الماتى قالاسىندا ءبىر ادامنىڭ دەنساۋلىعىن جاقسارتۋعا جۇمسالاتىن شىعىن 17081 تەڭگەدەن 55 مىڭ تەڭگەگە جەتتى.
الماتى قالالىق دەنساۋلىق ساقتاۋ باسقارماسىنا جۋىردا عانا جاڭا باسشى تاعايىندالدى. دەنساۋلىق ساقتاۋ سالاسىندا ءاتى-جونى كوپشىلىككە تانىس سەرىكبول مۋسينوۆ الماتىلىق اق حالاتتى ابزال جاندارمەن وتكىزگەن العاشقى جيىنىنىڭ ەلىمىزدەگى ۇلىق مەرەكەلەردىڭ ءبىرى تۇڭعىش پرەزيدەنت كۇنىمەن سايكەس كەلۋىن جاقسىلىققا جورىپ، باسقارمانىڭ جىل باسىنان بەرى اتقارعان جۇمىستارىنا شولۋ جاساپ ءوتتى.
جاڭا باسشى كوز جۇگىرتكەن جەتىستىكتەرگە ءبىز دە قۇلاق ءتۇرىپ كورسەك، الماتىنىڭ دەنساۋلىق ساقتاۋ سالاسىندا وڭ وزگەرىستەر كوپ كورىندى. ەڭ باستىسى تۋۋ كورسەتكىشى كوبەيىپ، انا مەن بالا ءولىمىنىڭ كورسەتكىشى تومەندەگەن. تۋبەركۋلەز اۋرۋىنا شالدىققاندار سانى ازايىپ، وسى اۋرۋدىڭ سالدارىنان بولاتىن ءولىم-جىتىم كورسەتكىشى 36 پايىزعا تومەندەپتى. دەنساۋلىق ساقتاۋ سالاسىنا بولىنەتىن قاراجات كولەمى سوڭعى ون جىلدا 5 ەسەگە ارتىپ، ول 19،5 ميلليارد تەڭگەدەن قازىرگى كەزدە 99،5 ميللياردقا جەتىپ وتىر.
الماتى قالاسىندا ءبىر ادامنىڭ دەنساۋلىعىن جاقسارتۋعا جۇمسالاتىن شىعىن 17081 تەڭگەدەن 55 مىڭ تەڭگەگە جەتىپتى. دەنساۋلىقتى جاقسارتۋعا دەگەن وڭ كوزقاراس، قالا تۇرعىندارىنىڭ سالاۋاتتى ءومىر سالتىن ۇستانۋىنا قاجەتتى بارلىق جاعدايلار قاراستىرىلۋىنىڭ ناتيجەسىندە تۇرعىنداردىڭ ءومىر ءسۇرۋ جاسى 5،5 جاسقا ۇلعايىپ، ول ءقازىر 75 جاستى قۇراپ وتىر.
الماتى قالاسى ورتا ازيا جانە قازاقستان بويىنشا دۇنيەجۇزىلىك دەنساۋلىق ساقتاۋ ۇيىمىنىڭ «سالاماتتى قالا» جوباسىنا ەنگەءنىن دە سەرىكبول مۋسينوۆ ماقتانىشپەن ايتىپ ءوتتى. مەديسينالىق ءتۋريزمدى دامىتۋ قارقىندى ءجۇرگىزىلۋدە. حالىققا ستاسيونارلىق جانە باسقا دا مەديسينالىق كومەك كورسەتۋدە جەكەمەنشىك مەديسينا مەكەمەلەرىنىڭ ۇلەسى ارتىپ كەلەدى. جەكە ينۆەستيسيا ەسەبىنەن ەمحانا، ەكو ورتالىعى قۇرىلدى. قازىرگى كەزدە الماتى قالالىق دەنساۋلىق ساقتاۋ باسقارماسىنا قاراستى ەمحانالار مەن اۋرۋحانالاردا ءمامس جۇيەسى بويىنشا جۇيەلى جۇمىستار اتقارىلۋدا. بۇگىنگى كۇنگە دەيىن قالا ەمحانالارىنا 1 ميلليون 800 ادام تىركەلىپ، ءوز مارتەبەلەرىن انىقتاپ ۇلگەرگەن. جاڭا باسشى الماتىنىڭ جاڭا ەمدەۋ نىساندارىن سالۋ، كۇردەلى جوندەۋدى قاجەت ەتەتىن مەكەمەلەردىڭ كۇردەلى جوندەۋدەن وتكىءزىءلۋىن دە جاقسى باعالاپ ءوتتى. جەدەل جاردەم كولىكتەرىنىڭ جاڭارتىلىپ، بۇل سالا جۇمىسىنىڭ جاڭاشا ۇيىمداستىرىلۋى، قالاداعى ەڭ ءىرى اۋرۋحانالاردىڭ ءبىرى — №4 قالالىق كلينيكالىق اۋرۋحانانىڭ قابىلداۋ ءبولىمىنىڭ ناۋقاستارعا كەشەندى كومەك كورسەتەتىن «Emergency romm» جۇيەسىنە كوشۋى دە الماتىنىڭ دەنساۋلىق ساقتاۋ ساقتاۋ سالاسىنداعى ۇلكەن جاڭالىقتاردىڭ ءبىرى ەكەندىگىن اتاي كەلىپ، باسقارمانىڭ جاڭا باسشىسى وسى جەتىستىكتەردى ودان ارى قاراي ارتتىرىپ، كەلەر جىلى دا وسى قارقىندا جۇمىس ىستەۋگە ارىپتەستەرىن شاقىرىپ، الماتىنىڭ اق جەلەڭدى ابزال جاندارىن تۇڭعىش پرەزيدەنت كۇنى مەرەكەسىمەن قۇتتىقتادى.
