الماتىداعى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا استانانىڭ 20 جىلدىعىنا ارنالعان حالىق اندەرىن ورىندايتىن جىرشىلاردىڭ حالىقارالىق «ۇلى دالا ەلى» فەستيۆالى ءوتتى.

بۇگىنگى تاڭدا الماتىدا «رۋحاني جاڭعىرۋ» باعدارلاماسى اياسىندا ءداستۇرلى ونەردى قولداۋ جانە جاڭعىرتۋ بارىسىندا جۇيەلى جۇمىستار جۇرۋدە، وسىدان ءبىر اي بۇرىن عانا الماتىنىڭ مادەنيەت پەن شىعارماشىل قالا رەتىندە يۋنەسكو-نىڭ شىعارماشىل قالالار جەلىسىنە ەنۋى دە سوندىقتان.

«الاتاۋ» ءداستۇرلى ونەر تەاترىنىڭ جانە ءداستۇرلى مۋزىكانىڭ مۋلتيمەديالىق ورتالىعىنىڭ اشىلۋى ءبىزدىڭ مادەنيەتىمىزدىڭ دامۋىنا جاڭا سەرپىلىس بەردى جانە ءداستۇرلى ورىنداۋشىلار ءۇشىن جاڭا مۇمكىندىكتەر اشتى»، - دەپ اتاپ ءوتتى الماتى اكىمى ب.بايبەك.

وتكەن جىلى حالىقتاردىڭ ۇلتتىق ونەرىن تانىتاتىن «ۇلى دالا ەلى» حالىقارالىق جىرشى-تەرمەشىلەر فەستيۆالى، «اۋەنمەن تەربەلگەن مىڭ جىل» اتتى ءداستۇرلى مۋزىكا فەستيۆالى، «التىن دومبىرا» اقىندار ايتىسى، ىقىلاس اتىنداعى مۋزىكالىق اسپاپتار مۋزەيى نەگىزىندە «ءىنجۋ مارجان» تەلەباعدارلاماسى ءوتتى.

الماتىنىڭ 1000 جىلدىعىن مەرەكەلەۋ اياسىندا وتكەن جىلى حالىقارالىق «ۇلى دالا ەلى» فەستيۆالى ۇيىمداستىرىلىپ، وعان تۇركيانىڭ، قىرعىزستاننىڭ، تۇركمەنستاننىڭ، ازەربايجاننىڭ جىرشىلارى قاتىستى، «ماركو پولو ىزىمەن» حالىقارالىق فەستيۆالىندە فرانسيادان، گرەسيادان، ينديادان، يراننان، شۆەيساريادان، ارمەنيا مەن باساقا دا ەلدەردەن كەلگەن ارتيستەر ونەر كورسەتتى.

فەستيۆالدىڭ اشىلۋ بارىسىندا قازاقستانداعى فرانسۋز رەسپۋبليكاسىنىڭ ەلشىسى فيليپپ مارتينە قازاق ءتىلىن جاقسى بىلەتىنىمەن جينالعانداردى تاڭداندىردى جانە اقىن، جىرشى ۇلجان بايبوسىنوۆاعا فرانسيا مادەنيەت مينيسترلىگىنىڭ «ونەر جانە ادەبيەت كاۆالەرى» وردەنىن تابىس ەتتى.

فرانسيا ەلشىسى وردەندى الماتىدا وتكەن «ۇلى دالا ەلى» ەتنوفەستيۆالىندە سالتاناتتى تۇردە تاپسىردى. ول فرانسيا مادەنيەت ءمينيسترىنىڭ ارنايى تاپسىرماسىمەن ەۋروپادان جولدانعان قۇرمەتكە قازاق جىرشىسى لايىق ەكەنىن ايتتى.

«بۇل وردەن فرانسيا رەسپۋبليكاسىنىڭ عانا ەمەس، سونىمەن قاتار بۇكىل الەم مادەنيەتىن دامىتۋعا قوسقان زور ۇلەسى ءۇشىن بەرىلەدى. كاسىبي شەبەرلىگىڭىز ارقىلى ءسىزدى ەڭ ۇزدىك جىرشى جانە كۇيشى رەتىندە تانيدى»، - دەپ اتاپ ءوتتى فيليپپ مارتينە.

«ۇلى دالا ەلى» ەتنوفەستيۆالى تاماشا جوبا. بۇگىنگى كەشتە ماعان قازاقستاننىڭ وڭتۇستىك وڭىرىنەن كەلگەن جىرشىلار مەن قاراقالپاستاننان كەلگەن ونەرپازدىڭ ورىنداۋىنداعى جىرلار قاتتى ۇنادى. ولاردىڭ داۋىسى مەن مۋزىكالىق اسپاپتا ورىنداۋى شەبەر شىقتى. مەن بۇگىنگى كەشكە استانادان ۇلجان بايبوسىنوۆا ءۇشىن كەلدىم. ول فرانسيامەن، قازاقستانداعى ءبىزدىڭ ەلشىلىكپەن بىرگە بۇرىننان جۇمىس ىستەپ كەلە جاتىر. ونىڭ ەڭبەگى زور. فرانسيادا ورتالىق ازيا مۋزىكاسىن ءسۇيىپ تىڭدايتىندار كوپ. ونىڭ ىشىندە قازاق ءانى تىڭدارماندارىنىڭ كلۋبى بار»، - دەدى فرانسيا ەلشىسى.

ۇلجان بايبوسىنوۆا «ۇلى دالا ەلى» جوباسى جاۋاپكەرشىلىگى زور جوبا ەكەنىن جەتكىزدى.

«جىرشىلىق، جىراۋلىق ونەردىڭ قانشالىقتى تەرەڭ ەكەنى بەلگىلى. سول سەبەپتى بۇعان ۇلكەن جاۋاپكەرشىلىكپەن قاراۋعا تۋرا كەلەدى. تەرەڭ ماعىنالى مۇرانى باعاسىن تۇسىرمەي حالىققا جەتكىزۋ باستى مۇراتىمىز بولدى. بارلىق قازاققا ورتاق ونەر بولعاندىقتان بۇگىنگى كۇنگى ورىنداۋشىلارى مەن ءىزىن جالعاستىرۋشى ۇرپاقتارىن قامتۋ قاجەت»، - دەدى ۇلجان بايبوسىنوۆا.