قازاقستان |رەسپۋبليكاسىنىڭ قورعانىس ءمينيسترىنىڭ ورىنباسارى گەنەرال-لەيتەنانت تالعات مۇحتاروۆتىڭ جەتەكشىلىك ەتۋىمەن قازاقستان رەسپۋبليكاسى قورعانىس مينيسترلىگىنىڭ دەلەگاسياسى جۇمىس ساپارىمەن ءۇندىستان رەسپۋبليكاسىنىڭ نيۋ-دەلي قالاسىنا باردى. ساپار بارىسىندا ءۇندىستاننىڭ قورعانىس ءمينيسترى نيرمالا سيتارامان حانىممەن، ءۇندىستان قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال بيپين راۆات جانە قورعانىس ىستەرى جونىندەگى مەملەكەتتىك حاتشى ساندجاي ميترامەن كەزدەسۋلەر ءوتتى. مينيسترلىكتىڭ باسپا ءسوز قىزمەتى ءمالىم ەتكەندەي، كەزدەسۋ اياسىندا تاراپتار قازاقستاندىق بىتىمگەرشىلىك روتانىڭ بۇۇ ميسسياسىندا ۇندىلەر كونتينگەنتىنىڭ قۇرامىندا قاتىسۋى، سونداي-اق قورعانىس سالاسىنداعى ەكىجاقتى ىنتىماقتاستىق ماسەلەلەرىن تالقىعا سالدى. ءۇندىستان قورعانىس مينيسترلىگى مەن قارۋلى كۇشتەرىنىڭ باسشىلىعىمەن كەزدەسۋلەر جان-جاقتى،  سەنىمدى سيپاتتا ءوتتى. ساپار قورىتىندىسى بويىنشا ۇندىلىك تاراپ قورعانىس سالاسىندا قازاقستانمەن ءوزارا ءىس-قيمىلدى ءارى قاراي نىعايتا تۇسۋگە قىزىعۋشىلىعىن ءبىلدىردى.

سونداي-اق ءۇندىستان رەسپۋبليكاسىنىڭ باكلوح قالاسىندا قازاقستان رەسپۋبليكاسى مەن ءۇندىستان رەسپۋبليكاسى قارۋلى كۇشتەرىنىڭ ارنايى ماقساتتاعى بولىمشەلەرىنىڭ قاتىسۋىمەن «پرابال-دوستىق-2017» كەزەكتى ەكىجاقتى لاڭكەستىككە قارسى وقۋ-جاتتىعۋى ءوتتى. ءۇندىستان رەسپۋبليكاسىنىڭ باكلوح قالاسىندا «نود» دايىندىق ورتالىعىنىڭ بازاسىندا ەكى ەلدىڭ قورعانىس ۆەدومستۆولارىنىڭ اراسىنداعى ەكىجاقتى اسكەري ىنتىماقتاستىق جوسپارىنا سايكەس لاڭكەستىككە قارسى وقۋ-جاتتىعۋ وتكىزىلۋدە. وعان قازاقستان رەسپۋبليكاسى مەن ءۇندىستان قارۋلى كۇشتەرىنىڭ ەلۋدەن اسا اسكەري قىزمەتشىسى قاتىسۋدا. وقۋ-جاتتىعۋدىڭ ماقساتى لاڭكەستىككە قارسى ءىس-شارالاردى وتكىزۋ جانە ەلدى مەكەندەردە جاۋىنگەرلىك ءىس-قيمىلداردى جۇرگىزۋ، زاڭسىز قارۋلى قۇرالىمداردى انىقتاۋ، وقشاۋلاۋ جانە جويۋ كەزىندە بولىمشەلەردىڭ تاكتيكاسى مەن ءىس-قيمىلدارىنىڭ ماسەلەلەرىن پىسىقتاۋ بولىپ تابىلادى.
سونداي-اق قازاقستاننىڭ اسكەري ىنتىماقتاستىعىنىڭ جان-جاقتى نىعايعانىن تاعى ءبىر دەرەك دالەلدەي تۇسكەندەي. قازاقستاننىڭ اسكەري دەلەگاسياسى  قورعانىس ءمينيسترىنىڭ باسشىلىق ەتۋىمەن 15 – حالىقارالىق «Dubai Airshow 2017» كورمەسىنە قاتىستى. «Dubai Airshow» ۇكىمەت پەن بىرىككەن اراب امىرلىكتەرى قارۋلى كۇشتەرىنىڭ قولداۋىمەن وتكىزىلەتىن اسكەري جانە ازاماتتىق اۆياونەركاسىپ سالاسىنداعى جەتەكشى الەمدىك وقيعا بولىپ تابىلادى. اۆياسيالىق-عارىش سالونىنىڭ جۇمىسى بارىسىندا قازاقستاندىق دەلەگاسيا اسكەري، ونىڭ ىشىندە، ۇشقىشسىز اۆياسيانىڭ تىڭ جاڭالىقتارى جانە دامۋ ۇردىستەرىمەن تانىستى. كورمە شەڭبەرىندە قورعانىس ءمينيسترى ءباا قورعانىس ىستەرى جونىندەگى مەملەكەتتىك ءمينيسترى شەيح مۇحاممەد بەن احمەد ال-باۋارديمەن كەزدەستى. تاراپتار اسكەري ىنتىماقتاستىقتىڭ دامۋىنىڭ كەلەشەك باعىتتارىن تالقىلادى جانە ولاردى جوسپارلى نەگىزگە كوشىرۋ تۋرالى تاراپتاردىڭ نيەتتەرىن راستادى.

–ءباا ءامىرشىسى شەيح زايد بەن سۇلتان ءال-ناحايان جانە ق ر پرەزيدەنتى نۇرسۇلتان نازاربايەۆ نەگىزىن قالاعان ەلدەرىمىز اراسىنداعى سەنىمدىلىك قارىم-قاتىناستار جىل سايىن نىعايا تۇسۋدە جانە اناعۇرلىم جوعارى دەڭگەيگە شىعىپ كەلەدى. قاتىسۋشىلار رەتىندە جانە باقىلاۋشىلار رەتىندە بولسىن، قازاقستان رەسپۋبليكاسىنىڭ اۋماعىندا وتكىزىلەتىن وقۋ-جاتتىعۋلار مەن سايىستارعا ءباا قارۋلى كۇشتەرى اسكەري قىزمەتشىلەرىنىڭ جاۋىنگەرلىك دايارلىعى مەن قاتىسۋىنا ايرىقشا نازار اۋدارعىم كەلەدى، – دەپ قازاقستان رەسپۋبليكاسى قورعانىس ءمينيسترى قۇتتىقتاۋ سوزىندە اتاپ ءوتتى. سونداي-اق  قازاقستاندىق اسكەري ۆەدومستۆو باسشىسىنىڭ ءباا باس شتابىنىڭ باستىعى گەنەرال-لەيتەنانت حاماد مۇحاممەد تاني ال-رۋمەيسيمەن كەلىسسوزدەرى ءوتتى. وندا وڭىرلىك قاۋىپسىزدىك، زاماناۋي قاۋىپ-قاتەرلەرگە توتەپ بەرۋ ماسەلەلەرى جونىندە پىكىر الماسۋ وتكىزىلدى. ودان باسقا، ءباا ااك قولباسشىسى اۆياسيا گەنەرال-مايورى يبراگيم ناسەر ءال-الاۋيدىڭ باستاماسىمەن ق ر قك اۋە قورعانىسى كۇشتەرىنىڭ باس قولباسشىسى اۆياسيا گەنەرال-مايورى نۇرلان كاربەنوۆپەن كەزدەسۋ ۇيىمداستىرىلدى. دەلەگاسيانىڭ وتكىزگەن جۇمىس قورىتىندىسى بويىنشا تاياۋ بولاشاقتا قورعانىس سالاسىنداعى قازاقستان مەن بىرىككەن اراب امىرلىكتەرى ءوزارا ءىس-قيمىلىن دامىتۋ مەن نىعايتۋدىڭ قوسىمشا باعىتتارى ايقىندالدى.