جىل سايىن قاراشانىڭ 19-ىندا قازاقستاننىڭ قارۋلى كۇشتەرىندە زىمىران اسكەرلەرى مەن ارتيللەريا كۇنى اتاپ وتىلەدى. ياعني، تاريحقا ەنگەن وسى ايتۋلى كۇندى بۇگىنگى كۇنگە دەيىن تەك قازاقستان رەسپۋبليكاسى قارۋلى كۇشتەرىنىڭ زىمىران اسكەرلەرى مەن ارتيللەرياسى عانا ەمەس، كوپتەگەن كەڭەس ۇكىمەتىنىڭ قۇرامىندا بولعان مەملەكەتتەر ءداستۇرلى مەرەكە رەتىندە قاراستىرادى.  
اتالمىش كاسىبي مەرەكە مەملەكەتتىڭ قورعانىسى مەن قاۋىپسىزدىگىن قامتاماسىز ەتۋ مىندەتتەرىن شەشۋدەگى اسكەري مامانداردىڭ زور ەڭبەگىن مويىنداۋ نىشانى ىسپەتتى.
جالپى، ق ر قك زىمىران اسكەرلەرى مەن ارتيللەرياسى  ق ر پرەزيدەنتىنىڭ 2003 جىلعى 7 مامىرداعى جارلىعىمەن قۇرىلدى.
قازاقستاندىق ارميانىڭ زىمىران اسكەرلەرى جانە ارتيللەريا قارسىلاستى اتىسپەن زاقىمداۋدا تاپسىرمالاردىڭ نەگىزگى كولەمىن ورىندايتىن قۇرلىق اسكەرلەرىنىڭ نەگىزگى وق اتۋشى كۇشى بولىپ تابىلادى. اتالمىش اسكەر ءتۇرىنىڭ ەرەكشەلىگى جوعارى مانيەۆرلىك، دالدىك، جىل، تاۋلىك مەزگىلى، اۋا رايى جانە تاعى دا باسقا جاعدايلاردا سوققى تيىمدىلىگى تاۋەلدىلىگىنىڭ بولماۋى بولىپ تابىلادى. ءزاجا تاكتيكالىق زىمىرانداردىڭ قۇرامالارىنان، گاۋبيسالىق، زەڭبىرەكتىك، رەاكتيۆتى جانە تانكىگە قارسى ارتيللەريادان، ارتيلللەريالىق بارلاۋدان، مينااتقىش جانە تانكىگە قارسى بولىمشەلەردەن تۇرادى. قازىرگى ۋاقىتتا بارلىق دەسانتتىق-شابۋىلداۋ باتالوندارىندا مينااتقىش باتارەيالارى تىرەۋىش تاقتايشاسىن الماستىرۋسىز 360 گرادۋسقا اتىستى جۇرگىزۋگە مۇمكىندىك بەرەتىن 2015 جىلى شىعارىلعان  82 مم 2ب24 «ديەۆا» جاڭا زاماناۋي مينااتقىشتارعا قايتا جاراقتاندىرىلعان.  
ق ر قك زىمىران اسكەرلەرى مەن ارتيللەرياسىنىڭ جەكە قۇرامى جاۋىنگەرلىك جانە دەنە دايارلىعىنىڭ جوعارى دەڭگەيىن پاش ەتە وتىرىپ، ءارتۇرلى قازاقستاندىق جانە حالىقارالىق وقۋ-جاتتىعۋلارعا بەلسەنە قاتىسادى. مۇنىڭ ايقىن دالەلى رەتىندە اتالعان اسكەر ءتۇرى ارميا حالىقارالىق ويىندارىنداعى «ارتيللەريالىق وق اتۋ شەبەرلەرى» بايقاۋىندا ءساتتى ونەر كورسەتىپ، ءبىرىنشى ورىندى ەنشىلەگەن بولاتىن.  وزدەرىنىڭ كاسىبي دايىندىقتارى مەن جاۋىنگەرلىك ماشىقتارىن  ۇدايى جەتىلدىرىپ وتىرعاندارىنىڭ ارقاسىندا ق ر قك زىمىران اسكەرلەرى مەن ارتيللەرياسى ق ر قك جوعارعى باس قولباسشىسى قويعان تاپسىرمالاردىڭ ۋاقتىلى جانە ساپالى ورىندالۋىنا كەپىل بەرەدى.