سانكت-پەتەربۋرگتە كەنەسارى حاننىڭ كىسەسى ساقتالعانى انىقتالدى، — دەپ حابارلايدى Qamshy.kz اقپارات اگەنتتىگى. بۇل تۋرالى بەرىك ءابدىعالي ۇلى ءوزىنىڭ فەيسبۋك پاراقشاسىنا جاريالادى. 

«الاش اسكەرى تاقىرىبىن زەرتتەپ ءجۇرىپ، سەيىلبەك جانايداروۆتىڭ 1915 جىلى سانكت-پەتەربۋرگتەگى رەسەي ەتنوگرافيالىق مۋزەيىنە كەنەسارى حاننىڭ كىسەسىن تاپسىرعانى تۋرالى دەرەك كەزدەستىردىم. بۇل جادىگەر «كسە – پوياس كيرگيزسكوگو حانا سرەدنەي وردى» دەگەن اتپەن اتالعان مۋزەيدىڭ قورىندا بۇگىنگى كۇنگە دەيىن ساقتالعان ەكەن. ونى مادەنيەت جانە سپورت ءمينيستىرى ارىستانبەك مۇحامەديۇلىمەن سانكت-پەتەربۋرگتەگى مۋزەيگە بارعاندا ءوز كوزىمىزبەن كورۋگە مۇمكىنشىلگى تۋدى.
سەيىلبەك جانايداروۆ 1918 جىلى اتباسار الاش اسكەري ديۆيزيونىن قۇرعان ءارى الاشوردا ۇكىمەتىنىڭ كانديدات مۇشەسى بولعان ازامات.

بۇل جادىگەر سەيىلبەك جانايداروۆتىڭ قولىنا قالاي تۇسكەنىن زەرتتەي كەلە انىقتاعانىمىز – ول كىسەنى سەيىلبەكتىڭ اتاسى – كەنەسارى حاننىڭ اسكەري قولباسشىلارىنىڭ ءبىرى جانايدار ورىنبايۇلىنان قالعان مۇرا ەكەن. جانايدار باتىردىڭ ەرلىكتەرى تۋرالى مۇسا شورمانوۆتىڭ، ءماشھۇر ءجۇسىپتىڭ، دوسكەي اقىننىڭ، جامبىلدىڭ، يمانجان جىلقايدار ۇلىنىڭ ەستەلىكتەرى مەن جىرلارىندا كەزدەسەدى. سونداي-اق، بۇل تۋرالى ءى.ەسەنبەرليننىڭ «قاھار» رومانىندا دا جازىلعان.
باتىردىڭ ۇرپاقتارىنىڭ ايتۋىنشا، كەنەسارى حان ءوزىن ولىمنەن بىرنەشە رەت قورعاپ قالعانى ءۇشىن ءارى كورسەتكەن ەرلىكتەرى ءۇشىن اتالعان كىسەنى جانايدار ورىنبايۇلىنا تارتۋ ەتكەن. جالپى كەنەسارى ءوز باتىرلارىنا سوعىستا كورسەتكەن ەرلىكتەرى ءۇشىن وردەن-مەدال ورنىنا العىس رەتىندە ۇلكەن سىي-سياپات، ماراپاتتايتىن ءداستۇرى بولعان. سونداي-اق كوكشەتاۋ شايقاسىندا جەڭىسكە جەتكەنى جانە شىنايى ەرجۇرەكتىك كورسەتكەنى ءۇشىن كەنەسارى اعىباي باتىرعا اتاسى ابىلاي حاننان قالعان قانجاردى تارتۋ ەتكەن ەكەن»، — دەپ جازدى بەرىك ءابدىعالي ۇلى. 

سونىمەن بىرگە بەرىك ءابدىعالي ۇلى بۇل تۋرالى اقپاراتتى تولىقتىراتىنىن ايتتى.