2017 جىلعى 23 قاراشادا استانا  قالاسى،  دوستىق كوشەسىندەگى قازاقستان رەسپۋبليكاسى ۇلتتىق اكادەميالىق كىتاپحاناسىنىڭ كونستيتۋسيا زالىندا ساعات 10.00 دە «ۇلتتىق تەرمينقوردى جۇيەلەۋدىڭ تەوريالىق جانە عىلىمي –تاجىريبەلىك نەگىزدەرى» رەسپۋبليكالىق عىلىمي- تەوريالىق كونفەرەنسياسى بولادى،- دەپ جازادى Qamshy.kz اقپارات اگەنتتىگى. 

قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي  جۇمىستار كوميتەتىنىڭ  تاپسىرماسى بويىنشا ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ –ادىستەمەلىك ورتالىعى   2017 جىلعى 23  قاراشادا استانا قالاسىندا  «ۇلتتىق تەرمينقوردى جۇيەلەۋدىڭ تەوريالىق جانە عىلىمي –تاجىريبەلىك نەگىزدەرى» تاقىرىبىندا  رەسپۋبليكالىق عىلىمي-تەوريالىق كونفەرەنسيا وتكىزەدى.

كونفەرەنسيادا قازىرگى تەرمينجاسام، تەرمينقوردى جۇيەلەۋدىڭ ماسەلەلەرى،  الاش قوزعالىسى زيالىلارىنىڭ قازاق تەرمينجاسام قاعيدالارىن قالىپتاستىرۋداعى ورنى، تەرميندەردى رەتتەۋ، بىرىزدىلەۋ مەن ستاندارتتاۋدىڭ  ماڭىزدى تەوريالىق جانە عىلىمي –پراكتيكالىق ماسەلەلەرى قوزعالادى.    

اتالعان كونفەرەنسياعا قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق مەملەكەتتىك تەرمينولوگيالىق كوميسسيا مۇشەلەرى، ق ر قازاقستان رەسپۋبليكاسى مادەنيەت جانە سپورت مينيسترلىگىنىڭ جاۋاپتى قىزمەتكەرلەرى، تەرمينولوگ-عالىمدار، دوكتورانتتار مەن ماگيسترلار،  ورتالىق جانە جەرگىلىكتى اتقارۋشى  مەملەكەتتىك ورگانداردىڭ  قىزمەتكەرلەرى،   سونداي-اق قوعامدىق ۇيىمدار، زيالى قاۋىم وكىلدەرى مەن ب ا ق  قاتىسادى.