نيدەرلاندتاعى گرونينگەنتىك ۋنيۆەرسيتەت پسيحولوگتارى «ءبىر كورگەننەن عاشىق بولۋ» فەنومەنىنە قاتىستى زەرتتەۋ جۇرگىزگەن. زەرتتەۋشىلەر  مۇنداي سەزىمنىڭ بار ەكەنىن جوققا شىعارىپ وتىر دەپ جازادى Independent.

زەرتتەۋدىڭ ءبىرىنشى بولىمىندە بارلىعى ينتەرنەت ارقىلى 396 ادامنان تۇراتىن قاتىسۋشىلاردان  ساۋالناما جۇرگىزىلگەن. قاتىسۋشىلاردىڭ شامامەن 60 پايىزى ايەل ادامدار بولعان. ولاردان قازىرگى ۋاقىتتاعى قارىم-قاتىناستارى تۋرالى سۇراپ،  بەلگىسىز ادامداردىڭ فوتوسۋرەتتەرىن كورسەتكەن.

قاتىسۋشىلار سۋرەتتەگى ادامداردىڭ وزدەرىنە قانشالىقتى ۇنامدى، سىمباتتى ەكەندەرىن، ولاردىڭ فوتولارىنا قاراعاندا قانداي ەموسيالىق كۇي كەشەتىنىن ايتىپ، سول سەزىمدەرىن سۋرەتتەپ بەرۋى كەرەك بولعان. سونىمەن بىرگە، قاتىسۋشىلاردان وسى ادامداردى كورگەندە قانداي دا ءبىر عاشىقتىقتى سەزەتىنىن نەمەسە  ءبىر كورگەننەن عاشىق بولۋ سياقتى سەزىمدى باستان كەشىرۋ مۇمكىندىكتەرىن زەرتتەگەن.

تاجىريبەنىڭ ەكىنشى بولىمىندە قاتىسۋشىلارعا جىلدام كەزدەسۋلەرگە قاتىسىپ كورۋ ۇسىنىلعان. ءبىر-بىرىن تانىمايتىن ەكى ادامعا تانىسىپ، بىلىسۋگە  20 مينۋت نەمەسە جارتى ساعات ۋاقىت بەرىلگەن.

وسى زەرتتەۋ ناتيجەسى بويىنشا، 49 جاعدايدا ادامدار ءبىر كورگەننەن عاشىق بولۋ سەزىمىن باستان كەشكەندەرىن جەتكىزگەن.

عالىمداردىڭ بايقاۋىنشا، كەزدەسۋ مەن تانىسۋلار بارىسىندا بەلگىسىز ادام قانشالىقتى سىمباتتى كورىكتى بولعانىنا بايلانىستى قاتىسۋشىلار سەرىكتەرىنە دەگەن عاشىقتىق سەزىمىنىڭ پايدا بولعانىن ايتقان. الايدا، مۇنداي عاشىقتىق سەزىم كوپ جاعدايدا جاۋاپسىز بولعان. دەمەك، ادامنىڭ ءبىر كورگەننەن عاشىق بولۋى ءجاي عانا قۇمارلىق پەن ىنتىقتىق سەزىمدەرىنە بايلانىستى دەيدى عالىمدار.