ەلىمىزدىڭ 2025 جىلعا دەيىنگى دامۋىنىڭ ستراتەگيالىق جوسپارى بەكىتىلدى، دەپ حابارلايدى Qamshy.kz
مينيسترلەر كابينەتى بىرنەشە اي بويى قىزۋ تالقىلانعان قۇجاتتى ءبىراۋىزدان قولدادى. ونى تالقىلاۋعا بەدەلدى ساراپشىلار، ءىرى كومپانيالار مەن دۇنيەجۇزىلىك بانك وكىلدەرى قاتىستى. ستراتەگيالىق جوسپار قازاقستاننىڭ ەكونوميكالىق ءوسىمىنىڭ جاڭا مودەلىن قۇرىپ، حالىقتىڭ ءال-اۋقاتىن جاقسارتۋعا باعىتتالعان.
ونىڭ باستى ماقساتى – ەلىمىزدىڭ 2050 جىلعا دەيىنگى دامۋ ستراتەگياسىندا كورسەتىلگەن ماقساتتاردى جۇزەگە اسىرۋ. قۇجاتقا سايكەس ادام كاپيتالىن، ءوندىرىستى ارتتىرۋ، بيزنەسكە قولداۋ كورسەتۋ، جالپى ىشكى ءونىمدى ۇلعايتۋ سىندى 7 رەفورما ورىندالادى.
– 2025 جىلعا دەيىنگى دامۋىنىڭ ستراتەگيالىق جوسپارى قازاقستاننىڭ ءۇشىنشى جاڭعىرۋ باسەكەگە قابىلەتتىلىك جولداۋىن جۇزەگە اسىرۋ ماقساتىندا ازىرلەنگەن. ءبىرىنشى دەڭگەيدەگى قۇجات بولىپ تابىلادى. قۇجات 2020 جىلعا دەيىنگى دامۋ جوسپارىنىڭ ورنىنا ازىرلەندى. حالىقتىڭ پىكىرى ەسكەرىلدى. ءوڭىرلى فوكۋس توپتارمەن كەزدەسۋ وتكىزىلدى، - دەپ اتاپ ءوتتى ق ر ۇلتتىق ەكونوميكا ءمينيسترى تيمۋر سۇلەيمەنوۆ جيىندا.
ەلباسى جولداۋىندا «بۇگىن مەن قازاقستاندى ءۇشىنشى جاڭعىرتۋ جونىندە مىندەت قويىپ وتىرمىن. ەلدىڭ جاھاندىق باسەكەگە قابىلەتتىلىگىن قامتاماسىز ەتەتىن ەكونوميكالىق ءوسىمنىڭ جاڭا مودەلىن قۇرۋ قاجەت»، دەپ كورسەتىلگەن.
پىكىر قالدىرۋ