الماتىدا 24 جاستاعى جىگىت ىزدەستىرىلىپ جاتىر. ول 5 كۇننەن بەرى حابار-وشارسىز كەتكەن. تۋىستارىنىڭ ايتۋىنشا، ءاليحان يشيموۆ جۇمباق جاعدايدا جوعالعان. ويتكەنى، جىگىتتىڭ تەمىر تۇلپارى اۋەجاي جاقتاعى وزەن ماڭىنان تابىلىپتى. ىشىندە يەسىنە تيەسىلى زاتتاردىڭ ءبارى سول قالپى قالعان. ءقازىر جوعالعان جىگىتتىڭ سۋرەتى الەۋمەتتىك جەلىلەر مەن باسىلىمدارعا جاريالاندى، دەپ حابارلايدى Qamshy.kz اقپارات اگەنتىتگى الماتى ارناسىنا سىلتەمە جاساپ.

ءاليحان يشيموۆ 16 قاراشادا كەشكىسىن كولىكتەرى بۇزىلىپ، جولدا قالعان دوستارىنا كومەك بەرۋگە ۇيىنەن شىعىپ كەتكەن. اناسىنا كوپ ۇزاماي ورالۋدى ەسكەرتىپتى. الايدا، جاس جىگىتتەن سودان بەرى حابار جوق. ال، تەمىر تۇلپارى الماتى اۋەجايىنىڭ جانىنداعى وزەن ماڭىنان تابىلىپتى.

ءاليحان تىزگىندەگەن كولىكتى تۋىستارى ەرتەسىندە تاڭعى ساعات 10-دار شاماسىندا ءدال وسى وزەن ماڭىنان تاۋىپ الىپتى. ەڭ قىزىعى كولىكتىڭ ەسىگى اشىق تۇرعان. ىشىندە كىلتى مەن يەسىنىڭ ۇيالى تەلەفونى، سونداي-اق اقشا مەن قۇجات سالىنعان ءاميانى امان-ساۋ تۇرعان.

ءقازىر، جۇمباق جاعدايدا جوعالعان جىگىتتى تۋىستارى مەن دوستارى شارق ۇرىپ ىزدەستىرۋدە. ولار، ءاليحاننىڭ ەشكىممەن ارازدىعى جوق، كىشىپەيىل جىگىت ەكەنىن العا تارتتى. ال، كولىگى تابىلىپ ىشىندەگى اقشاسىنا دەيىن ساۋ تۇرعانى كوڭىلگە كۇدىك ۇيالاتادى دەيدى. 

«ونى 18ء-ى كۇنى وسى اۋماقتاردان كىشكەنتاي بالالار كورىپتى. ولار ءاليحاننىڭ كيگەن كيىمدەرىن دالمە-دال سۋرەتتەپ بەردى. ۇستىندە جاسىل كۋرتكا، قارا سپورتتىق شالبار مەن كروسوۆكي بولعان. بىلمەيمىز، نە ويلارىمىزدى، قايدا كەتكەنىن. تەك امان-ەسەن ورالسا ەكەن دەيمىز. سول كۇنى ەكەۋىمىز كەزدەسۋ كەرەك ەدىك، ءساتى كەلمەدى»،-دەدى ءا.يشيموۆتىڭ دوسى، ەرناز ءتۇسىپوۆ.

ءاليحاندى تابۋ ءۇشىن اتا-اناسى قولدارىنان كەلگەننىڭ بارلىعىن جاساپ باعۋدا. ولار بالالارىنىڭ كولىگىن تاپقان بويدا، پوليسياعا حابار بەرىپتى. الايدا، ونداعىلار شاراسىز اتا-انانى ءبىر اۋداننان، ەكىنشى اۋدانعا سەندەلتىپ قويعان كورىنەدى. 

«تۇركسىب اۋدانىنىڭ ىشكى ىستەر باسقارماسىنا بارىپ ءوتىنىش جازدىق. ولار شامامەن بالامىزدىڭ قايدا كەتكەنىن سۇرادى دا، ءبىزدى الاتاۋ اۋدانىنا جىبەردى. ونداعىلار، كولىكتى اۋەجاي ماڭىنان تاپتىڭدار دەپ، قايتادان تۇركسىب اۋدانىنا جىبەردى. ءوتىنىشىمىزدى تۇركسىب اۋدانىنا جولدادىق، دۇيسەنبىدەن باستاپ ولار اينالىسادى دەپ حابارلادى. ءبىراق، ەشقانداي ناتيجە جوق. ەشكىم حابارلاسپادى. جۇمىس ىستەگىسى كەلمەيدى»،-دەدى ءا.يشيموۆتىڭ اناسى، گاۋھار يشيموۆا.

الايدا، قالالىق ىشكى ىستەر دەپارتامەنتىندەگىلەر ىزدەۋ جۇرگىزىلىپ جاتقاندىعىن جانە ءقازىر بولعان جاعدايدىڭ بىرنەشە نۇسقاسى بارىن حابارلادى. ءبىراق، بۇل اقپاراتتى تەرگەۋ مۇددەسى ءۇشىن جاريا ەتپەدى. ال، ءاليحان يشيموۆتىڭ تۋىستارى ونى كورگەن كۋاگەرلەردەن قانداي دا ءبىر مالىمەت كۇتۋدە.