وڭتۇستىك كورەيانىڭ بۇرىنعى ازاماتشاسى پحەنچحاندا وتەتىن قىسقى وليمپيادادا قازاقستان نامىسىن قورعايدى، دەپ جازادى Qamshy.kz اقپارات اگەنتتىگى. بۇل تۋرالى 24.kz پورتالى حابارلادى. 

كيم يونگ ا – قازاقستاننىڭ شورت-ترەكتەن ايەلدەر قۇراماسىنىڭ سپورتشىسى.

 الەم كۋبوگىنىڭ ءۇش كەزەڭىنىڭ قورىتىندىسى بويىنشا قازاقستان ازاماتتىعىن العان كيم ەكى ليسەنزيا جەڭىپ العان. يونگ ا-نىڭ اكەسى كيم دجونگ گون قىزىنىڭ قول جەتكىزگەن  مەدالدارىن كوزىنىڭ قاراشىعىنداي ساقتاپ وتىر.

دارىگەر، ديزاينەر، مۋزىكانت جانە سپورتشى ماماندىعىن تاڭداعان ءتورت قىزدى تاربيەلەگەن اكە قانداي ماقتاۋعا بولسىن لايىق ازامات. ءونا ءتورتىنشى سىنىپتان باستاپ كونكيمەن جۇگىرۋ سپورتىمەن اينالىسا باستاعان. سپورتشى قىز كورەيا مەن ازيادا ۇزدىكتەر قاتارىندا. 

ونى ەلىمىزگە قازاقستان قۇراماسىنىڭ جەتەكشىسى بولعان بۇرىنعى جاتتىقتىرۋشىسى شاقىرعان.  يونگ ا-نىڭ قازاقستان ازاماتتىعىن الۋ شەشىمىنە اتا-اناسى تۇسىنىستىكپەن قاراعان. 

كيم دجونگ گون، كيم يونگ انىڭ اكەسى:

- ءقازىر قاي ەل ۇناسا سول ەلدىڭ ازاماتتىعىن الۋعا مۇمكىندىك بار. سپورتشى رەتىندە ارمانىڭا قول جەتكىزەتىن ەلدە ءومىر ءسۇرۋ - وتە كەرەمەت جانە بىرەگەي باقىت. قازاقستان تۇرعىندارى وتە مەيىرىمدى جانە اۋقاتتى تۇراتىنىن بىلەمىن. ۇلكەن اۋماعى دا ادامدارعا ەركىندىك بەرەدى، ءارى كورەيامەن سالىستىرعاندا ول جاقتىڭ اۋاسى تازا.  

قازاقستان قۇراماسىندا وعان ەلىمىزدىڭ داڭقتى قىزى ءاليا مولداعۇلوۆانىڭ قۇرمەتىنە وراي ءاليا دەگەن ەسىم بەرىلگەن.

استانادا تۇرعان ءۇش جىل ىشىندە كيم يونگ ا قازاقتىڭ ءتىل ۇيىرەر تاعامدارىن سۇيسىنە جەپ، قازاق ءتىلىن ۇيرەنۋدى باستاپ كەتكەن.

كيم يونگ ا، شورت-ترەكتەن قازاقستان قۇراماسىنىڭ مۇشەسى:

- قازاقستانمەن سالىستىرعاندا كورەياداعى مۇز الاڭدارى الدەقايدا سۋىق. سوندىقتان دا جاتتىعۋ جاساعان قولايلى. ءپحونچحاندا مەنىڭ بۇكىل ءومىرىم ءوتتى، اۋا-رايىن دا جاقسى بىلەمىن، اس-اۋقاتى دا ۇيرەنشىكتى مەن ءۇشىن. سوندىقتان دا وسىندا وتەتىن وليمپيادادا جەڭىسكە جەتۋگە بار كۇش-جىگەرىمدى سالامىن. 

كيم يونگ ا شورت-ترەكتەن ايەلدەر قۇراماسىمەن بىرگە  وليمپيادا الدىنداعى جاتتىعۋلارىن وڭتۇستىك كورەيادا وتكىزەتىن بولادى. بايراقتى باسەكە  الدىندا اتا-انانىڭ قولداۋى دا ماڭىزدى. ولار جاتتىعۋ كەزىندە قىزدارىنىڭ جانىنان تابىلۋ ءۇشىن ءپحونچحانداعى وليمپياداعا بيلەت تە الىپ قويىپتى.