2017 جىلدىڭ 29-شى قاراشاسىندا استاناداعى ورتالىق كوممۋنيكاسيالار قىزمەتىندە وتكەن بريفينگكە قاتىسقان شىعىس قازاقستان وبلىسىنىڭ اكىمى دانيال احمەتوۆ:

- بيىلعى جىلى دەنساۋلىق ساقتاۋ مينيسترلىگىمەن بىرلەسە وتىرىپ، وسكەمەن قالاسىنداعى №1 قالالىق اۋرۋحانانىڭ جانىنان ەلىمىزدەگى تۇڭعىش روبوتتاندىرىلعان حيرۋرگيا جانە ترانسپلانتولوگيا ورتالىعىن اشۋ جايلى شەشىم قابىلدادىق. ورتالىق قۇرۋ ءۇشىن وبلىستىق بيۋدجەتتەن 1،3 ملرد. تەڭگە ءبولىندى. سونىمەن قاتار، بۇل ماقساتتا «پارىز» قورى 1،1 ميلليارد تەڭگە قارجى جۇمىلدىردى. بۇل تۋرالى Qamshy.kz اقپارات اگەنتتىگى جازادى. 

اتالمىش ورتالىقتىڭ نەگىزگى ماقساتى ءار ءتۇرلى اۋرۋلاردى دياگنوستيكالاۋ مەن ەمدەۋدىڭ يننوۆاسيالىق ادىستەرىن ەنگىزۋ بولىپ تابىلادى. وسى رەتتە، ايتا كەتكەنىمىز ءجون بولار، بۇگىنگى كۇنى №1 قالالىق اۋرۋحانانىڭ حيرۋرگيالىق بولىمىندە جىل سايىن 7 مىڭعا دەيىن وتا جاسالادى. ولاردىڭ 20% -ى ەندوسكوپيالىق وتالار. بۇل روبوتتاندىرىلعان حيرۋرگيا ورتالىعى ءۇشىن وتە ۇلكەن الەۋەت.

ەندوسكوپيالىق وتالاردىڭ تيىمدىلىگى ەندوحيرۋرگيالىق تەحنيكانىڭ كومەگىمەن كىشىگىرىم ءتىلۋ ارقىلى جۇرگىزىلەدى. وسىنىڭ ارقاسىندا تەرىنىڭ سىرتقى زاقىمدالۋى كوپ بايقالمايدى ەكەن. سونداي-اق، وتادان كەيىنگى تىگىس ىزدەرى قالماي، اۋىرسىنۋ بولماي، اۋرۋحانادا جاتۋ مەرزىمى دە قىسقارادى. ورتالىقتىڭ جۇمىسىنا سەمەي قالاسىنىڭ مەملەكەتتىك مەديسينالىق ۋنيۆەرسيتەتى ات سالىسپاق.