قازىرگى ۋاقىتتا قازاقستان ۇكىمەتى قازاقستاندىق عارىشكەردى عارىشقا ۇشىرۋ ماسەلەسىن قاراستىرىپ جاتقان جوق. بۇل تۋرالى ق ر قورعانىس جانە اەروعارىش ونەركاسىبى مينيسترلىگىنىڭ اەروعارىش كوميتەتى ءمالىم ەتتى، دەپ حابارلايدى Qamshy.kz اقپارات اگەنتتىگى  Sputnik قازاقستان مالىمەتىنە سۇيەنىپ. 

"ق ر ءقاوم اەروعارىش كوميتەتى 6 جەلتوقساندا ءبىرقاتار اۋداندىق جانە رەسپۋبليكالىق باق-تاردا شىققان رەسەيلىك عارىشتىق كەمە ەكيپاجىنىڭ قۇرامىندا قازاقستاندىق عارىشكەردىڭ ۇشۋ مۇمكىندىگى تۋرالى اقپاراتتى تولىقتاي دۇرىس دەپ ايتۋعا بولمايدى. ناقتى ايتقاندا، اقتوبە پلانەتارييىنىڭ 50 جىلدىعىندا قازاقستاننىڭ حالىق قاھارمانى، ۇشقىش-عارىشكەر ايدىن ايىمبەتوۆتىڭ سۇحبات بارىسىندا اتالعان ماسەلە بويىنشا ايتىلعان ءسوزى دۇرىس تۇسىندىرىلمەگەن"، — دەپ ءمالىم ەتتى اەروعارىش كوميتەتى.  

كوميتەت حابارلاعانداي، قازىرگى ۋاقىتتا قازاقستان ۇكىمەتى قازاقستاندىق عارىشكەردى عارىشقا ۇشىرۋ ماسەلەسىن قاراستىرىپ جاتقان جوق. 

"زاماناۋي كوسموناۆتيكا بۇل، ەڭ الدىمەن، جاڭا ءبىلىم، تەحنيكالىق پروگرەسس جانە ادامزاتتىڭ بولاشاعى. سوندىقتان بولاشاقتا قازاقستان رەسپۋبليكاسى، ارينە، عارىشتىق زەرتتەۋلەر جۇرگىزۋگە قاجەتتىلىك تۋىنداعاندا باسقارىلاتىن كوسموناۆتيكانى دامىتۋدى جوسپارلاپ وتىر"، — دە اتاپ ءوتتى كوميتەتتەگىلەر. 

ەستەرىڭىزگە سالا كەتسەك، كەشە بۇقارالىق اقپارات قۇرالدارىندا تاعى ءبىر قازاقستاندىق عارىشقا ۇشادى دەگەن اقپارات تاراعان ەدى. 

"رەسەي ءقازىر عارىش كەمەسىن دايىنداپ جاتىر، ول 6 ورىندى بولۋى مۇمكىن، ەكيپاج قۇرامىندا قازاقستاندىق عارىشكەر بولادى. كادر تابىلادى، بىزدە بۇل قادامعا دايىن ماماندار كوپ "، — دەگەن ايدىن ايىمبەتوۆتىڭ ءسوزىن كەلتىرگەن ەدى ب ا ق.  

قازىرگى ۋاقىتتا ايدىن ايىمبەتوۆ "قازاقستان عارىش ساپارى" ۇلتتىق كومپانيا" اق ۆيسە-پرەزيدەنتى لاۋازىمىندا. بۇل كومپانيا جەردى قاشىقتىقتان زوندتاۋ عارىشتىق جۇيەسى جانە دالدىگى جوعارى سپۋتنيكتىك ناۆيگاسيا جۇيەسىنىڭ ۇلتتىق وپەراتورى بولىپ تابىلادى.