قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ حالىققا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ايتىلعان دەرەكتەر مەن دايەكتەر كۇن ساناپ ءمانى مەن ماڭىزى جاعىنان بالاماسىز دۇنيەگە اينالىپ كەلەدى. 

ماڭعىستاۋ وبلىسىندا تۋريستەرگە جاعداي جاساپ، ءتۋريزمدى دامىتۋ ماقساتىندا قولعا الىنعان جوبالاردىڭ ءبىرى «اتا جولى» اۆتوجولىن جاڭارتۋ جۇمىستارى. بۇل ەلباسى نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا ايتىلعان «وڭىرلەردىڭ دامۋى-ەلدىڭ دامۋى» تاپسىرماسىنا سايكەس ىسكە اسىرىلىپ جاتقان جوبا، دەپ حابارلايدى Qamshy.kz ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

ۇزىندىعى 97 شاقىرىمدى قۇرايتىن جول 2011 جىلى پايدالانۋعا بەرىلگەن. الايدا، بىرنەشە قاباتتان تۇراتىن اۆتوجولدىڭ سوڭعى قاباتى، ياعني اسفالتتاۋ جۇمىستارى بيىل قولعا الىنىپ، وعان 5 ملد. تەڭگە ءبولىنىپ وتىر. جوبانىڭ رەكونسترۋكسيالاۋ جۇمىستارى باستالىپ، ماڭعىستاۋ وبلىسى قاراقيا اۋدانىنىڭ اۋماعىندا اسفالت توسەلدى.

شارانىڭ اشىلۋ سالتاناتىندا ءسوز العان وبلىس اكىمى ەرالى توعجانوۆ: «مەملەكەت باسشىسى نۇرسۇلتان نازاربايەۆ ءوزى اتاپ وتكەندەي وتاندىق ءتۋريزمدى دامىتۋ ءۇشىن الدىمەن لوگيستيكا مەن ينفراقۇرىلىمدى جانداندىرۋىمىز قاجەت. بۇگىنگى «اتا جولى» اۆتوجولىن جاڭارتۋداعى نەگىزگى ماقساتىمىز وسى. ياعني، ساپالى جول سالىنسا، ەل-جۇرت كەلەدى، تىرشىلىك باستالادى. باسقا دا قىزمەت كورسەتۋ ورتالىقتارى بوي كوتەرىپ، كوپتەگەن كاسىپكەردىڭ تابىس تابۋىنا جول اشىلارى انىق. بۇل جول جاقسىلىققا باستايتىن جول بولماق» دەدى. سونداي-اق ول بۇل جاڭارتۋ جۇمىستارى ۇكىمەتتىڭ قولداۋى ارقىلى ماڭعىستاۋ وبلىسى اكىمدىگى مەن ق ر ينۆەستيسيالار جانە دامۋ مينيسترلىگى بىرلەسىپ اتقارىپ جاتقان كوپ ىستەردىڭ ءبىرى عانا ەكەنىن اتاپ ءوتتى.