىلاۋ كەزىندە قىرعىزستان وكىلى ميرگۇل مولدويسايەۆا قازاقستاننىڭ 10 قازاننان باستاپ شەكارادا «ادام، كولىك پەن تاۋاردىڭ ەركىن وتۋىنە قولدان كەدەرگى جاساپ وتىرعانىن» مالىمدەگەن.
«بۇۇ-عا مۇشە ەلدەر قازاقستان-قىرعىزستان شەكاراسىندا قالىپتاسقان جاعدايدان، قىرعىزستان ەكونوميكاسىنا زيان كەلتىرۋ ءۇشىن جانە ەلدىڭ ينۆەستيسيالىق ءارى تۋريستىك تارتىمدىلىعىنا نۇقسان كەلتىرۋ ماقساتىندا ەكونوميكالىق جانە ترانسپورتتىق بلوكادا قولدانىلىپ جاتقانىنان حاباردار ەتىلدى» دەلىنگەن سىرتقى ىستەر مينيسترلىگىنىڭ حابارلاماسىندا.
قاراردا ءبىر دە ءبىر مەملەكەت باسقا مەملەكەتتى وزىنە تاۋەلدى قىلۋ ماقساتىمەن ءبىرجاقتى ەكونوميكالىق، ساياسي يا باسقا قانداي دا ءبىر شارالاردى قابىلداي المايتىنى ايتىلعان. قىرعىزستان دەلەگاسياسى قۇجات قابىلدانسا ول ەلدىڭ ورنىقتى دامۋىنا نۇقسان كەلتىرىپ، ىنتىماقتاستىقتى بۇزاتىن كەدەرگىلەردى جويۋعا تۇرتكى بولاتىنىنان ءۇمىتتى ەكەنىن بىلدىرگەن.
قىرعىزستان اتالعان قاراردىڭ قابىلدانۋىن قولداپ داۋىس بەرگەن.
7 قازاندا قىرعىزستان پرەزيدەنتى المازبەك اتامبايەۆ پرەزيدەنتتىككە كەيبىر كانديداتتار مەن قازاقستان بيلىگىنىڭ اتىنا قاتار سىن ايتقان. وسىدان كوپ ۇزاماي، 10 قازاندا قازاقستان قىرعىزستانمەن شەكارادا تەكسەرۋدى كۇشەيتىپ، شەكارانىڭ قىرعىز جاعىندا جۇك كولىكتەرىنىڭ كەزەگى پايدا بولعان. تاراپتار 19 قازاننان باستاپ جولاۋشىلار كولىگى مەن جۇگى بار جولاۋشىلاردى وتكىزۋدى جەڭىلدەتۋگە كەلىسكەن بولاتىن.
استانا شەكاراداعى تەكسەرۋدى قىرعىزستاننان كەلەتىن «كونتراباندامەن كۇرەسۋ ءۇشىن» كۇشەيتكەنىن ايتادى. بىشكەك قازاقستان شەكارادا «قولدان كەدەرگى جاساپ وتىرعانىن» ايتىپ، دۇنيەجۇزىلىك ساۋدا ۇيىمىنا جانە ەۋرازيا ەكونوميكالىق وداعىنا (ەاەو) جۇگىنگەن.
