ءال-اۋقاتى سىرتقى نارىققا عانا بايلانىستى ەل ەشقاشان ناعىز ەگەمەندىككە يە بولا المايدى. مۇنى ايدان انىق بايقاعان مەملەكەت باسشىسى بولاشاقتى ويلادى. كەڭەس وداعى كەزىندە جاسالعان شقو ونەركاسىپتىك الەۋەتى جاس مەملەكەتكە قاجەتتى جاڭا ءوندىرىس وشاقتارىن اشۋعا جول اشتى، — دەپ جازادى Qamshy.kz اقپارات اگەنتتىگى. 

2009 جىلدىڭ 9 قاراشاسىندا قازاقستان رەسپۋبليكاسى ۇكىمەتىنىڭ «وسكەمەن قالاسىندا اۆتوكولىك قۇراستىرۋ ءوندىرىسىن جاساقتاۋ تۋرالى» №1684 قاۋلىسى قابىلداندى. 2001-2002 جىلدارى «بيپەك اۆتو» كومپانياسى وندىرىستىك قۋاتىن بەلسەندى دايىنداۋمەن اينالىستى. 2002 جىلدىڭ جەلتوقسان ايىنان باستاپ باستاپقى مەملەكەتتىك تىركەۋدەن وتكەن «ازيا اۆتو» اق ءىرى توراپتى اۆتوكولىك قۇراستىرۋدى باستادى. وتاندىق اۆتوكولىك ءوندىرىسىنىڭ شىعارعان العاشقى كولىگى «نيۆا» اۆتوكولىگى بولدى.

2003 جىلعى 13 تامىزدا زاۋىتقا ق ر پرەزيدەنتى نۇرسۇلتان نازاربايەۆ كەلدى. ول «نيۆا» اۆتوكولىگىنىڭ رولىنە وتىرىپ: «بۇگىندە قازاقستاندىق تۇتىنۋشىعا «نيۆا» كولىگى – جەڭىل كولىكتىڭ ەڭ ساي ءتۇرى» دەدى. پرەزيدەنت كاسىپورىن باسشىسى اناتوليي بالۋشكين مەن زاۋىت ۇجىمىنا ساتتىلىك تىلەدى.

«نيۆا» كولىگىن شىعارۋ قازاقستاندىق اۆتونارىقتىڭ بارلىق سۇرانىسىن قاناعاتتاندىرا المادى. بۇدان كەيىن «ازيا اۆتو» كومپانياسى Skoda جانە Chevrolet اۆتوكولىكتەرىن قۇراستىرۋدى باستادى. 2007 جىلدىڭ 15 ماۋسىمى كۇنى قازاقستان پرەزيدەنتى نۇرسۇلتان نازاربايەۆ «ازيا اۆتو» زاۋىتىنداعى Chevrolet اۆتوكولىكتەرىن قۇراستىرۋ كونۆەيەرىنىڭ ىسكە قوسىلۋىنا قاتىستى.

2007 جىلعى 16 قاراشا كۇنى بەيبىتشىلىك پەن كەلىسىم سارايىندا نۇرسۇلتان ءابىش ۇلى «ازيا اۆتو» اق-نى «ساپا سالاسىنداعى جەتىستىگى ءۇشىن» سىيلىعىمەن ماراپاتتادى. وسكەمەندىك اۆتوكولىك قۇراستىرۋ كاسىپورىنى ءوندىرىس باعىتىنداعى ەڭ ۇزدىك كاسىپورىن رەتىندە تانىلدى.

اۆتوكولىك قۇراستىرۋداعى جەتىستىكتەر «ازيا اۆتو» باسشىلىعىن اۆتوكولىكتى دايىن بولشەكتەردەن قۇراستىرىپ قانا قويماي، قاجەتتى بولشەكتەردى شىعاراتىن تولىق سيكلدى ءوندىرىس سالۋعا يتەرمەلەدى. 2014 جىلى تولىق سيكلدى ءوندىرىس قۇرىلىسىن جۇرگىزۋ تۋرالى شەشىم قابىلداندى.

2016 جىلدىڭ ماۋسىم ايىندا نۇرسۇلتان نازاربايەۆ وسكەمەن قالاسىنداعى تولىق سيكلدى اۆتوكولىك ءوندىرىسى سالىنىپ جاتقان اۋماقپەن تانىستى. وتاندىق اۆتوكولىك قۇراستىرۋ ءوندىرىسىنىڭ تاعدىرۋ ۇنەمى قازاقستان پرەزيدەنتىنىڭ نازارىندا.

يرينا پلوتنيكوۆا