مەملەكەت باسشىسى قىرعىز تاراپىنىڭ ءوتىنىشى بويىنشا سوورونباي جەەنبەكوۆپەن كەزدەسۋ وتكىزدى. اڭگىمە بارىسىندا قازاقستان پرەزيدەنتى قىرعىزستان پرەزيدەنتىن سايلاۋداعى جەڭىسىمەن قۇتتىقتادى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
– ەكى ەل اراسىنداعى تۋىسقاندىق ءارى باۋىرلاستىق قارىم-قاتىناستى ورنىنا كەلتىرۋ قاجەت. بۇل جەردە ەكى حالىقتىڭ مۇددەسى تۇر، – دەدى نۇرسۇلتان نازاربايەۆ.
قازاقستان پرەزيدەنتى جۋىق ارادا ەكى ەل ۇكىمەتتەرىنىڭ جۇمىس توپتارى جول كارتاسى بويىنشا جۇمىس جۇرگىزىپ، وعان قول قوياتىنىن ايتتى. سودان سوڭ، قىرعىز تاراپىنىڭ ءوتىنىشى بويىنشا قازاقستان مەن قىرعىزستان شەكاراسىنداعى قازىرگى ماسەلەلەر شەشىلەتىن بولادى.
– شەكاراعا قازاقستان جانە قىرعىزستان تاراپتارى، سونداي-اق ەۋرازيالىق ەكونوميكالىق وداق وكىلدەرى بىرلەسە باقىلاۋ ورناتاتىن بولادى. مۇنداي ءتارتىپتى قىرعىزستان-قىتاي شەكاراسىندا دا بەلگىلەگەن ءجون، – دەدى مەملەكەت باسشىسى.
سونىمەن قاتار، نۇرسۇلتان نازاربايەۆ قىرعىزستان پرەزيدەنتىن قازاقستانعا رەسمي ساپارمەن كەلۋگە شاقىردى.
سوورانباي جەەنبەكوۆ نۇرسۇلتان نازاربايەۆقا قۇتتىقتاعانى جانە قازاقستانعا رەسمي ساپارمەن كەلۋگە شاقىرعانى ءۇشىن العىس ايتتى.
– ءبىز ەلدەرىمىزدىڭ ءوزارا ءىس-قيمىل ماسەلەلەرىن تالقىلاپ، ءبىرقاتار ۇستانىم بويىنشا ورتاق پىكىرگە كەلدىك. قازىرگى پروبلەمالارعا قاراماستان، مەن جەكە جاۋاپكەرشىلىگىمە الا وتىرىپ، شەكارامىزداعى احۋالدى رەتتەۋدى سۇرادىم، – دەدى قىرعىزستان پرەزيدەنتى.
كەزدەسۋ سوڭىندا مەملەكەت باسشىسى ەلدەرىمىزدىڭ قارىم-قاتىناسى تاتۋ كورشىلىك سيپاتتا ەكەنىن اتاپ ءوتىپ، تۋىنداعان بارلىق ماسەلەنى سىندارلى جولمەن شەشۋگە نيەتتى ەكەنىن ءبىلدىردى.
