ەلباسى نۇرسۇلتان نازاربايەۆ «قازاقستاننىڭ 100 جاڭا ەسىمى» جوباسىنىڭ جەڭىمپازدارىمەن كەزدەستى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. 

جالپىحالىقتىق داۋىس بەرۋ ارقىلى انىقتالعان 102 جەڭىمپازدى ەلورداداعى ەڭ كورىكتى مەيرامحانالاردىڭ بىرىندە ەل پرەزيدەنتىنىڭ ءوزى كەلىپ قۇتتىقتادى. قازاقستاننىڭ تۋىن بيىككە كوتەرگەن سپورتشىلار مەن اق حالاتتى دارىگەرلەر، مەسەناتتىقپەن كوزگە تۇسكەن بەلدى كاسىپكەرلەر مەن عالىمدار، مادەنيەت پەن قوعامدىق سالادا ەل اۋزىندا جۇرگەن ازاماتتار ەلباسىنىڭ جىلى لەبىزىنە بولەندى.

«وسى جيىنعا كەلگەندەرىڭىز ءۇشىن قۋانىشتىمىن. مەن ءۇشىن ەكى تۋعان كۇن بار. ءبىرىنشىسى، وزدەرىڭىز بىلەتىندەي، ءوزىم تۋعان — 6 شىلدە. ەكىنشى تۋعان كۇنىم — 1 جەلتوقسان. بۇل — قازاق ەلى بۇكىل حالىق بولىپ، تۇڭعىش رەت قازاقستان حالقى پرەزيدەنتىن سايلاعان كەز. سول سىنعا ءتۇسىپ، تۇڭعىش رەت 90 پايىزدان استام داۋىسقا يە بولدىم، سودان بەرى 26 جىل ءوتتى. سىزدەردىڭ بارلىقتارىڭىز دا جاسسىزدار. سول كەزەڭ مەن قازىرگى كەزەڭ ەكى بولەك. 26 جىلدا كوپتەگەن دۇنيە وزگەردى. سول كەزەڭدە ومىرگە كەلگەن بالا 26 جاستا عانا. بۇل جۇمىسقا كىرىسۋدە ەڭ جاقسى كەزەڭ»، — دەدى پرەزيدەنت.

ەسكە سالا كەتسەك، «قازاقستاننىڭ 100 جاڭا ەسىمى» جوباسىنا داۋىس بەرۋ 100esim.el.kz سايتىندا 18 قازان - 10 قاراشا كۇنى ارالىعىندا وتكەن بولاتىن. ونلاين-داۋىس بەرۋگە 302 كانديدات ۇسىنىلىپ، ۇمىتكەرلەر قىزمەت سالاسى بويىنشا 6 ساناتقا ءبولىندى. ياعني، عىلىم سالاسىندا - 45، سپورتتا - 42، قوعامدا - 86، مەديسينادا - 46، مادەنيەتتە - 37 جانە بيزنەس سالاسىندا 46 ادام «قازاقستاننىڭ 100 جاڭا ەسىمى» جوباسىنا ۇمىتكەر رەتىندە تىركەلگەن بولاتىن. داۋىس بەرۋگە ۇسىنىلعان كانديداتتار ەلدىڭ بارلىق وڭىرلەرىن قامتىدى.

ايتا كەتەرلىگى، «رۋحاني جاڭعىرۋ» باعدارلاماسى اياسىندا ۇيىمداستىرىلعان «قازاقستاننىڭ 100 جاڭا ەسىمى» جوباسىن ىسكە اسىرۋ ناتيجەسىندە قازاقستاننىڭ دامۋىنا قوماقتى ۇلەس قوسقان ادامداردىڭ ناقتى تاريحى مىسالىندا تابىستىلىق يدەيالارىن، مەريتوكراتيا مەن باسەكەلەستىك پرينسيپتەرىن، ءبىلىم جانە پراگماتيزم كۋلتىن ناسيحاتتاۋ جانە دامىتۋ ارقىلى قوعام ساناسىن رۋحاني جاڭعىرتۋ كوزدەلەدى.