«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد ەلىمىزدىڭ دارىندى جاستارىنا پارتيالىق بيلەتتەرىن تاپسىرۋ سالتاناتىندا وسىلاي دەدى.
قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي ۇيىمداستىرىلعان قابىلداۋ راسىمىندە ءار سالادا جارقىن جەڭىستەرگە جەتىپ جۇرگەن ەل جاستارى «نۇر وتان» پارتياسىنىڭ مۇشەسى اتاندى. ولاردىڭ ىشىنەن بەلگىلى انشىلەر: تورەعالي تورەالى مەن ەركە ەسماحاندى، اۋىر اتلەتيكادان ريو وليمپياداسىنىڭ قولا جۇلدەگەرى كارينا گوريچيەۆانى جانە كاسىپقوي بوكستا ەل نامىسىن ابىرويمەن قورعاپ جۇرگەن جانات جاقيانوۆتى ەرەكشە اتاپ وتكەن ءجون.
مۇحتار قۇل-مۇحاممەد ەلباسىمىزدىڭ جاستارعا ۇنەمى قولداۋ كورسەتىپ، ولاردىڭ ساپالى ءبىلىم الۋىنا جانە باسەكەگە قابىلەتتى مامان بولىپ قالىپتاسۋىنا بارلىق جاعدايدى جاساعانىنا نازار اۋداردى. تاۋەلسىز قازاقستاننىڭ شيرەك عاسىردا جەتكەن جەتىستىكتەرى مەن بۇكىل الەم تاڭداي قاققان تابىستارى تۇڭعىش پرەزيدەنتىمىزدىڭ ەرەڭ ەڭبەگىنىڭ ناتيجەسى ەكەنىن ايتقان پارتيا ءتوراعاسىنىڭ ءبىرىنشى ورىنباسارى: «ەلباسى سالعان داڭعىل جولدان جاڭىلماي جاھان كوشىنىڭ الدىنان كورىنۋ ەندى ەل جاستارىنىڭ، ياعني سىزدەردىڭ ابىرويلى مىندەتتەرىڭىز بولۋى كەرەك»، – دەدى.
سونىمەن قاتار وتكەنگە سالاۋات ايتىپ، تاريحتان تاعىلىم الۋ قاشاندا يگى ءىس ەكەنىن ايتقان مۇحتار قۇل-مۇحاممەد وسىدان ءبىر عاسىر بۇرىن ەلدىكتىڭ ىرگەسىن قالاعان الاش ارىستارىنىڭ ەڭبەگىنە دە نازار اۋداردى.
– جيىرماسىنشى عاسىر باسىندا پاتشالىق رەسەيدى مەكەندەگەن تۇركى حالىقتارى ىشىندە قازاق ۇلتىنىڭ وكىلدەرى ءبىلىمدارلىق، قايراتكەرلىك قابىلەتتەرىمەن ايرىقشا كوزگە ءتۇستى. الاشوردا ۇكىمەتىنىڭ ءتوراعاسى بولعان ءاليحان بوكەيحان ماسكەۋ مەن پەتەربورداعى ورىس وقىمىستىلارى مەن دەموكراتيالىق باعىتتاعى قايراتكەرلەر اراسىندا ەرەكشە بەدەلگە يە بولدى. ورتالىق ازيا تاريحىندا جاريالانعان تۇڭعىش دەموكراتيالىق مەملەكەتتىك قۇرىلىم – تۇركىستان اۆتونومياسىن دا مۇحامەدجان تىنىشپايەۆ پەن مۇستافا شوقاي سياقتى الاش ارىستارى كەزەكتەسە باسقاردى. ءتىپتى بۇل اۆتونوميا كۇشپەن تاراتىلىپ، ونىڭ ورنىنا دۇنيەگە كەلگەن تۇركىستان كەڭەستىك رەسپۋبليكاسىنىڭ باسشىلىعىندا دا تۇرار رىسقۇلوۆ پەن ءنازىر تورەقۇلوۆ سياقتى قازاق قايراتكەرلەرى بولدى. ۇركەردەي جارقىراعان ءدال وسىنداي تالانتتار شوعىرىن سول كەزدەگى ورتا ازيانىڭ بىردە ءبىر ۇلتى شىعارا العان جوق. اتتەڭ، رەپرەسسيا زۇلماتى بولماسا الاش ارىستارى وسىدان ءبىر عاسىر بۇرىن-اق قازاق حالقىن الەمدىك وركەنيەت بيىگىنە شىعارار ەدى. بۇگىنگى ۇرپاق وسىنى ۇمىتپاۋى كەرەك. قازاقتىڭ وتكەن تاريحتا كەتكەن ەسەسىن جاڭا زاماننىڭ تالانتتى جاستارى تولىقتىرادى دەپ سەنەمىن. – دەدى مۇحتار قۇل-مۇحاممەد.
