الاش جۇرتى ءۇشىن ايتۋلى داتا
2017 جىل... بارشا قازاق جۇرتشىلىعى ءۇشىن ەلەۋلى ۋاقىت. بۇل جىلى الاشوردا ۇكىمەتىنىڭ قۇرىلعانىنا عاسىر تولدى. الاشوردا ۇكىمەتىن قۇرعان الاش زيالىلارى – بۇگىنگى تاۋەلسىز قازاق ەلىنىڭ نەگىزىن قالاپ كەتكەن تاريحي تۇلعالار. ولار – سوۆەتتىك قىزىل قىرعىندا قۋعىن-سۇرگىنگە ۇشىراعان جاندار. بۇگىنگى تاۋەلسىز قازاقستاننىڭ جولىندا جان قيعان الاش ارىستارىنىڭ ەرلىگىن دارىپتەپ، الاش يدەياسىن كەيىنگى ۇرپاققا ۇلگى ەتۋ – ءار قازاقتىڭ بورىشى.
5 شارانى قولعا العان
2017 جىلدىڭ 1 اقپانىندا ۇكىمەت وتىرىسىندا سول كەزدەگى ۇكىمەت باسشىسى ورىنباسارى يمانعالي تاسماعامبەتوۆ «الاشتىڭ 100 جىلدىعىنا دۇرىستاپ دايىندالۋىمىز كەرەك. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى»، - دەپ ايتقان ەدى. وعان قازاق ءتىلدى باق-تار مەن الاشتانۋشىلار مەن الاش قايراتكەرلەرىنىڭ ءومىر جولىن زەرتتەۋشى عالىمدار دا ءوز ۇلەستەرىن قوسىپ جاتىر. ءارى، الاشوردا ۇكىمەتىنىڭ 100 جىلدىعىنا وراي ەلىمىزدە ءتۇرلى دەڭگەيدە ءارتۇرلى ءىس-شارالار اتقارىلىپ كەلەدى.
الاش زيالىلارىنا ارنالعان Qamshy.kz اقپارات اگەنتتىگىنىڭ كورمەسى
وسىعان وراي Qamshy.kz اقپارات اگەنتتىگى جىل باستالعالى 5 ءىس-شارانى قولعا العان. ناۋرىزدىڭ 5-ىندە احمەت بايتۇرسىن ۇلى اتىنداعى ءمۇراجاي-ۇيىنىڭ الدىندا الاش ارىستارىنا ارناپ اس بەردى، 500-گە جۋىق ادامعا داستارحان جايدى. ال ساۋىردە احمەت بايتۇرسىن ۇلى ساياباعىنا 100 اعاش وتىرعىزىلدى. ونىڭ جالعاسى رەتىندە 100 جەتىم بالا مەن الەۋمەتتىك جاعدايى تومەن 100 ستۋدەنتكە قارجىلاي كومەك كورسەتۋ ءۇشىن 24 قاراشادا «الاتاۋ» ءداستۇرلى ونەر تەاترىندا قايرىمدىلىق كونسەرت ۇيىمداستىردى. Qamshy.kz اقپارات اگەنتتىگى جىل سوڭىنا دەيىن «الاشتىڭ 100 ءىزباسارى» دەگەن اتپەن ەلگە ەڭبەك ەتىپ جۇرگەن مەملەكەت قايراتكەرلەرى اراسىنان 10 ادامعا «الاشوردا – 100 جىل» مەرەكەلىك مەدالىن تابىستايدى.
جىلاماسىن سابيلەر: 100 جەتىم بالا مەن 100 ستۋدەنتكە كومەك كورسەتۋ
قايىرىمدىلىق كەشىنە ونەرپاز ۇشقىن جامالبەكتىڭ باستاۋىمەن قۇرىلعان Ugai پروديۋسەرلىك ۇجىمى قولداۋ كورسەتىپ، اتالمىش ۇجىمنىڭ انشىلەرى ونەر كورسەتتى. اسەت ەسجان مەن ولجاس ابايدىڭ ورىنداۋىنداعى Qamshy.kz اقپارات اگەنتتىگىنىڭ گيمنى، ءبىلال قۋانىشتىڭ سوزىنە جازىلعان «ءدۇر قامشى» ءانى كەشتە وتىرعان ءار قازاقتى رۋحتاندىردى، جىگەرلەندىردى. بۇعان كورەرمەندەردىڭ ۇزاق سوققان قوشەمەتى دالەل. سونىمەن بىرگە الاش ۇلى ەتنو-توبى مەن دانا كەنتاي سىندى جاس انشىلەر قايىرىمدىلىق كەشىنە ءوز ۇلەستەرىن قوستى. جۇرەگى «الاش» دەپ سوققان ءار ازامات مۇقتاج جاندارعا قول ۇشىن سوزۋعا قاشان دا دايىن قايىرىمدى جاندار بيلەت ساتىپ الۋمەن قاتار، رۋحتى كەشتىڭ كۋاسى بولدى.
قايىرىمدىلىق كەشىندە ونەر كورسەتۋ – مارتەبە
«بۇگىن «جىلاماسىن سابيلەر» دەپ اتالاتىن قايىرىمدىلىق كەشى ءوتىپ جاتىر. الماتى اكىمدىگى، «قامشى» اقپارات اگەنتتىگى جانە «Ugai» پروديۋسەرلىك ورتالىعىنىڭ ۇيىمداستىرۋىمەن ءوتىپ جاتىر. كەش 100 جەتىم بالا جانە الەۋمەتتىك جاعدايى تومەن 100 ستۋدەنتكە ارنالادى. قازاعىمنىڭ جەتىمى جىلاماسىن، ەلىمىز تىنىش بولسىن»، - دەدى ۇشقىن جامالبەك ءوز سوزىندە. ونىڭ ايتۋىنشا «جىلاماسىن سابيلەر» اتتى كەش «Ugai prodution» پروديۋسەرلىك ورتالىعىنىڭ قولداۋىمەن ۇيىمداستىرىلىپ وتىرعان العاشقى كونسەرتى جانە دە قادامىن وسىنداي يگى ىسپەن باستاعانىنا قۋانىشتى.
كەشتە ونەر كورسەتكەن انشىلەر وزگە كەشتەر مەن قايىرىمدىلىق كەشتە ونەر كورسەتۋدى سالىستىرۋعا كەلمەيتىنىن ايتادى. قايىرىمدىلىق كەشىنىڭ ساحناسىندا ونەر كورسەتە وتىرىپ، ەلگە كومەگىڭنىڭ تيگەنىن سەزىنۋ عاجاپ سەزىم دەيدى جاس ءانشى دانا كەنتاي.
«مۇنداي قايىرىمدىلىق كەشتەر ەلىمىزدە قارقىندى دامۋدا. ونەر ساحناسىندا جۇرگەنىمەن 1 جارىم جىلدىڭ ءجۇزى بولعانىمەن بۇگىنگى كۇنگە دەيىن ون شاقتى قايىرىمدىلىق كەشتە ونەر كورسەتىپ، قولداۋ تانىتىپ كەلەمىز. مۇنداي باستامالاردى قاشان دا قولدايمىن جانە ۇيىمداستىرۋشىلارعا ۇلكەن العىسىمدى جەتكىزەمىن»، - دەدى دانا Qamshy.kz اقپارات اگەنتتىگىنىڭ تىلشىسىمەن اڭگىمە بارىسىندا.
ەلگە Ochoou لاقابىمەن تانىلعان ولجاس اباي كەشتىڭ ەرەكشە وتكەنىنە ءدان ريزا بولدى.
«بۇگىن كەرەمەت كەش ءوتىپ جاتىر. قامشى اقپارات اگەنتتىگى مەن Ugai پروديۋسەرلىك ورتالىعىنىڭ ۇيىمداستىرۋىمەن الاشوردانىڭ 100 جىلدىعىنا وراي كەش ءوتتى. بىزدەن دە ءبىر يگى ءىس بولسىن دەپ جەتىم بالالارىمىزدىڭ قۇرمەتىنە ۇيىمداستىرىپ جاتقان جايىمىز بار»، - دەگەن ولجاس اباي كەشكە قولداۋ كورسەتكەن قازاق جۇرتىنا العىس ايتتى.
«سابيلەرىن، جەتىمىن جىلاتپاعان قازاقتىڭ ۇرپاعى رەتىندە وسىنداي شارالارعا اتسالىسىپ، ونەر كورسەتۋ – مەن ءۇشىن ۇلكەن مارتەبە»، - دەدى Ugai پروديۋسەرلىك ۇجىمىنىڭ مۇشەسى، ءانشىسى اسەت ەسجان.
الاشوردا ۇكىمەتىنىڭ 100 جىلدىعىنا وراي جىل باستالعالى ەكى مارتە جەكە كەشتەرىن وتكىزىپ ۇلگەرگەن «الاش ۇلى» توبىنىڭ جىگىتتەرى Qamshy.kz اقپارات اگەنتتىگىنىڭ ۇجىمىنا، باسشىلىعىنا زور العىستارىن ءبىلدىردى.
«2017 جىل الاشوردا ۇكىمەتىنىڭ قۇرىلعانىنا 100 جىل تولدى. بۇل بار قازاق ءۇشىن ايتۋلى مەرەكە. بۇل مەرەكەگە وراي ەلىمىزدە ءتۇرلى ءىس-شارالار اتقارىلىپ كەلەدى. سونىڭ باسىم كوپشىلىگىنە اتسالىسقان ءبىزدىڭ ماقتان تۇتاتىن تىلشىلەرىمىز، اعا-قارىنداستارىمىز Qamshy.kz اقپارات اگەنتتىگىنىڭ ۇجىمىنا العىسىمىزدى بىلدىرەمىز. الاشوردانىڭ 100 جىلدىعى دەپ 100 اعاش وتىرعىزۋ، اس بەرۋ، 100 جەتىم بالا مەن 100 ستۋدەنتكە كومەك كورسەتۋ سىندى يگى شارالاردى وتكىزىپ كەلەدى. وسىنداي باستامالارىڭىز العا باسسىن! الاشوردانىڭ 100 جىلدىعىنا اتسالىسقان Qamshy.kz پورتالى مەن الاشتىڭ ۇلدارى ءاردايىم بىرگەمىز»، دەدى الاش ۇلى ەتنو-توبىنىڭ جىگىتتەرى.
ستۋدەنتتەر مەن جەتىم بالالاردىڭ قۋانىشى ءھام العىسى
الاش تۋى استىندا كۇن سونگەنشە سونبەيتىن قازاقتىڭ جەتىمى جىلاماۋى ءتيىس، قينالعان جان وزىنە كومەكتەسۋگە دايىن باۋىرىنىڭ بار ەكەنىن سەزۋى، ءبىلۋى كەرەك. ءيا، ءبىر ۇجىم بار قازاقتىڭ جەتىمىن اسىراي الماس، كومەككە مۇقتاج باۋىرىنىڭ بارىنە بىردەي جاردەمدەسە الماس... الايدا ءسال دە بولسىن كومەگىم تيسە دەگەن نيەتتى العا تارتقان Qamshy.kz اقپارات اگەنتتىگى ەلىمىزدىڭ 100 جەتىمى مەن كومەككە مۇقتاج 100 ستۋدەنتىنە جاردەمدەسۋگە كۇش سالدى. «ءبىر جىرتىعىن جاماۋعا جارار» اقشالاي كومەك ۇسىنىپ، جۇزىنە كۇلكى ۇيالاتۋ – ماقساتى بولدى. بۇعان كومەك العان بالاقايلار مەن ستۋدەنتتەردىڭ قۋانىشىندا شەك جوق، العىستارىن توكتى.
ستۋدەنت اتوللا قۇرالاي قامشى پورتالىنىڭ جاڭالىقتارىن ۇنەمى وقىپ وتىراتىنىن ايتا كەتىپ، ۇجىم باسشىلىعىنا ريزاشىلىعىن جەتكىزدى. ءارى 200 بالاعا كورسەتىلۋ كەرەك كومەكتىڭ ءبىر ۇشى وزىنە تيگەنىنە زور قۋانىشىن جەتكىزدى.
بىرنەشە جىل بويى ۇلىنا اكە دە، انا دا بولىپ كەلگەن داۋلەت اعا بالاسىنا اناسىنىڭ ورنىن جوقتاتپاۋعا تىرىسىپ كەلەدى. بار تاپقان قارجىسى پاتەراقى مەن كوممۋنالدىق قىزمەتتەن اسپاي، ۇلى يسلامنىڭ الدىندا ىشكى قينالىسىن جاسىرىپ جۇرگەن ۋاقىتتا قامشى پورتالىنان ۇسىنىلعان اقشالاي كومەك ەر ادامنىڭ ەڭسەسىن كوتەرىپ جىبەرگەن. ادەمى كەشتى تاماشالاۋمەن قاتار، ۇلىنىڭ قىستىق كيىمىن الۋعا اقشا تابىلا قالعان داۋلەت اعا ۇجىمعا دەگەن شەكسىز العىسىن ءبىلدىرىپ، تەك العا باسۋىن تىلەدى.
«قامشى» ۇجىمى جەتىم بالالارعا كومەك كورسەتىپ جاتىر. كومەكتىڭ ءبىر ۇشى ماعان دا ءتيدى. اللا رازى بولسىن! وتكىزىپ جاتقان كەشتەرىڭىز ۇلكەن جاقسىلىقتىڭ باستاۋى بولسىن. ساۋابى مولىنان بولسىن! جارىمنان ايىرىلعالى ۇلىمدى جالعىز ءومىرىپ كەلەمىن، ونىڭ قيىن ەكەنىن سوزبەن ايتىپ جەتكىزە المايمىن. ۇلىمنىڭ اناسىن ىزدەگەنى بىلاي تۇرسىن، كەيدە كيەرگە كيىم تاپپاي جاتاتىن كەزدەر بولادى. تۋىستارىمىز اندا-ساندا كومەك كورسەتەدى، الايدا اركىمنىڭ ءوز وتباسى بار، ءوز ماسەلەسى ءوز باسىنا جەتەدى. ال ەندى قىس تا تايادى، كۇرتەشە مەن قالىڭ اياق كيىم الۋ كەرەك بولعان كەزدە، قامشى ۇجىمىنان اقشالاي كومەك كورسەتەمىز دەگەن ءسوزدى ەستىدىم. سۇراعانىم كوكتەن تۇسە قالدى. قامشىعا شەكسىز العىس بىلدىرەمىن، ەڭبەكتەرىڭىز جانا بەرسىن»، - دەپ سويلەدى جالعىزباستى اكە.
ۇلى مەن كەلىنىنەن ايىرىلعان زەينەش اجەي نەمەرەلەرىن ءوزى اسىراپ باعۋدا. حات تانىعالى تەك گازەت وقىپ كەلگەن اجەي بۇرىن-سوڭدى «قامشى» سايتى جايلى حابارسىز بولعانىن ايتتى. الايدا بۇل شارا وزىنە بەلگىسىز اقپارات اگەنتتىگى جايلى جاقسى پىكىر قالىپتاستىرۋىنا سەبەپ بولىپ، ەندىگى جەردە سايت وقىرمانى اتانعانىن ايتىپ، كۇلدى.
«كەشكە جاقىن نەمەرەلەرىمنىڭ تەلەفونىنان «قامشى» سايتىنىڭ جاڭالىقتارىن قاراپ شىعام. قاراعان سايىن يگى ىستەرىن ەسكە الىپ، كوزىمە جاس تا كەلەدى. زور العىسىمدى بىلدىرەمىن. 200 بالاعا بىردەي كومەك كورسەتۋ ەكىنىڭ ءبىرى جاساي بەرەتىن ءىس ەمەس. بىلۋىمشە، سايتقا نەبارى 5 جىل تولعان ەكەن. سوعان قاراماستان وسىنداي ۇلكەن شارانى قولعا العان ۇجىمعا بەلەستەردى باعىندىرسىن دەيمىن. ەكى نەمەرەمنىڭ قىستىق كيىمدەرى سىزدەردىڭ ارقالارىڭىزدا تۇگەندەلدى»، - دەگەن زەينەش اجەيدىڭ جانارىنان قۋانىشتىڭ جاسى توگىلدى.
ابىرويمەن وتكەن ايتۋلى شارا...
انشىلەرى دە، بيشىلەرى دە الاش ءۇشىن ونەر كورسەتكەن كەش ابىرويمەن ءوتتى.
كەش سوڭىندا Qamshy.kz اقپارات اگەنتتىگىنىڭ جەتەكشىسى ءبىلال قۋانىش جەتىم بالالار مەن مۇقتاج ستۋدەنتتەردىڭ وكىلدەرىنە 2 ميلليون تەڭگەلىك ەكى سەرتيفيكات تابىستادى.
«الەمدەگى بار قازاقتىڭ وتانى – تاۋەلسىز قازاقستان. بۇگىنگى بەيبىت ەلىمىز كوكتەن تۇسكەن جوق. الاش ارىستارىنىڭ قانىمەن، جانىمەن، تانىمەن كەلگەن. ءبىز الاش دەپ سويلەيمىز، الاش دەپ ءان ايتامىز، الاش دەپ جىر جازامىز. ءبارى دۇرىس، دەگەنمەن ءبىر ناقتى ءىس بولسا دا جاسايىق دەگەن نيەتپەن بۇگىنگى ءىسىمىز 100 جەتىم بالا مەن 100 مۇقتاج ستۋدەنتتىڭ جۇرەگىنە ءۇمىت ۇيالاتىپ، الاش ارىستارىنىڭ رۋحىنان ءتالىم الىپ جاتسا، ءبىزدىڭ ارمانىمىزدىڭ ورىندالعانى. وسى ىسكە ات سالىسىپ وتىرعان بارلىقتارىڭىزعا تەك قانا راحمەت ايتامىز. ءبىر ايتا كەتەرلىگى، قامشى اقپارات اگەنتتىگى قۇرىلعالى بەرى 5 جىلدا جاسالعان شارالاردىڭ ەشقايسىسىنا ءبىز مەملەكەت تاراپىنان ءبىر تيىن قاراجات العان جوقپىز. ونى تەك وزدەرىڭىز سياقتى اردا ازاماتتاردىڭ كومەگىمەن جاساپ وتىرمىز. ەندەشە ماڭگىلىك ەلىمىز بولۋى ءۇشىن بارلىعىمىز جۇدىرىقتاي جۇمىلىپ تاۋەلسىز قازاقستان ءۇشىن قىزمەت ەتە بەرەيىك»، — دەدى ءبىلال قۋانىش.
قايىرىمدىلىق كەشتىڭ شىمىلدىعى «مەن سەنى سۇيەمىن، قازاقستان» انىمەن جابىلدى. ايتا كەتەيىك، كەشكە الماتى قالاسىنىڭ اكىمدىگى قولداۋ ءبىلدىردى.
بارىنە ورتاق ءبىر ماقسات – قازاقتىڭ بۇگىنى ءۇشىن قان توككەن، جانىن پيدا ەتكەن الاش ارىستارىنىڭ ەسىمىن ماڭگى ەتۋ، وزىنە ۇلگى ەتە وتىرىپ، بولاشاق ۇرپاققا دارىپتەۋ. جۇرەگى الاششىل، ءارى ەلى مەن جەرىنىڭ بىرلىگىن، ۇلتىنىڭ قامىن كۇيتتەگەن ازاماتتار باردا الاشتىڭ تۋى قۇلامايدى، جەتىمى جىلامايدى.
گۇلىم جاقان
فوتو: ادىلەت راحمەتوللا
پىكىر قالدىرۋ