شىعىس قازاقستاندا «التايدىڭ ءىنجۋ-مارجانى» تۋريستىك كلاستەرىن قالىپتاستىرۋ بويىنشا جۇمىستار جالعاسۋدا.

شقو-دا ءتۋريزمدى دامىتۋ ءۇشىن كوپتەگەن شارالار اتقارىلىپ جاتىر. بۇل جايلى استانا قالاسىنداعى ورتالىق كوممۋنيكاسيالار قىزمەتىندە وتكەن بريفينگ بارىسىندا شىعىس قازاقستان وبلىسىنىڭ اكىمى دانيال احمەتوۆ ايتتى.

قازاقستان رەسپۋبليكاسىنىڭ تۋريزم سالاسىن دامىتۋعا ارنالعان 2023 جىلعا دەيىنگى باعدارلاماسىنا سايكەس، وڭىردە «التايدىڭ ءىنجۋ-مارجانى» تۋريستىك كلاستەرىن قالىپتاسىپ كەلەدى.

كولىك جولدارىن تۋريستەردىڭ كەلۋىن جەڭىلدەتەتىن نەگىزگى فاكتورلارىنىڭ ءبىرى رەتىندە ەسكەرە وتىرىپ، سوڭعى ەكى جىلدا وبلىستىڭ نەگىزگى تۋريستىك وبەكتىلەرىنە بولىپ سانالاتىپ الاكول، سىبە كولى، مارقاكول، نۇرتاۋ تاۋ شاڭعىسى كۋرورتتارىنا اپاراتىن جولدار جوندەۋدەن وتكىزىلگەن. جالپى العاندا، كولىك ينفراقۇرىلىمىن قالپىنا كەلتىرۋگە 4،3 ملرد. تەڭگە جۇمسالدى.

جاعاجاي ءتۋريزمىن دامىتۋ اياسىندا بيىلعى جىلى سىبە كولدەرى مەن الاكولدىڭ جاعالاۋلارىنا 550 ملن. تەڭگەگە اباتتاندىرۋ جۇمىستارى جاسالدى.

كەلەسى جىلى ايماقتىق بيۋدجەت ەسەبىنەن الاكول جاعالاۋىنداعى جالاڭاشكول ستانسياسىنان قابانباي اۋىلىنا دەيىنگى جولدى جوندەۋ جۇمىستارى اياقتالماق. اكىم بۇل جۇمىستىڭ ماڭىزدىلىعىن جاعالاۋ سىزىقتارىن رەتكە كەلتىرۋدەن كەيىنگى ەكىنشى ورىنعا قويدى. قايتا قۇرۋ جۇمىستارىنا جۇمىلدىرىلعان بيۋدجەت كولەمى 1،3 ملرد تەڭگەنى قۇراپ وتىر. بۇدان بولەك، كەلەسى جىلدان باستاپ وسكەمەن قالاسىنان سەمەي ارقىلى جالاڭاشكول ستانسياسىنا اپاراتىن تەمىر جول قوزعالىسىنىڭ ەنگىزىلۋى، جولاۋشىلاردى تاسىلمالداۋدى ءبىرشاما جەڭىلدەتىلەدى دەپ كۇتىلۋدە.

بولاشاقتا وبلىس كولدەرى مەن بۇقتىرما سۋ قويماسىنىڭ جاعالاۋلارىندا ءىرى جەر ۋچاسكەلەرىن ينۆەنتاريزاسيالاۋ جوسپارلانىپ وتىر. بۇل رەكرەاسيالىق ايماقتاردى قالىپتاستىرۋ ماقساتىندا قوسىمشا رەزەرۆتەردى انىقتاۋ ءۇشىن جاسالاتىن بولادى. پايدالانىلماعان جەر تەلىمدەرى تۋريستىك ينفراقۇرىلىمدى دامىتۋعا باعىتتالماق.