جۇڭگو حالىق رەسپۋبليكاسىنداعى ەتنيكالىق قازاقتاردىڭ ءتۇرلى ماسەلەلەر بويىنشا وتىنىشتەرىنىڭ جيىلەنۋىنە بايلانىستى قازاقستان جانە جۇڭگو ديپلوماتيالىق ۆەدومستۆولارى قازاق دياسپوراسىنىڭ ماسەلەلەرىن تالقىلاۋ ءۇشىن جۇيەلى تۇردە كونسۋلتاسيالار وتكىزۋدە، — دەپ حابارلايدى Qamshy.kz اقارات اگەنتتىگى ءسىم باسپا ءسوز قىزمەتىنە سىلتەمە جاساي وتىرىپ.
27 قاراشادا ق ر سىرتقى ىستەر ءمينيسترىنىڭ ورىنباسارى اقىلبەك كامالدينوۆ قحر ەلشىسى چجان حانحۋەيمەن كەزدەستى. سونداي-اق قازاقستان رەسپۋبليكاسى سىرتقى ىستەر مينيسترلىگىنىڭ كونسۋلدىق قىزمەت دەپارتامەنتى جانە استاناداعى قحر ەلشىلىگىنىڭ كونسۋلدىق ءبولىم باسشىلىعىمەن قازاق دياسپوراسىنا (قحر ازاماتتارى) بايلانىستى ماسەلەلەردى شەشۋ جولىنداعى ىنتىماقتاستىق جونىندەگى كونسۋلتاسيالار وتكىزىلدى. 9 قاراشادا قازاقستان رەسپۋبليكاسىنىڭ قىتايداعى ەلشىسى شاحرات نۇرىشيەۆ قحر سىرتقى ىستەر ءمينيسترىنىڭ كومەكشىسى (ۆيسە-مينيستر) لي حۋەيلايمەن كەزدەستى.
ۇستىمىزدەگى جىلدىڭ سوڭىنا دەيىن ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى ءۇرىمجى قالاسىنا قحر شىنجاڭ ۇيعىر اۆتونوميالىق اۋدانى جانە قحر ش ۇ ا ر سىرتقى ىستەر باسقارماسى باسشىلىعىمەن كەزدەسۋ ماقساتىمەن، سونداي-اق ق ر ءسىم پاسپورت جانە ۆيزالىق قىزمەت ينسپەكسياسىن جاساۋ ءۇشىن جۇمىس ساپارىمەن بارادى.
سونىمەن قاتار، جەلتوقساندا سىرتقى ىستەر ءمينيسترىنىڭ ورىنباسارى ا. كامالدينوۆتىڭ بەيجىڭ قالاسىنا كۇن تارتىبىندە قحر قازاق دياسپوراسىنىڭ ماسەلەلەرى قامتىلاتىن قر-قحر قاۋىپسىزدىك سالاسىنداعى ىنتىماقتاستىق جونىندەگى كىشى كوميتەتتىڭ جانە ەكى ەلدىڭ سىرتقى ىستەر مينيسترلىكتەرى اراسىنداعى ساياسي كونسۋلتاسيالار وتىرىسىن وتكىزۋ ماقساتىندا جۇمىس ساپارى جوسپارلانعان.
ەلباسى نۇرسۇلتان نازاربايەۆتىڭ تاپسىرمالارىنا سايكەس شەتەلدەگى قازاق دياسپوراسىنا قاتىستى ماسەلەلەر ق ر ءسىم قىزمەتىنىڭ باسىم باعىتتارىنىڭ ءبىرى بولىپ تابىلادى جانە ەكىجاقتى كەلىسسوزدەر مەن قازاقستاننىڭ سىرتقى ساياسي ۆەدومستۆوسىنىڭ باسقا ەلدەردىڭ ءتيىستى ورگاندارىمەن كەزدەسۋلەرىنىڭ كۇن تارتىبىنە جۇيەلى تۇردە ەنگىزىلەدى.
پىكىر قالدىرۋ