بۇگىن وكق-دە قازاقستاننىڭ ەكولوگيالىق ۇيىمدارى قاۋىمداستىعى تانىستىرىلدى، دەپ حابارلايدى Qamshy.kz اقپارات اگەنتتىگى Sputnik قازاقستان مالىمەتىنە سۇيەنىپ. 

قاۋىمداستىق پرەزيديۋمىنا "قوعامدىق ماڭىزدى باستامالاردى دامىتۋ قورىن" باسقاراتىن ءاليا نازاربايەۆا جەتەكشىلىك ەتەدى. قور ەكولوگيا ماسەلەسىمەن دە اينالىسادى. قاۋىمداستىقتىڭ قامقورشىلىق كەڭەسىنە "جاسىل ەكونوميكا" بويىنشا نوبەل سىيلىعىنىڭ لاۋرەاتى، جاسىلدانۋ كونسەپسياسىنىڭ اۆتورى راە كۆون چۋنگ ەندى. 

تانىستىرىلىم بارىسىندا قاۋىمداستىق پرەزيديۋمىنىڭ مۇشەسى سالتانات راحيمبەكوۆا ءاليا نازاربايەۆانىڭ قۇتتىقتاۋ ءسوزىن وقىپ بەردى. 

"قازاقستاننىڭ ەكولوگيالىق ۇيىمدارى قاۋىمداستىعى جۇيەلى ەكولوگيالىق باستامالاردى قۇرۋ جانە ىلگەرىلەتۋ، "جاسىل" ەكونوميكانى ناسيحاتتاۋ الاڭىنا اينالىپ، ۇلتتىڭ ەكولوگيالىق ەتيكاسى مەن مادەنيەتىنىڭ قالىپتاسۋىنا، ەكولوگيالىق ءبىلىم مەن تاربيەگە ەرەكشە ءمان بەرەدى. وزىندىك رەتتەۋ قاعيداتتارى نەگىزىندە ەكولوگيا پروبلەمالارى بويىنشا مەملەكەتتىك ورگاندارمەن ەتەنە بايلانىس ورناتۋ وتە ماڭىزدى. ءبىزدى قوعامدا ەكولوگيالىق مادەنيەت قالىپتاستىرۋ بويىنشا ۇلكەن جۇمىس كۇتىپ تۇر. ءبىز بىرلەسىپ قانا ايتارلىقتاي ماڭىزدى ناتيجەلەرگە قول جەتكىزە الامىز. وسى ءساتتى پايدالانىپ، قىزىعۋشىلىق تانىتقانداردىڭ بارلىعىنا ەسىگىمىز اشىق ەكەنىن ايتقىم كەلەدى. بارلىق ەكولوگيالىق ۇيىمدى كۇش-جىگەرىمىزدى بىرىكتىرۋگە شاقىرامىن"، — دەلىنگەن قۇتتىقتاۋ حاتتا. 

ەكولوگيالىق ۇيىمدار قاۋىمداستىعى ءوز الدىنا ەكولوگيالىق باستامالار جانە ولاردى ىلگەرىلەتۋ الاڭىن قۇرۋ؛ حالىقارالىق سەرىكتەستىكتى دامىتۋ، ينۆەستيسيا تارتۋ، حالىقارالىق جوبالار مەن باعدارلامالارعا قاتىسۋ، حالىقارالىق ساراپشىلاردى شاقىرۋ؛ "جاسىل" تەحنولوگيانى ەنگىزۋ، قالالارداعى ەكولوگيالىق ينفراقۇرىلىمداردىڭ دامۋى مەن  يننوۆاسيالاردىڭ العا باسۋىنا ۇلەس قوسۋ؛ ق ر ەكولوگيالىق ماسەلەلەر بويىنشا زاڭنامانى جەتىلدىرۋ مىندەتتەرىن قويىپ وتىر.