بەت-الپەتتى بۇركەمەلەيتىن كيىم كيۋگە تىيىم سالۋدىڭ دىنگە قاتىسى جوق، ول قوعامدىق قاۋىپسىزدىك ءۇشىن قاجەت. بۇل تۋرالى ءدىن ىستەرى جانە ازاماتتىق قوعام ءمينيسترى ايتتى، دەپ جازادى  Qamshy.kz اقپارات اگەنتتىگى استانا ارناسىنىڭ جاڭالىقتار قىزمەتىنە سىلتەمە جاساپ.

بۇگىن ءدىن، ءدىني بىرلەستىكتەر تۋرالى زاڭ جوباسىنا ەنگىزىلگەن وزگەرىستەر مەن تولىقتىرۋلاردى تالقىلاۋ بويىنشا ديپكورپۋس وكىلدەرى ءۇشىن بريفينگ ءوتتى.

نۇرلان ەرمەكبايەۆتىڭ ايتۋىنشا، بەتتى تۇمشالاپ كيىنۋ قۇقىققورعاۋ ورگاندارىنىڭ تۇلعانى تانۋىنا كەدەرگى جاسايدى. بۇل نورماعا قاتىستى ازاماتتاردىڭ، ۇكىمەتتىك ەمەس ۇيىمداردىڭ، مەملەكەتتىك قىزمەتكەرلەر مەن ساراپشىلار پىكىرى ەسكەرىلگەن. بەلگيا، فرانسيا سەكىلدى باسقا ەلدەردىڭ دە تاجىريبەلەرى ەسكەرىلگەن. ءمينيستردىڭ ايتۋىنشا، ولار نيكاب، حيدجاب كيۋگە تىيىم سالۋ ادام قۇقىن بۇزبايدى دەگەن شەشىمگە كەلگەن. 

«بۇل تىكەلەي ءدىني ماسەلەگە قاتىستى ەمەس، شىن مانىندە ول قوعامدىق قاۋىپسىزدىك ماسەلەسى. مىسالى، نيكاب، چادرا، پالاكلاۆا نەمەسە بەتپەردە سەكىلدى كيىم كيۋ قۇقىققورعاۋ ورگاندارىنىڭ جۇمىسىنا كەدەرگى جاسايدى. دەمەك قوعامدىق قاۋىپسىزدىكتى قامتۋ بويىنشا شارالاردىڭ ءتيىمسىز بولۋىنا اكەلەدى. سوندىقتان ونىڭ دىنگە قاتىسى جوق»، - دەدى ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ.