قاراشا ايىنىڭ 16-18 ارالىعىندا سانكت-پەتەربوردا وتەتىن VI حالىقارالىق مادەنيەت فورۋمىندا «استانا بالەت» تەاترى قازاقستاننىڭ ۇلتتىق جانە زاماناۋي مادەنيەتىنىڭ كەلبەتىن پاش ەتەدى. بيىل قازاقستانعا «قوناق-ەل» مارتەبەسى بەرىلىپ وتىر. وسىنىڭ ءوزى قازاقستان مەن رەسەي فەدەراسياسىنىڭ اراسىنداعى مادەني ىنتىماقتاستىقتىڭ جاڭا دەڭگەيىن ايعاقتاپ تۇر.
ادەتتەگىدەي، فورۋمعا دۇنيە ءجۇزىنىڭ تۇكپىر-تۇكپىرىنەن مادەنيەت سالاسىنىڭ ساراپشىلارى، قوعام قايراتكەرلەرى مەن ونەر تارلاندارى، باس-اياعى 20 مىڭنان استام ادام جينالادى: دراما، وپەرا جانە بالەت تەاترلارىنىڭ جۇلدىزدارى، بيلىك پەن بيزنەستىڭ، اكادەميالىق قاۋىمداستىقتىڭ وكىلدەرى.
فورۋم اسىندا قازاقستاننىڭ ۇزدىك شىعارماشىلىق ۇجىمدارى ونەر كورسەتەدى. فورۋمنىڭ اشىلۋ سالتاناتىندا رەسەيلىك كورەرمەنگە «Astana Ballet Gala» گالا-كونسەرتى كورسەتىلىپ، بالەت ارتىستەرى تەاتر بالەتمەيستەرلەرىنىڭ بي تىلىمەن جەتكىزگەن باتىل كوركەمدىك شەشىمدەرى مەن بىرەگەي ورنەكتەرىن پاش ەتەدى. بۇل باعدارلاماعا «ۇلى دالا مۇراسى» اتتى جارقىن ءارى قايتالانباس حورەوگرافيالىق مينياتيۋرالار، «ماحاببات. ايىرىلۋ. ۇرەي»، «A fuego lento» ءبىر اكتىلى بالەتتەرى مەن «كلەوپاترا تريۋمفى» اتتى بالەتتىڭ ءۇزىندىسى ەنىپ وتىر.
ۇلتتىق حورەوگرافيالىق پلاستيكا – قازاق مادەنيەتىنىڭ وزىندىك بولمىسىن كورسەتۋدىڭ ەرەكشە قۇرالى. سول سەبەپتى، «استانا بالەت» تەاترىنىڭ گاسترولدىك باعدارلامالارىنا ۇلتتىق بي ۇلگىلەرى مىندەتتى تۇردە ەنگىزىلىپ وتىرادى. «ۇلى دالا مۇراسى» باعدارلاماسىنداعىبي كومپوزيسيالارى – قازاقتىڭ كەڭ-بايتاق دالاسىن، ۇلتتىق ءداستۇردىڭ بايلىعىن سيپاتتاپ، عاجايىپ مۋزىكاسى مەن قايتالانباس كوركەمدىك بەينەلەرىن پاش ەتەدى. قازاقتىڭ وزىندىك بولمىسىن بي تىلىمەن جەتكىزەتىن ەتنوگرافيالىق جانە كوركەم بي-باعدارلاماسى ەلىمىزدە عانا ەمەس، شەت ەلدەردە دە ىستىق ىقىلاسپەن قابىلدانادى.
«Love Fear Loss» (مۋزىكاسى ەديت پياف رەپەرتۋارىنداعى اندەردىڭ تاقىرىبىنا جازىلعان، حورەوگراف ريكاردو امارانتە) – ايگىلى ەديت پيافتىڭ عاجايىپ ءومىربايانى مەن اندەرىنەن ءنار العان. ونىڭ اندەرىندە ءتۇرلى ەر ازاماتتارمەن قارىم-قاتىناسى سۋرەتتەلگەنى بەلگىلى. الايدا، ءبارى ءبىر ارناعا قۇيىلعان پياف اندەرى ناعىز ماحاببات ۇرانىنا اينالىپ، الەمدى تابىندىردى. بالەتتىڭ ءاربىر دۋەتى ىڭكار سەزىم، ماحاببات، ايىرىلىپ قالۋ ءقاۋپى مەن بويىڭدى بيلەگەن ۇرەي سەزىمدەرىن سۋرەتتەيدى.
«A fuego lento» اتتى كەلەسى بالەت، اسىل ماحاببات سەزىمىنە العاش ەلىتكەن تۇستا بويىڭىزدى كەرنەگەن ەموسيالىق قۋات پەن الاڭداۋشىلىق سەزىمىن ءسوز ەتەدى. ءتانىڭىز ەرەكشە كۇيگە ءتۇسىپ، شاتتىق سەزىمىنە بولەنەسىز، ال، ىشكى جالىن بويىڭىزدى ورتەپ اكەتەدى. عاشىق جان ءۇشىن كۇللى الەم سۇيىكتىسىنىڭ اينالاسىنا توعىسقانداي كورىنەدى، ال، ءومىردىڭ ءمانى تەك ماحاببات دەپ بىلەدى(مۋزىكا - لالو شيفرين، استور پياسسوللا، كارلوس گاردەل، حورەوگراف – ريكاردو امارانتە).
سونىمەن قاتار، كورەرمەن نازارىنا «كلەوپاترا» بالەتىنىڭ ءۇزىندىسى تارتۋ ەتىلەدى (مۋزىكا – موريس راۆەل، حورەوگراف – نيكولاي ماركەلوۆ). بۇل تۋىندى مىسىر پاتشايىمىنىڭ كوپشىلىككە بەيمالىم كەزەڭىن، ياكي، ءسىڭىلىسى ارسينويامەن تاق ءۇشىن كۇرەسكە تۇسكەن شاعىن باياندايدى. كلەوپاترا مەن ارسينويا تاعدىر ءتاڭىرياسى، ادام ءومىرىنىڭ ءامىرشىسى لاحەسيستىڭ نازارىن وزىنە اۋدارتپاقشى. سەبەبى، لاحەسيستىڭ قولىندا كلەوپاترا مەن ارسينويانىڭ مازاسىن العان بيلىكتىڭ كىلتى تۇر.
«استانا بالەت» تەاترىنىڭ گاسترولدىك ساپارلارى الدىنا كۇردەلى ماقساتتار قويىپ وتىر: ءسان-تۇرلى حورەوگرافيا ۇلگىلەرى ارقىلى ەلىمىزدىڭ باي مادەنيەتىن دۇنيەجۇزىنە پاش ەتۋ.
