وسكەمەندە ق ر تۇڭعىش پرەزيدەنتى كۇنىنە وراي 140 بالاعا ارنالعان «داريا» بالاباقشاسى اشىلدى. مەرەكە قارساڭىندا اشىلعان بالاباقشا تولىقتاي دەمەۋشىلەردىڭ قاراجاتىنا سالىنعان.

سالتاناتتى شارادا شقو اكىمى دانيال احمەتوۆ شاعىن اۋدان تۇرعىندارىن كەلە جاتقان مەرەكەمەن قۇتتىقتاپ، بالاباقشاعا سىيلىق تابىس ەتتى.

– شىعىس قازاقستان بالاباقشا تاپشىلىعىنىڭ الدىن الىپ، كىشكەنتاي بۇلدىرشىندەرگە بارلىق جاعدايدى جاساپ وتىرعان ايماقتاردىڭ ءبىرى. وسىنداي ۇلكەن مەرەكە قارساڭىندا سىزدەردىڭ شاعىن اۋداندارىڭىزدا بالاباقشانى اشۋ مەن ءۇشىن ۇلكەن قۇرمەت. ەلباسىمىز نۇرسۇلتان نازاربايەۆ باسقارعان مەملەكەتتە جاستاردىڭ بولاشاعىنا كوپتەپ كوڭىل ءبولىنىپ جاتىر. كەلەشەكتە ءدال وسى بالاباقشا تاربيەلەنۋشىلەرى ەلىمىزدىڭ ەرتەڭىن قالاعان پاتريوت بولاتىنىنا سەنىمدىمىن، – دەدى دانيال احمەتوۆ.

جاڭا 140 ورىندىق №13 «داريا» بالاباقشاسى 7 توپقا بولىنگەن. ونىڭ 6 توبىنا ءقازىردىڭ وزىندە بالالار قابىلداندى. جاڭا مەكەمەدە بالالارعا ارنالعان ۇيىرمەلەر مەن ويىن الاڭدارى تولىقتاي جاڭا جابدىقتارمەن قامتىلعان.

ايتا كەتسەك، بالاباقشا اشىلىپ وتىرعان «كاراباح» اۋدانىنىڭ تۇرعىندارى بالاباقشا تاپشىلىعىن ايتىپ، بىرنەشە مارتە ماسەلەنى كوتەرگەن. تەك وبلىس اكىمدىگى «AES قازاقستان» كومپانيالار توبىمەن مەموراندۋمعا قول قويعاننان كەيىن، بالاباقشا قۇرىلىسى ايماق باسشىسىنىڭ باقىلاۋىنا الىنادى. جاڭا مەكەمە دەمەۋشى قاراجاتىنا سالىنعانىمەن، تولىقتاي قالا اكىمدىگىنىڭ مەنشىگىنە تاپسىرىلدى.