قازاقستان ەكونوميكاسىنىڭ نەگىزى ءالى دە شيكىزات ەكسپورتىنا باعىتتالعان. ەكونوميكانىڭ بۇل قۇرىلىمى قازاقستان رەسەي يمپەرياسىنىڭ بودانى بولعان جىلدارى قالىپتاستى. كەڭەس داۋىرىندە جۇرگىزىلگەن يندۋستريالاندىرۋ كەزىندە رەسپۋبليكانىڭ العا قويعان باستى باعىتى – شيكىزات ءوندىرۋ سالاسى بولدى، — دەپ جازادى Qamshy.kz اقپارات اگەنتتىگى. 

جاس تاۋەلسىز مەملەكەتتىڭ ەگەمەندىگى ءۇشىن مۇنداي جاعداي وتە ءقاۋىپتى. سەبەبى الەمدىك داعدارىس ورىن العاندا ءبىرىنشى كەزەكتە شيكىزات ەكسپورتتاۋشىلار زارداپ شەكپەك. ويتكەنى سول ۋاقىتتا شيكىزاتتىڭ قۇنى جوعارى تەحنولوگيالىق ونىمدەرگە قاراعاندا الدەقايدا ارزانىراق بولادى.

مەملەكەت باسشىسى نۇرسۇلتان نازاربايەۆ «قازاقستان-2030» ستراتەگياسىندا ەكونوميكانىڭ شيكىزاتتىق ەمەس سەكتورىندا ەكسپورتقا باعىتتالعان جوعارى تەحنولوگيالىق وندىرىستەردى قۇرۋ تۋرالى تاپسىرما بەردى.

2007 جىلدىڭ 27 قىركۇيەگىندە سەمەي قالاسىندا «سەماز» ج ش س وندىرىستىك ۋچاسكەلەرىندە Daewoo اۆتوبۋستارىن شىعاراتىن زاۋىتتىڭ اشىلۋ سالتاناتى ءوتتى.

بۇل ءوندىرىس قازاقستانداعى تولىق سيكلدى اۆتوكولىك قۇراستىراتىن العاشقى كاسىپورىن بولدى، وسىنىڭ ارقاسىندا ەلىمىز يمپورتتىق كولىك قوندىرعىلارىنىڭ جيىنتىعىن جيناپ قانا قويماي، سونداي-اق قۇراستىرۋ، دانەكەرلەۋ جانە شاناقتى بوياۋ مۇمكىندىگىنە يە بولدى.

بۇرىندارى جوعارى تەحنولوگيالىق وندىرىستەرى بولماعان سەمەي قالاسى ءۇشىن بۇل تاپتىرماس جاڭاشىلدىقتىڭ بولعانى ايتپاسا دا تۇسىنىكتى. رەسپۋبليكاعا 2،5 ملن. اقش دوللارى كولەمىندە شەتەلدىك ينۆەستيسيالار كەلىپ ءتۇستى. وسىنىڭ ناتيجەسىندە قالادا جاڭا جۇمىس ورىندارى قۇرىلدى.

2009 جىلعى 18 ماۋسىمدا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «Daewoo Bus Kazakhstan» اۆتوبۋس زاۋىتىندا بولىپ، مەملەكەتتىڭ ماشينا جاساۋ كەشەنىنە قولداۋ كورسەتەتىندىگىن ايتتى.

ون جىلدان استام ۋاقىت بويى جۇمىس ىستەگەن زاۋىت جاڭا ونىمدەردى شىعارۋىن ارى قاراي دا جالعاستىرۋدا. بۇل جەردە بىرنەشە جۇك ماشينالارى مەن تراكتورلار شىعارىلىپ، رەسەيلىك شاعىن اۆتوبۋستاردىڭ قۇراستىرىلۋى جونگە قويىلعان. بۇگىنگى تاڭدا اۆتوكولىك قۇراستىرۋ زاۋىتىندا 450 ادام جۇمىس ىستەيدى. 2017 جىلى سەمەي قالاسىنداعى اۆتوكولىك قۇراستىرۋ كومپانياسى «التىن ساپا» سىيلىعىنا ۇمىتكەرلەردىڭ تىزىمىنە ەنىپ وتىر.

يرينا پلوتنيكوۆا