كەزدەسۋ بارىسىندا مەملەكەت باسشىسىنا دەنساۋلىق ساقتاۋ سالاسىن دامىتۋعا ارنالعان «دەنساۋلىق» مەملەكەتتىك باعدارلاماسىنىڭ ىسكە اسىرىلۋى جونىندە ارالىق ەسەپ بەرىلىپ، مينيسترلىكتىڭ الدىنا قويىلعان مىندەتتەردىڭ ورىندالۋى تۋرالى اقپارات ۇسىنىلدى دەپ حابارلايدى Qamshy.kz اقپارات اگەنتتىگى سىلتەمە جاساي وتىرىپ.

ەلباسى اۋرۋ-سىرقاۋدىڭ الدىن الۋ شارالارىنىڭ ماڭىزدىلىعىن اتاپ ءوتىپ، سالاۋاتتى ۇلت قالىپتاستىرۋ ىسىندە حالىقتىڭ ەرەكشە ءرول اتقاراتىنىن ايتتى.

– ازاماتتارىمىزدى وزدەرىنىڭ دەنساۋلىقتارىن نىعايتۋعا تارتۋىمىز قاجەت. ادام دەنساۋلىعىنىڭ 10-15 پايىزى عانا مەديسيناعا تاۋەلدى. قالعانىنىڭ ءبارى تەك وزىنە بايلانىستى بولادى، – دەدى نۇرسۇلتان نازاربايەۆ.

قازاقستان پرەزيدەنتى حالىق اراسىندا سالاۋاتتى ءومىر سالتىن ناسيحاتتاۋ ماسەلەسىنە توقتالىپ، قازاقستاندىقتاردىڭ ءومىر ءسۇرۋىنىڭ ورتاشا ۇزاقتىعىن 80 جاسقا دەيىن كوتەرۋ جونىندەگى مىندەتتىڭ وزەكتىلىگىنە نازار اۋداردى.

دەنساۋلىق ساقتاۋ ءمينيسترى قازاقستان پرەزيدەنتىنە تۇرعىندار دەنساۋلىعىنىڭ نەگىزگى كورسەتكىشتەرىنىڭ جاقسارىپ كەلە جاتقانىن مالىمدەدى.

– بارلىق كورسەتكىش بويىنشا احۋال تۇراقتى. ءومىر ءسۇرۋدىڭ ورتاشا ۇزاقتىعى كوتەرىلۋدە. انا ءولىمىنىڭ كورسەتكىشى تومەندەپ كەلەدى. بالا ءولىمىنىڭ كورسەتكىشى دە قاتارىنان بىرنەشە جىل بويى تومەندەۋدە، – دەدى ەلجان ءبىرتانوۆ.

دەنساۋلىق ساقتاۋ ءمينيسترى حالىقتىڭ دەنساۋلىعىن جاقسارتۋ بويىنشا مينيسترلىكتىڭ قابىلداپ جاتقان شارالارى جونىندە ايتىپ، اۋرۋ-سىرقاۋ بەلگىلەرىن باستاپقى ساتىدا انىقتاۋدىڭ ماڭىزدى ەكەنىن اتاپ ءوتتى.

– قازاقستاندا 2012 جىلدان باستاپ تەگىن دارى-دارمەكپەن قامتۋ جونىندەگى باعدارلاما جۇزەگە اسىرىلۋدا. ونىڭ تيىمدىلىگى وتە جوعارى. باعدارلاما اياسىندا 2،5 ميلليونعا جۋىق ادام اۋرۋدىڭ 50 ءتۇرى بويىنشا، سونىڭ ىشىندە كۇرەتامىر گيپەرتونياسى، قانت ديابەتى جانە ونكولوگيالىق اۋرۋلار بويىنشا تەگىن دارى-دارمەككە قول جەتكىزىپ وتىر، – دەدى ە.ءبىرتانوۆ.

سونداي-اق، ەلجان ءبىرتانوۆ نۇرسۇلتان نازاربايەۆقا كورسەتىلەتىن العاشقى مەديسينالىق قىزمەتتەردىڭ ساپاسىن ارتتىرۋ جانە دەنساۋلىق ساقتاۋ جۇيەسىنە سيفرلىق تەحنولوگيالاردى ەنگىزۋ جونىندە قابىلدانىپ جاتقان شارالاردىڭ ناتيجەلەرى تۋرالى باياندادى.

كەزدەسۋ بارىسىندا مەملەكەت باسشىسى دارى-دارمەك باعاسىن مەملەكەتتىك رەتتەۋ جانە فارماسيەۆتيكا سالاسىنداعى سىبايلاس جەمقورلىقپەن كۇرەس جۇرگىزۋ ماسەلەلەرىنە ەرەكشە توقتالدى.

– مەنىڭ باعاعا قاتىستى ماسەلەنى شەشۋ جونىندە بەرگەن تاپسىرمامنان كەيىن فارماسيا كوميتەتىنىڭ ءتوراعاسى، «سك-فارماسيا» كومپانياسىنىڭ باسشىلىعى جانە بەس وبلىستىڭ باسقارما باسشىلارى ۇستالدى. دارى-دارمەك باعاسىنىڭ نەگىزسىز ءوسۋى شارتتار جاساسۋداعى زاڭنان تىس ارەكەتتەر ناتيجەسىندە ورىن الادى، – دەدى ەلباسى.

قازاقستان پرەزيدەنتى العا قويىلعان مىندەتتەردىڭ ۋاقتىلى ىسكە اسىرىلۋىن قامتاماسىز ەتۋدى جانە دەنساۋلىق ساقتاۋ سالاسىنا، سونىڭ ىشىندە دارى-دارمەكتەردى ساتىپ الۋ ۇردىسىنە ءتيىستى باقىلاۋ ورناتۋدى تاپسىردى.

بۇل رەتتە، نۇرسۇلتان نازاربايەۆ ە.ءبىرتانوۆقا ءوزى باسشىلىق ەتەتىن سالاعا دەربەس جاۋاپ بەرەتىنىن ەسكەرتتى.